Rebeka Nigo Atagete Komogokia Yehova

Rebeka nigo arenge omokungu omwanchete Yehova. Omosacha oye nigo are korokwa Isaka. Nere namwanchete Yehova. Inaki Rebeka baumeranete na Isaka? Inaki Rebeka aorogetie ng’a natagete komogokia Yehova? Tiga twegere amange igoro yaye.

Ibrahimu na Sara nabwo barenge abaibori ba Isaka. Nigo bamenyete ase ense ya Kanani, gati y’abanto batare komosasima Yehova. Korende Ibrahimu ere nigo atagete omwana oye anyuome omokungu okomosasima Yehova. Ase igo akamotoma omosomba oye, nabo erabe ng’a omosomba oyio n’Eliezeri, kogenda komorigeria Isaka omokungu ase are korokwa Harani, ase abanto bamwabo Ibrahimu bamenyete.

Eliezeri akagenda amo na abasomba bande ba Ibrahimu. Nigo yarenge esabari entambe. Bakagenda ne chingamia ikomi chibogoretie endagera n’ebiegwa. Bono, inaki Eliezeri aramanye mokungu ki aramochorere Isaka? Ekero Eliezeri amo na abasomba bande baigete Harani, bagatimoka ase egesima kia amache, egekogera Eliezeri namanyete ng’a chinsa chi’abanto gocha korigia amache ng’ang’e chiare. Akamosaba Yehova na goteba: ‘Kondaborie omoiseke oyomo obo: Ing’a amache inywe, nere antebie: Ee kanywe aye, na nimbuuchere chingamia chiao na chirochio; otige oyio abe nere gwachorire.’

Omoiseke Rebeka agacha ase egesima. Ebibilia nigo egoteba ng’a nigo arenge omonyakieni mono. Eliezeri akamosaba amache, na Rebeka akamoiraneria: ‘Ee kanywe aye, na nimbuuchere chingamia chiao nachirochio;’ Rengereria! Chingamia chire nerang’o nigo chikonywa amache amange, ase igo Rebeka goika are kominyoka gochia ase egesima chintunda chinyinge. Noroche ase ebicha buna are n’omokia?— Eliezeri nigo akumetie ase enchera Yehova airaneretie ogosaba kwaye.

Eliezeri akamoa Rebeka ebiegwa ebinge ebiya. Rebeka akabaarigania Eliezeri amo na abasomba baria bande gochia mwabo. Eliezeri akabaeresa ekiagerete Ibrahimu akamotoma gochia aroro, na buna Yehova airaneirie ogosaba kwaye. Abanto bamwabo Rebeka nigo bagogetigwe komorwa anyuomwe na Isaka.

Aye okorengereria, Rebeka natagete konyuomwa na Isaka?— Rebeka namanyete ng’a Yehova nere omotomete Eliezeri aroro. Ase igo, ekero abanto bamwabo bamoboretie gose natagete kogenda Kanani konyuomwa na Isaka, nigo atebete iga: “Ee, nanchire, ngende nere.” Erio abwo abwo, bagachaka esabari na Eliezeri. Ekero baigete Kanani, akanyuomwa na Isaka.

Ase engencho Rebeka akorete buna Yehova atagete, Yehova akamosesenia. Nyuma y’emiaka emenge, Yeso nigo aiboretwe ase ororeria rwa Rebeka! Oise koba buna Rebeka na komogokia Yehova, nagosesenie.