Հիշո՞ւմ եք

Հավանաբար մեծ բավականություն եք ստացել «Դիտարան» պարբերագրի վերջին համարներն ընթերցելուց, այնպես չէ՞։ Այժմ փորձեք ստուգել՝ կկարողանա՞ք արդյոք պատասխանել հետևյալ հարցերին։

• Ի՞նչ օգուտներ կարող ենք քաղել՝ իմանալով Սափանի ընտանիքի մասին։

Սափանը Հուդայի Հովսիա թագավորի դպիրն ու գրագիրն էր։ Թագավորության մեջ ազդեցիկ մարդ լինելով՝ Սափանը աջակցել է թագավորին՝ վերականգնելու ճշմարիտ երկրպագությունը։ Սափանի երկու որդիները հավատարիմ մնացին Երեմիա մարգարեին։ Որդիներից մեկ ուրիշը, ինչպես նաև երկու թոռները օգտագործեցին իրենց ազդեցիկ դիրքը հօգուտ ճշմարիտ երկրպագության։ Նմանապես, մենք պետք է մեր միջոցներն ու ազդեցիկ դիրքը օգտագործենք ի նպաստ ճշմարիտ երկրպագության (15.12, էջ 19–22)։

• Ինչպե՞ս է Իրեն Հոխստենբախը հաղթահարել առողջական մեծ դժվարությունը և առ այսօր ծառայել Եհովային։

Յոթ տարեկանում նա կորցրեց լսողությունը։ Խուլ լինելով հանդերձ՝ Իրենը սովորեց հաղորդակցվել ուրիշների հետ և այժմ ամուսնու (շրջագայող վերակացու) հետ միասին շրջագայական ծառայության մեջ է. նրանք այցելում են Նիդերլանդներում գտնվող ժողովները (01.01, էջ 23–26)։

• Ուսումնասիրության ի՞նչ նոր երկու ձեռնարկների լույսընծայման մասին է հայտարարվել «Թագավորության եռանդուն քարոզիչները» մարզային համաժողովներում։

Համայն աշխարհի Եհովայի վկաները ուրախ էին ստանալ «Երկրպագիր միակ ճշմարիտ Աստծուն» գիրքը։ Այն նախատեսված է նորերս հետաքրքրված անհատների հետ Աստվածաշնչի ուսումնասիրություն անցկացնելու համար այն բանից հետո, երբ նրանք կվերջացնեն «Հավիտենական կյանքի առաջնորդող գիտություն» գրքով ուսումնասիրելը։ Մյուս նոր գիրքն է՝ «Մոտեցիր Եհովային», որում առանձնակի ուշադրություն է դարձվում Եհովայի հատկություններին ու գործելակերպին։ Գիրքը նաև ցույց է տալիս, թե ինչպես կարող ենք ընդօրինակել Աստծուն նրա հատկությունները դրսևորելու մեջ (15.01, էջ 23, 24)։

• Ո՞րն է Առակաց 12։5–ի իմաստը. «Արդարների մտածողութիւնները իրաւունք են»։

Բարի մարդկանց մտքերը բարոյապես մաքուր են և ուղղված են դեպի արդար ու անաչառ բաները։ Քանի որ արդարների համար մղիչ ուժ է հանդիսանում Աստծո և դրացու հանդեպ սերը, նրանց միտումները բարի են (15.01, էջ 30)։

• Ի՞նչը կարող է օգնել անհատին հավասարակշռված տեսակետ ունենալ աշխատանքի հանդեպ։

Օգտակար է դեռ մանկուց սովորել գնահատել աշխատանքը։ Աստվածաշունչը մեզ հորդորում է ճիշտ տեսակետ ունենալ աշխատանքի հանդեպ, խուսափել ծուլությունից (Առակաց 20։4)։ Այն նաև քաջալերում է քրիստոնյաներին չտարվել աշխատանքով։ Հարկավոր է գիտակցել, որ մեր կյանքում ամենակարևոր բանը պետք է լինի Աստծուն ծառայելը (Ա Կորնթացիս 7։29–31)։ Քրիստոնյաները կարող են վստահ լինել, որ Աստված չի թողնի իրենց (01.02, էջ 4–6)։

• Որտե՞ղ է Աստվածաշնչում առաջին անգամ հիշատակվում զոհասեղանի մասին։

Ծննդոց 8։20–ում է հիշատակվում զոհասեղանի մասին, որը Նոյը կառուցեց, երբ Ջրհեղեղը ավարտվեց, և նա տապանից դուրս եկավ։ Սակայն, հնարավոր է, որ Կայենն ու Աբելը նույնպես զոհասեղաններ են օգտագործել ընծա մատուցելիս (Ծննդոց 4։3, 4) (15.02, էջ 28)։

• Ինչպե՞ս կարող են որոշ քրիստոնյաներ օգտվել փոփոխվող հանգամանքներից։

Ոմանք իրենք են փոխել աշխատանքը կամ էլ օգտվել են աշխատավայրում տեղի ունեցած փոփոխություններից, ինչը հնարավորություն է տվել ավելի շատ ժամանակ հատկացնել ծառայությանը։ Մյուսները նույնպես կարողացել են ավելի շատ ժամանակ տրամադրել և օգտվել Աստծուն ծառայելու տարբեր հնարավորություններից, երբ ընտանեկան պարտականությունները քչացել են, օրինակ՝ երբ երեխաների չափահաս են դարձել և ամուսնացել (01.03, էջ 19–22)։

• Ինչպե՞ս են Հովնանի և Պետրոս առաքյալի օրինակները օգնում մեզ ուրիշներին նայել Եհովայի տեսանկյունից։

Մեզ քաջ հայտնի է, որ թե՛ Հովնանը և թե՛ Պետրոսը երբեմն սխալ մտածելակերպ են դրսևորել և ճիշտ չեն արձագանքել հավատի ու հնազանդության փորձության ժամանակ։ Բայց Եհովան նրանց մեջ պարզորոշ տեսնում էր լավ հատկություններ և շարունակեց նրանց միջոցով առաջ տանել ծառայությունը։ Երբ ուրիշները վիրավորում կամ հիասթափեցնում են մեզ, լավ կլիներ, որ կենտրոնանայինք նրանց այն լավ հատկությունների վրա, որոնք անցյալում մեզ դուր են եկել և փորձել տեսնել այն լավ բաները, որ Աստված է տեսնում նրանց մեջ (15.03, էջ 16–19)։

• Ինչո՞ւ է «Սաղմոսներ» գրքի համարակալման ձևը Աստվածաշնչի տարբեր թարգմանություններում տարբեր։

Եբրայերեն բնագրում և նրա հունարեն թարգմանության՝ «Յոթանասնիցի» մեջ «Սաղմոսներ» գրքի համարակալման ձևը տարբեր է։ Վերջին ժամանակներում արված թարգմանությունները կարող են տարբերվել՝ կախված նրանից՝ հիմնված են եբրայերեն տեքստի, թե «Յոթանասնիցի» վրա (01.04, էջ 31)։