BUNBILIPAALESI SOKE YETI
Beni n sɔi ti la ka nara ti ho tɔ’ɔsa TV poan yɛla n tɔɣeri nɛreba yele se’em?—Bɔberɛ 1: Pugeto Denɛ
Bem n de TV poan yɛla n tɔɣeri nɛreba yele la?
Bisɛ yelebɛa wa ge nyaa lebese sokese’a n taɣelɛ la.
Bɔberɛ 1 |
Bɔberɛ 2 |
|---|---|
Nɛra n ka tari bɔkerɛ |
Nɛra n tuni a zubgere tuunɛ |
Nɛra n iti kpenkpasi |
Nɛra n doli lɔɔ |
Yalumtuuma |
Sarumsoŋɔ |
Nɛra n ka ti’iseri paara |
Nɛra n tari bɔkerɛ |
Yelebibisadaana |
Yɛm |
Pumpa’asum |
Yelemɛŋɛrɛ |
Bem yelebɛa ti ba ni dekɛ pa’alɛ pugesa’ara yele sinii, TV la magazines poan?
Ho wan bɔta ti ba dekɛ la yelebɛa aŋa bɛɛ tɔɣɛ pa’alɛ hon ani se’em?
Nɔkpe’ene kai ti sokese’a n deŋɛ nɛŋa la lebesego boi la bɔberɛ ayina la poan ti sokese’a n pa’asɛ buyi la me lebesego bɔna bɔberɛ buyi la poan. La san dɛna bala nɔkpe’ene kai ti ho wan bɔta ti ho tara halesoma gana ban tɔɣeri pugesa’ara yele se’em TV poan la—la me dayɛ ho ma’a! Geele bisɛ sɛla n sɔi.
“Ba ni pa’alɛ pugesa’ara yele TV poan yeti, ba iti la kpenkpasi, tara halebe’ero, bisɛ nana bamea ge ti ho kan ta’an dekɛ homea delum ba. Bala ni basɛ ti la ana me wuu to za’a ani la bala la.”—Erin.
“Pugesa’ara n boi TV poan dela sɛba n boti nɛrawoo bisɛ nyɛta ba. Ba innaanɛ n ani se’em, ba lɔɣeyɛɛtɔ, nɛreba n mi ba se’em la budibito yele n ba’ɛ pakɛ ba.”—Natalie.
“Ho san nyɛ TV poan pugesa’ara wa bɔŋa zɛ’an, ba nyuuri daam mɛ, ba gã la budibito ge me ita kpenkpasi la ba dɔɣereba. Pugesɛba n ka iti yele aŋa la, ba ni basɛ ti ba ana wuu ba ba’ɛ nɔŋɛ Naayinɛ ta gaŋɛ mɛ ge ka bɔta ba tɔɣera gã’aregɔ yɛla.”—Maria.
Soke homea yeti: ‘Mam n yɛɛri n lɔɣɔrɔ se’em, ita n yɛla se’em ge tɔɣera se’em la pa’alɛ la mam n sirum de nɛresɛka taaba yoi? Bii la dela TV poan nɛreba la ti mam tɔɣesa?’
Hon nari ti ho mina sɛla
Nɛreba zo’e zo’e ti’isɛ ti bamam bɔŋa boi la de to’ore ge yelemɛŋɛrɛ la dela, ba tɔɣeseri la sɛla ti ba nyɛta TV poan la. Pɔka ayima yu’urɛ n de Karen yeti, “Mam yibega pɔsɛ ita la bala. A mi mɛ ge ita wuu sɛla n kɔ’ɔn pakɛ eŋa vom poan dela lɔɣɔyɛɛtɔ la budibito ma’a yele. A wakɛ mɛ ge mam mi ti a puti’irɛ boi yɛla ase’a poan mɛ. A tuɣum tue mɛ sɛla n sɔi la a ti’isɛ ti bala ma’a poan ti a wan ta’an tɔɣesɛ ‘pugesa’ara la.’ A me dela yuun pia la ayi ma’a!”
Baabule la yeti: ‘Da basɛ ya ti tingɔŋɔ wa yaɣum ya.’—Arom 12:2.
Ban tɔɣeri pugesa’ara yele se’em TV poan la, daɣɛ bala ti pugesa’ara woo bɔta ti ba ana. Alexis n de yuun pia la anuu yeti, “Ba ni iti pa’ala TV poan pugeto n ti’iseri ba ma’a yele se’em, tuna gberetuuma ge ti biyã’atɛ zo’e bɔna ba tuuma poan mɛ. Ge mam mi ti, to zo’e zo’e mi ton wan tara tomea se’em mɛ. Yɛla ase’a ba’ɛ pakɛ mɛ gana hon wan ti’isa budibito ma’a yele.”
Baabule la yeti: ‘Sɛba n kasegɛ . . . tari ba puti’irɛ la tuna ta’an kumesɛ bamesi mina sɛla n ani soŋa la sɛla n de be’em.’—Hebru 5:14.
Ban tɔɣeri pugesa’ara yele se’em TV poan la soŋeri lɛɛbereba mɛ ti ba nyɛta ligeri ge la ka soŋeri pugesa’ara la. Gɔnguleseba, sɛba n pɛ’ɛri, sɛba n maali lɔɣɔrɔ la sɛba n biseri deeŋo yɛla n mi ti nyuurɔ boi bim la zuo la, ba ni pɔsɛ ita la yelese’a ti kɔma la nɔŋɛ la wan eŋɛ se’em ti ba ta zɔ’ɔra la, ti ba puɣum mina yele aŋa mɛ. Gɔnɔ la n de 12 Going on 29 la yeti, “sɛba n tari ba lɔɣɔrɔ mɔɔla la yeti, kɔnsɛba n nan ka paɛ yuun pia la atã ge ka tara lɔɣepaala la fondoma la, ka po pa’asɛ nɛreba poan. Daarewoo kɔnsɛba n nan ka paɛ yuun pia la atã nyɛti TV poan yɛla kunkoma’asum mɛ ge puɣum ka bɔkɛ ku de sɛla.”
Baabule la yeti: ‘Sɛla woo n boi tingɔŋɔ wa poan n de inganɛ la nini kunkoma’asum la nɛra n iti pa’ala eŋa n tari sɛla a vom poan, ka ze’ele Naayinɛ zɛ’an na ge la ze’ele la tingɔŋɔ wa poan.’—1 Yon 2:16.
Ti’isɛ yele wa bisɛ: Ba san gulesɛ se’em n ta pɛ’ɛra paa yu’urɛ labelɛ lɔkɔ, ani n nyɛti nyuurɔ la? Ho san tiregɛ da fon paalega, la wan eŋɛ se’em ti ho tadaandoma bisa nana hɔ, ani n nyɛti nyuurɔ? Lɛɛbereba wa boti la ba soŋɛ la hon bii bamea?
Hon wan ta’an eŋɛ sɛla
Ho san nyɛ ban pa’alɛ nɛra n nari a maalɛ amea se’em TV poan, ni malum geele de bisɛ. Ho san zɔ’ɔra, hon nyɛti ge bɔkera yɛla se’em la ni tee mɛ. Ni dekɛ ho puti’irɛ tum tuuma ta’an baŋɛ ban mɔɔli yelese’a TV poan, la wan ta’an soŋɛ ho bii daam ho se’em. Alana n de yuun pia la anaasi yeti, “Ba ni pa’alɛ TV poan ti, pugesa’ara nari ti ba maalɛ ba nɛŋa soŋa soŋa gana ba lɔɣɔyɛɛtɔ. Ge pugesa’ara zo’e zo’e ka mi ti bala ni basɛ ti ba ka ana soŋa sa. La ni tuɣum basɛ ti la ana wuu sɛla n ba’ɛ daana ba la.”
Bisɛ hon wan ta’an tara homea soŋa se’em ta’an ta dɛna nɛresɛka taaba ti homea bɔta ti ho dɛna. Ti’isɛ bisɛ halesɛka taaba ti ho bɔta ti nɛreba tara mina hɔ, halese’a ti to baŋɛ zaseŋɔ yele wa pɔsega poan la. Kɔ’ɔn tiregɛ ta’an tara hala aŋa. Ho san puɣum tara ba, basɛ ti la malum pa’asɛ. Baabule la yeti: ‘Dekɛ ya halɛ paalega la yɛ, sɛla n bala ti yelemɛŋɛrɛ mi’ilum la kɔ’ɔn basɛ ti ka ana paalega.’—Kolose 3:10.
Bisɛ ho wan ta’an tɔɣesɛ nɛresɛba. Nɛrebana wa ta’an dɛna ho deo poan nɛreba, ho ma bii ho puɣera. Sɛba ta’an dɛna mabiisi n kumesɛ. Yehowa Sɛɛradoma tari mabipɔɣesi zo’e zo’e tansugere la poan ti ho wan ta’an nyɛ soŋeri ba zɛ’an.—Titus 2:3-5.
Pa’alegɔ yɛla: Zamesɛ Imitate Their Faith gɔŋɔ la baŋɛ Baabule la n pa’alɛ pɔɣese’a n yuun tari halesoma, maɣesɛ wuu Arut, Hana, Abigail, Ester, Mary la Marta. Yehowa Sɛɛradoma n gulesɛ Imitate Their Faith gɔŋɔ la ti la bɔna www.jw.org poan.