Սաղմոսներ

Սիօնի փառաւորուիլը հեթանոսների դարձի գալովը։

Կորխի որդկանցը. Սաղմոս. երգ։

87 Նորա հիմունքը սուրբ սարերի վերայ են:

2 Տէրը սիրում է Սիօնի դռները աւելի քան Յակոբի բնակարանները:

3 Փառաւոր բաներ են պատմվում քեզանից, ով Աստուծոյ քաղաք: (Սելա։)

4 Ռահաբին եւ Բաբիլոնին կ’յիշեմ նորանց մէջ որ ճանաչում են ինձ. ահա Փղշտացիք եւ Տիւրոսը Քուշի հետ. սա այնտեղ է ծնուած:

5 Եւ Սիօնի համար կ’ասուի՝ այս մարդը եւ այն մարդը նորանում է ծնուած. եւ ինքը Բարձրեալը նորա հիմունքը հաստատեց:

6 Տէրն ազգերին գրելիս կ’պատմէ՝ սա այնտեղ է ծնուած: (Սելա։)

7 Եւ երգիչները՝ ինչպէս որ պար բռնողները կ’ասեն՝ Իմ ամեն աղբիւրները քեզանում են: