ՀՈՒԴԱՅԻ ՆԱՄԱԿԸ

1 Ես՝ Հուդաս՝ Հիսուս Քրիստոսի ծառաս և Հակոբոսի եղբայրս,+ գրում եմ ձեզ, ում մեր Աստվածը՝ Հայրը, կանչել է+ և ում սիրում ու պահպանում է, որպեսզի Հիսուս Քրիստոսի հետ լինեք:+

2 Թող Աստված ավելի շատ խաղաղություն տա ձեզ և ավելի առատ սեր ու գթասրտություն ցուցաբերի ձեր հանդեպ:

3 Սիրելինե՛ր, թեև շատ էի ուզում բոլորիս փրկության մասին գրել ձեզ,+ բայց հարկ համարեցի հորդորել, որ աննահանջ պայքար մղեք այն հավատի համար,+ որը մեկընդմիշտ փոխանցվել է սրբերին:* 4 Բանն այն է, որ ձեր մեջ որոշ մարդիկ են սողոսկել, որոնց դատաստանի մասին վաղուց ի վեր գրված է սուրբ գրվածքներում: Նրանք աստվածավախություն չունեցող մարդիկ են, որոնք օգտվում են Աստծու անզուգական բարությունից՝ իրենց լկտի վարքը*+ արդարացնելու համար, և դավաճանում են մեր միակ Փրկագնողին ու Տիրոջը՝ Հիսուս Քրիստոսին:+

5 Չնայած դուք լավ գիտեք, բայց ուզում եմ հիշեցնել, որ թեև Եհովան* Եգիպտոսից փրկեց իր ժողովրդին,+ բայց հետագայում կործանեց հավատ չունեցողներին:+ 6 Եվ այն հրեշտակներին, որոնք չմնացին ի սկզբանե իրենց հատկացված դերում, այլ թողեցին իրենց համար նախատեսված բնակության վայրը,+ նա հավերժական կապանքներով թանձր խավարի մեջ է պահում մինչև իր մեծ օրը, երբ կիրականացվի նրանց դատավճիռը:+ 7 Նմանապես՝ Սոդոմն ու Գոմորը և շրջակա քաղաքները թաղվեցին խայտառակ անբարոյականության* մեջ՝ տրվելով անբնական մարմնական ցանկություններին,+ և դատապարտվեցին ու պատժվեցին հավիտենական կրակով: Նրանց օրինակը նախազգուշացում է մեզ համար:+

8 Չնայած դրան՝ այս մարդիկ նույնպես տարվում են իրենց երևակայությամբ* և պղծում են մարմինը, արհամարհում են իշխանությունը* և վիրավորական խոսքեր են ասում նրանց մասին, ում Աստված փառքի է արժանացրել:+ 9 Մինչդեռ Միքայել+ հրեշտակապետը,+ երբ Բանսարկուի հետ վիճում էր Մովսեսի մարմնի վերաբերյալ,+ չհանդգնեց անարգական խոսքերով դատապարտել նրան,+ այլ ասաց. «Թող Եհո՛վան սաստի քեզ»:+ 10 Իսկ այս մարդիկ անարգանքով են խոսում այն ամենի մասին, ինչը իրականում չեն հասկանում:+ Ինչն էլ հասկանում են, բնազդաբար են հասկանում՝ բանականությունից զուրկ կենդանիների նման,+ վարվում են դրա համաձայն և այդպիսով ապականում իրենց:

11 Վա՜յ նրանց, որովհետև Կայենի հետքերով են գնացել,+ վարձատրության հետևից ընկնելով՝ Բաղաամի սխալ ընթացքն են բռնել,+ ու Կորխի պես ըմբոստությամբ խոսելով՝+ իրենց վրա կործանում են բերել:+ 12 Այդ մարդիկ մասնակցում են ձեր եղբայրական* խնջույքներին, բայց ստորջրյա խութերի պես են,+ հովիվներ են, որոնք առանց վախենալու միայն իրենց մասին են մտածում,*+ անջուր ամպեր են, որ քամուց այս ու այն կողմ են քշվում,+ ուշ աշնան ծառեր, որոնք ամբողջովին չորացած* են ու արմատախիլ եղած, 13 ծովի կատաղի ալիքներ են, որոնք ափ են նետում իրենց կեղտոտ փրփուրը՝ ամոթալի գործերը,+ թափառող աստղեր, որոնց բաժինը անթափանց խավարը* կլինի առհավետ:+

14 Ենոքը,+ որ Ադամից հաշված՝ յոթերորդն էր, նույնպես մարգարեացել է նրանց մասին՝ ասելով. «Ահա Եհովան եկավ իր տասնյակ հազարավոր սուրբ հրեշտակների հետ,+ 15 որպեսզի դատի ամենքին+ և Աստծուց չվախեցողներին դատապարտի իրենց աստվածանարգ գործերի ու բոլոր այն սարսափելի խոսքերի համար, որոնցով Աստծուց չվախեցող այդ մեղավորները վիրավորեցին նրան»:+

16 Այս մարդիկ տրտնջացողներ են,+ որոնք դժգոհում են իրենց կյանքից, տրվում են իրենց ցանկություններին,+ մեծ-մեծ խոսելով՝ գլուխ են գովում, բայց նաև հանուն իրենց շահի՝ շողոքորթում են ուրիշներին:+

17 Սիրելինե՛ր, հիշեք այն խոսքերը, որ ավելի վաղ* ասել են մեր Տեր Հիսուս Քրիստոսի առաքյալները: 18 Նրանք ձեզ ասում էին. «Վերջին ժամանակներում ծաղրողներ ի հայտ կգան, որոնք կվարվեն իրենց մեղսածին ցանկությունների համաձայն»:+ 19 Նրանք են, որ պառակտումներ են առաջացնում,+ անասնացած մարդիկ,* որոնք Աստծու ոգին չունեն: 20 Բայց դուք, սիրելինե՛ր, ամրացեք ձեր սրբագույն հավատով* և աղոթեք սուրբ ոգու ազդեցության ներքո,*+ 21 որպեսզի Աստծու կողմից սիրված մնաք,+ մինչ սպասում եք, որ մեր Տեր Հիսուս Քրիստոսը իր գթասրտությամբ առաջնորդի ձեզ դեպի հավիտենական կյանք:+ 22 Նաև շարունակեք գթասրտությամբ վերաբերվել նրանց,+ ովքեր կասկածներ ունեն.+ 23 փրկեք նրանց՝+ իսկույն հանելով կրակի միջից: Շարունակեք գթասիրտ լինել նաև մյուսների հանդեպ և դա արեք զգուշությամբ՝ ատելով նույնիսկ այն հագուստը, որն աղտոտված է մարմնից:+

24 Նրան, ով կարող է օգնել ձեզ, որ չընկնեք և մեծ ուրախությամբ անարատ կանգնեք+ իր փառքի առջև, 25 միակ Աստծուն՝ մեր Փրկչին, մեր Տեր Հիսուս Քրիստոսի միջոցով թող փառք լինի: Նրանն են փառքը, մեծությունը, զորությունը և իշխանությունը ողջ հավիտենության մեջ՝ անցյալում, հիմա և ապագայում: Ամեն: