Գլուխ 29

Բարի գործեր շաբաթ օրը

ՄԵՐ թվարկության 31 թվականն է։ Գարուն է։ Մի քանի ամիս է անցել այն դեպքից, երբ Հիսուսը Հրեաստանից Գալիլեա գնալու ճանապարհին ջրհորի մոտ զրուցեց սամարացի կնոջ հետ։

Գալիլեայում ամենուրեք մարդկանց ուսուցանելուց հետո Հիսուսը նորից գնում է Հրեաստան և սկսում այնտեղի ժողովարաններում քարոզել։ Գալիլեայում Հիսուսի կատարած ծառայության հետ համեմատած՝ Աստվածաշունչը մեզ քիչ տեղեկություններ է տալիս Հրեաստան կատարած այս այցելության, ինչպես նաև նախորդ տարվա Պասեքի տոնից հետո այստեղ անցկացրած ամիսների մասին։ Հավանաբար, Հրեաստանում նրա ծառայությունն այնքան մեծ արձագանք չի գտել, որքան Գալիլեայում։

Շուտով Հիսուսը ճանապարհ է ընկնում դեպի Հրեաստանի գլխավոր քաղաքը՝ Երուսաղեմ՝ 31 թ. Պասեքը տոնելու։ Քաղաքում՝ «Ոչխարների դռան» մոտ, մի ավազան կա, որը կոչվում է Բեթզաթա։ Այստեղ են գալիս շատ հիվանդներ, կույրեր ու կաղեր։ Նրանք հավատում են, որ կբուժվեն, եթե ավազանի ջուրը շարժվելիս նրա մեջ մտնեն։

Օրը շաբաթ է։ Հիսուսը ավազանի մոտ մի մարդու է տեսնում, որը 38 տարի է, ինչ հիվանդ է։ Իմանալով, որ այդ մարդը երկար տարիներ տառապում է իր հիվանդությամբ՝ Հիսուսը հարցնում է.

— Ուզո՞ւմ ես առողջանալ։

— Տե՛ր, ես ոչ ոքի չունեմ, որ ջուրը շարժվելիս ինձ ավազանի մեջ իջեցնի,— պատասխանում է նա,— և մինչև մոտենում եմ, մեկ ուրիշն է ինձանից առաջ իջնում։

— Վե՛ր կաց, վերցրո՛ւ պատգարակդ ու քայլի՛ր,— պատվիրում է Հիսուսը։

Մարդն անմիջապես առողջանում է, վերցնում է պատգարակը և սկսում քայլել։

Բայց երբ հրեաները տեսնում են նրան, ասում են.

— Շաբաթ է, և օրենքով չի թույլատըրվում, որ պատգարակդ տանես։

— Նա, ով առողջացրեց ինձ, ինքն ասաց՝ «վերցրո՛ւ պատգարակդ ու քայլի՛ր»,— պատասխանում է նա։

— Ո՞վ է այդ մարդը, որ քեզ ասաց՝ վերցրու այն ու քայլիր,— հարցնում են նրանք։

Հիսուսը ամբոխի պատճառով հեռացել էր այդտեղից, իսկ բուժված մարդը չգիտեր նրա անունը։ Սակայն ավելի ուշ տաճարում նա հանդիպում է Հիսուսին և իմանում է, թե ով է իրեն բուժողը։

Ապա այդ մարդը գտնում է հրեաներին և ասում, որ Հիսուսն է իրեն բուժել։ Դա լսելով՝ հրեաները գալիս են Հիսուսի մոտ։ Ինչո՞ւ։ Արդյո՞ք իմանալու համար, թե ինչի շնորհիվ է նա այդպիսի հրաշքներ անում։ Ամենևի՛ն։ Նրանք եկել են Հիսուսի մոտ, որպեսզի դատապարտեն նրան շաբաթ օրով բարի գործեր անելու համար, և նույնիսկ սկսում են հալածել նրան։ Ղուկաս 4։44; Հովհաննես 5։1–16։

▪ Հիսուսի՝ Հրեաստան կատարած վերջին այցելությունից մոտավորապես որքա՞ն ժամանակ է անցել։

▪ Ինչո՞վ է հայտնի Բեթզաթա կոչվող ավազանը։

▪ Ի՞նչ հրաշք է գործում Հիսուսը ավազանի մոտ, և ինչպե՞ս են արձագանքում հրեաները։