Amaruba Marhengere oku Baraza Lirhambwire

Bene-berhu na Bali-berhu Bazigirwa:

Rhwabo nka bantu banaharamya Yehova, rhunasima Echinwa chage, e Biblia. Rhuchizerere okw’eli mw’engani z’okuli, enarhuhereza amahano menja rhwakakolesa omu hali zoshi z’akalamo kerhu, enagwerhe emyazi esimisize eyerekene obuzigire bwa Yehova oku bantu. (Zaburi 119:105; Luka 1:3; 1 Yohana 4:19) Rhugwerhe enyorha nene bwenene y’okurhabala abantu bamenye obukweri bw’akamaro buli omu Chinwa cha Mungu. Yirhugala kujira ntyo, rhugwerhe busime bunene bwenene b’okubaha chinola chitabu, “Ebirhwakayiga omu Biblia.” Muleke rhubabwire oku bugeke oku bili mu chinola chitabu.

Ahanene, chinola chitabu chirheganyizwe yi chirhabala abana. Aliko kandi, chakakoleswa omu kurhabala abantu bakulu basimire kumenya binene oku bilolere Ebiblia. Bulala Ebiblia chili chitabu ch’abantu boshi, kweri rhweshi rhwakayunguka omu kuyiga enyigirizo zilimo zakarhurhabala rhugwarhe obusime b’okuli.

Chinola chitabu chikoleseze emyazi eli omu Biblia omu kurhushambalira oku ngani y’abantu kurhenga amango balemwa na kugenderera. Rhwajirire okwerhu koshi y’engani zili omu Biblia ziba wazi zinayunvikane bwinja-bwinja nk’okubyakanagalikana koshi. Kandi rhwachihanganire kuzibala omu bulyo zikulikirane bwinja-bwinja.

Aliko, chinola chitabu chirhashambere konyine oku bilolere engani ze Biblia. Emyandiko n’amafoto byarheganyizwe bwinja-bwinja omu njira eyerekene okw’eyila myazi eli y’okuli, zinayerekene okuntu abantu baganirirwemo baliri bachiyunva.

Chinola chitabu chiyerekene okwe Biblia eshambere oku bantu balikengere Yehova na balala barhamukengaga. Kandi chirhurhabere rhumenye eby’emifano yabo yakarhuyigiriza. (Waroma 15:4; 1 Wakorinto 10:6) Chinola chitabu chigwerhe bigabi 14. Oku murhondero gwa buli chigabi, hali myazi migeke eyerekene ebirhwayiga mw’echo chigabi.

Akaba oli muzere, wakasoma ngani nguma n’omwana wawe, naho mwanaja mwaganira oku foto eyerekenwe mw’eyola ngani. Buzinda, mwakaja mwasoma olwandiko lwe Biblia eyola ngani eyumangireko. Orhabale omwana wawe ahuzanye eby’ali asoma omu Biblia n’eby’eyola ngani emuyigirize. Rhwakajira okola kon’oko amango rhuli rhwashonda kurhabala bwinja omuntu okala mukulu, amenye oburhumwa buli omu Biblia.

Rhulangalire oku chinola chitabu charhabala balala boshi bagwerhe emirhima minja, emisole n’abakala bakulire, bayige Echinwa cha Mungu n’okukolesa omu kalamo kabo ebi bayigiremo. Naho, bakaja bamuharamya eyi nabo bali bantu b’omu mulala gwage azigira bwenene.