Esimikiro y’akamaro bwenene kulusha eyindi yoshi omuntu akarhola, kuli kuchihana emwa Yehova n’okuba muguma w’omu mulala gwage. Yehova alonzeze buli muntu ajire ntyo. Bulagurhe? Alonzeze basimire obwira haguma naye, banalame esiku n’amango. (Kum. 30:19, 20; Gal. 6:7, 8) Aliko, ntaye Yehova anaseza okw’amukolere. Analeka buli muntu achishoge bichi akajira. Bichi abashamuka bakwanene kujira akaba Omukristu amajira echaha chikomere? Akaba arhahungamire, akwanene kukulwa omu chibaga. (1 Ko. 5:13) Nechi, chiro akaba ntyo, Yehova alonzeze kweri oyola muntu ahungame anashube kuba mwira wage wa hofi-hofi. Omu bukweri, eyola y’empanvu nkulu yarhumire Yehova ahana enchungu, y’abanya-byaha bahungamire bababalirwa. Yehova aba Mungu w’obuzigire bunene bwenene, olonzeze balala bajirire ebyaha bikomere bahungame.​—Zek. 1:3; Ro. 2:4; Yak. 4:8. w24.08 buk. 14 chi. 1-2

Amango entumwa Yohana aliri ayandika amaruba mage makasharhu, bantu baguma baliri bayeneza emyazi y’obubeshi n’okulonza kugaba echibaga. Aliko abandi baligenderere “kulambagira omu bukweri.” Balikengere Yehova banaliri “balambagira nk’okw’amakanuni mage maderhere.” (2 Yo. 4, 6) Abola Bakristu bemana barhalisimisize Yohana yenyine s’aliko na Yehova. (Mez. 27:11) Bichi birhuyigirize? Obwimana bunayerekeza ewa busime. (1 Yo. 5:3) Omufano, rhugwerhe obusime okumenya oku rhuli rhwasimisa Yehova. Yehova anagwarha obusime amango amabona rhwalahira kujira ebibi n’okukenga amarhegeko mage. Bamalayika bali embingu nabo banayunva obusime. (Lu. 15:10) Nerhu rhunagwarha obusime amango rhwamabona bene-berhu na bali-berhu bagenderere kubera bemana. (2 Te. 1:4) Naho amango linola gulu libi nji lyaba lirhachiliho, nji rhwagwarha obusime b’okumenya oku rhwaliyerekene obwimana ku Yehova chiro n’omugulu lyalirhegekerwe na Shetani. w24.11 buk. 12 chi. 17-18

Bisanzi bingana gurhe okwanene kulolereza oyola muntu embere omubwire ok’omuzigire? Nk’obwirire omuntu juba-juba ok’omuzigire nkabaga akawaza ok’orhawaza bwinja embere orhole esimikiro. (Mez. 29:20) Aliko kandi, amango omuntu amamenya ok’osimisizwe naye, hakashuba kugera kasanzi kanene buzira kumubwira, akawaza ok’onagangana bwenene embere orhole esimikiro. (Muh. 11:4) Oyibuke okw’embere obwire muntu mulebe ok’omuzigire, birhakuhemere ok’ochizere ahohan’aho oku nji mwashabana naye. Aliko, okwanene kuchizera ok’oli tayari kushaba n’ok’oyola muntu y’owazize oku y’okwanene kushabana naye. Aliko si, gurhe wakajira nka wamarhegera oku muntu mulebe asimisizwe nawe? Akaba ochiyunvirhe ok’orhasimisizwe naye, ochihangane kuyerekana ntyo bwinja-bwinja kugerera ebijiro byawe. Kurhali kwinja okurhuma omuntu awaza oku nkabaga nji mwakakola naye obwira nobo arhali ntyo ku bili.​—Efe. 4:25. w24.05 buk. 22-23 chi. 9-10