Kɔ’ɔn Pɔsɛ Mam Bunbilimen Sa, Yehowa Kɔ’ɔn Pa’ala Mam Mɛ

Pooren, n wan tɔ̃kɛ sɛla n yuun eŋɛ la. Ba yuun dɔɣɛ mam la Calgary, Canada tiŋa, Tingɔŋɔ Wa Za’a Zaberɛ II la saŋa. La paɛ wuu yuun 75 n tole ti sore ŋmɛ’adaana ayima n yuun de bunbilipaalega ti a yu’urɛ dɛna Donald Fraser yuun wa’an tomam yire na, ti mam ma sakɛ ti a wan zamesɛ Baabule la. A yuun nɔŋɛ sɛla ti a zamesɛ la mɛ. Ge bã’a n yuun daani en ti a ka ta’an kena zamesegɔ soŋa. Hali la bala za’a la, a yuun nyaŋɛ muse ko’om la yuun 1950 poan. Susa’aŋɔ yele la dela, la yuun ka paɛ yuuma ayi ge ti a ki. Sankaŋa la ti mam sɔ yuun ka pu’useri Yehowa ge a yuun sakɛ mɛ ti mabiisi la laɛ mam ma.

Bakwai fii pooren ti mabipɔka ayima yu’urɛ n de Alice yuun beem mam ti n wa’an zamesegɔ. Mabipɔka wa yuun kuregɛ mɛ ge me yuun dɛna looredoma la ayima. A yuun mi mam mɛ se’ere n sɔi la mam yuun ni dɔla la mam ma kena zamesegɔ. Mam yuun soke mam sɔ nyaa n ta’an keŋɛ zamesegɔ la. A yuun sakɛ mɛ ge yeti eŋa wan keŋɛ la “buyina ma’a” ta pu’usɛ mabisɛka n yuun bo mam ma kuurɛ yetɔɣum la. Yu’unkuŋɔ n yuun de mam sɔ yia zamesegɔ. La me yuun kɛ̃ la a suure paa. Mam sɔ yuun keŋɛ la sukuu ta zamesɛ ban tɔɣeri nɛrekuuŋɔ poan se’em. Bala la, eŋa n yuun nyɛ ban bo’ori yetɔɣum se’em tansugere la poan la, la yuun eŋɛ en la pakerɛ. Mam sɔ yuun nyaa lu la a suure ti a wan kena zamesegɔ. Pooren, a yuun nyaa keni zamesegɔ la woo mɛ.

Sankaŋa la, se’em n yuun biseri Tiokrasi Sukuu la yuun ni yi la mabisɛba woo yu’ura n boi sukuu la poan, ti ba me ni sakɛ yeti, “Mam wana.” Daarɛ deyima ti mam yele mabiisi la ti bakwai sɛka n taɣelɛ la, mam boti la ba me yi mam yu’urɛ. Mabia la yuun pɛ̃ɣɛ mam mɛ ge ka soke mam nyaa mam bɔkɛ bala vuurɛ n de sɛla yoi.

Mam yuun ka mi ti, mam n yuun yeti ba yi mam yu’urɛ sukuu la poan la pa’alɛ ti n boti la n bɔ’ɔra yetɔɣum zamesegɔ poan. Mam yuun yeen bɔta la ba yi mam yu’urɛ! Bakwai sɛka n taɣelɛ la ba yuun yi mam yu’urɛ mɛ, ti mam sakɛ yeti, “Mam wana.” Ton yuun ba’asɛ zamesegɔ la, nɛra woo yuun pɛ̃ɣɛ mam mɛ. Bakwai fii pooren, ti mabia ayima yuun dekɛ yetɔɣum gɔŋɔ la ti mam puɣum tɔɣɛ de yele pɔsega la bo mam.

Dabeem n yuun tari mam! Se’ere n sɔi la nɛra yuun nari ti a dekɛ mita 6 ta paɛ mita 8 bo yetɔɣum sukuu la poan. Sankaŋa la, ba yuun ka tari tuunɛ n de wuu Baabule kaalegɔ. Bala la, mam sɔ yuun soŋɛ mam mɛ ti n maasum n yetɔɣum la. A me yuun basɛ ti n zamesɛ de taɣesɛ la sugumnɔɔrɛ 20 ge nyaa ta bo yetɔɣum la. Mam n yuun bo yetɔɣum la ba’asɛ la, se’em n biseri sukuu la yuun ka’am mam mɛ soŋa soŋa. Yuun aŋa poan, Yehowa yuun doli la mam sɔ la mabiisi n kumesɛ, la a tigere la poan soŋera mam.

YEHOWA KƆ’ƆN PA’ALA MAM MƐ

Mam n yuun pɔsɛ na’am mɔɔlegɔ la, Alice ti n puɣum tɔɣɛ a yele la yuun kumesɛ mam mɛ. Sankaŋa la, na’am mɔɔlegɔ poan, to yuun ni kaalɛ la Baabule gulesegɔ batã bo yidaana la ge nyaa dekɛ gɔŋɔ bo en. La san dɛna la mam n yeti n tɔɣɛ, Alice ni pɔsɛ mɛ yi a yu’urɛ pa’alɛ nɛra la ge nyaa yele mam ti n kaalɛ yia gulesegɔ la. Mam san ba’asɛ, mam mɛŋa n nyaa ni kaalɛ gulesegɔ bayi la n gee la ge me dekɛ gɔŋɔ la bo nɛra la. Pooren, mam yuun nyaa mi mam wan pɔsɛ sɔsega se’em mɛ. Mam sɔ n yuun musɛ ko’om yuun 1954 poan ba’asɛ la, a yuun kelum kumesa mam mɛ na’am mɔɔlegɔ poan. La boi bim ti mam ma yuun ka boi ge mam sɔ yuun tiregɛ mɛ uge mam yelemɛŋɛrɛ la poan. Zamesegɔ, la na’am mɔɔlegɔ kenɛ yele yuun pakɛ mam sɔ mɛ paa. Mam yuun mi yelese’a ti to wan eŋɛ zamesegɔ daarɛ, la bakwai la ba’asegɔ poan. La san daɣɛ zamesegɔ kenɛ, la dela na’am mɔɔlegɔ.

Mam yuun ka laɣum pa’asɛ sɛba n ba’ɛ mina gɔŋɔ la poan ge mam n yuun dekɛ yuuma 12 zamesɛ yelese’a sukuu la soŋɛ mam mɛ. Makerɛ, mam yuun zamesɛ la maths, creative writing la Solemiine yetɔɣum pa’asɛ. Mam n yuun zamesɛ yele ana wa la soŋɛ mam mɛ ti n ta’an tuna Gulesegɔ Wele la poan.

Nɛreba ni bɔta la ba baŋɛ sɛla n sɔi ti mam nɔŋɛ yuuma. Mam dɔɣereba yuun nɔŋɛ yuuma mɛ. Bala la mam n yuun de yuuma ayopɔi la, ti mam yuun pɔsɛ zamesa ban ŋmɛ’ɛri piano se’em. Ge mam tikiya la yuun bisɛ ti mam ka ba’ɛ mɔɔra. Bala la, a yuun yele mam sɔ ti n basɛ yuuma zamesegɔ. Mam yuun bɔkɛ mɛ se’ere n sɔi la mam inya yuun ka kpeŋe sankaŋa la ti n zamesɛ.

Ŋmaresi fii pooren, mam sɔ yuun le nyɛ la tikiya bo mam. Mam n yuun le pɔsɛ zamesa la, mam yuun nyaŋɛ zamesɛ la piano ŋmɛ’a, la ban yuuni se’em. Sankaŋa la, mam yuun ta’an yuuna mɛ soŋa soŋa. Hali mam yuun to’e la awards basɛba. Sɛla n sɔi ti mam yuun zamesɛ yuuma dela, n dɛna tikiya ta’an pa’ala nɛreba yuuma la wan eŋɛ se’em ti n ta’an bisera n mea ge tuna sore ŋmɛ’a tuuma la. Ge mam yuun baŋɛ ti n wan dekɛ la saŋa zo’e zo’e zamesa yuuma yɛla ge me gulesa tɛɛsidoma. Bala la, mam yuun basɛ sukuu la mɛ ge nyaa dɛna sore ŋmɛ’adaana yuun 1963 poan.

SORE ŊMƐ’A TUUMA BO’ORI LA PUPEELUM

Mam yuun tum sore ŋmɛ’a tuuma la yuunɛ ge ti ba yuun loe mam ti n keŋɛ Kapuskasing n boi Ontario tiŋa ta tum sore ŋmɛ’a tuuma n boi de to’ore. Mam la Daniel Skinner n yuun laɣum tuna sore ŋmɛ’a tuuma n boi de to’ore la. A me yuun dela bunkutɛ gana mam. A yuun pa’alɛ mam la tansugere la n tigese se’em ge me tuna se’em. Mam n yuun de yuun 20 la, ba yuun loe mam pa’asɛ la Na’am Mɔɔlegɔ Tuuma Bisegadoma la poan. Bala la, mam yuun nari ti n zamesɛ la yɛla zo’e zo’e. Mam puurɛ pee mɛ la tigere la n le pa’alɛ ti to kumesa bunbilipaalesi la. To san kumesa bunbilipaalesi la, la wan soŋɛ ba ti ba ta’an tum zo’e zo’e bo Yehowa!

Saŋa ase’a, yɛla ta’an ni kpe’em bo to mɛ Kapuskasing tiŋa. Se’ere n sɔi la ɔɔrɔ saŋa la ni ba’ɛ ma’ara mɛ. Mam la Dan yuun ni mɔɔla la zɛ’an woo. Kã’a se’a ti mam yuun nyɛ tuunɛ wa poan la ayima dela se’em ma’a ti mam yuun seke mabipɔka ayima yu’urɛ n de Linda Cole. Pooren, a yuun nyaa dela mam pɔɣa.

Linda yuun kɔ’ɔn tulegera mɛ na’am mɔɔlegɔ tuuma la poan ge me tara Baabule zamesegɔdoma zo’e zo’e. Linda dela nɛremama, nɔŋɛ nɛreba ge me bɔ’ɔra yɛri yɛri. A ma yu’urɛ dela Goldie. Goldie yuun tari la sakerɛ. Pɔsega la, Linda sɔ Allen yuun ka boti yelemɛŋɛrɛ la. A yuun pɔsɛ giisa ba mɛ ge Goldie yuun kelum tara Linda la a suurɔ John la Gordon kena zamesegɔ mɛ ge me pa’ala ba ban wan mɔɔla se’em. Yuuma zo’e zo’e pooren, Allen yuun nyaa dela Yehowa Sɛɛradaana ge kɔ’ɔn tulegera tansugere la poan.

Yuun 1965 poan, ba yuun loe mam mɛ ti n keŋɛ Na’am Tuuma Sukuu n boi Canada Bethel ti ba ta kumesɛ mam. Mam n yuun boi sukuu la poan la, ba yuun bo mam la gɔŋɔ ti n gulesɛ ta’an keŋɛ Gilead sukuu. Mam yuun ka makɛ ti’isɛ ti mam wan nyaŋɛ tum satiŋa na’am yetɔɣum yalegerɛ tuuma ge mam yuun kelum gulesɛ gɔŋɔ la tisɛ mɛ. Mam yuun boi la kilaasi sɛka n pa’asɛ 42 la poan. Sɛba n yuun pa’ali tɔ Gilead sukuu la poan la yuun ni gulesɛ la ton mɔɔri se’em la bo to. Pɔsega la, ba yuun kpemese mam giila ti n tiregɛ zamesɛ tigere la yɛla soŋa soŋa. Mam yuun nan dela yuun 21. Bala la, ban yuun ka’am mam se’em la kɔ’ɔn nara mɛ.

Gilead sukuu yuun laɣum pa’alɛ tɔ ton wan tɔɣera se’em walesi la TV zuo ge me mina ton wan tɔɣera se’em bɔ’ɔra lasebaarɛdoma. Mam puurɛ yuun pee mɛ la mam zameseri yele ana wa la. Ge mam yuun ka mi ti mam zameseri yelese’a la wan ta soŋɛ mam beere sa’am. N wan yele ya sɛla n sɔi ti n yele bala.

BA YUUN TARI MAM KEŊƐ LA SENEGAL

Mam n yuun ba’asɛ Gilead sukuu la, dabesa fii pooren ti ba yuun yeti mam la Michael Höhle keŋɛ Senegal n boi Africa ta laɣum tuna satiŋa na’am yetɔɣum yalegerɛ tuuma la. Sankaŋa la, na’am mɔɔlegɔdoma n paɛ wuu 100 n yuun boi tiŋa la poan.

Tomam n yuun boi Senegal la, ŋmaresi pooren ti tigere yile la yuun yele mam ti n ni wa’an bilam na tum daayinɛ bakwai la poan. Tigere yile la yuun dela ɔfisi yiŋa n boi zɛ’an ti satiŋa na’am yetɔɣum yalegerɛdoma la kɛ̃’ɛra. Ɔfisi la yuun ka ba’ɛ karegɛ ge Mabia Emmanuel Paterakis, se’em n yuun biseri tigere yile la sankaŋa la yuun ni kɔ’ɔn tiisa mam ti tigere yile la ze’ele bo la Yehowa tigere la tiŋa la poan. Saŋa kayima, Mabia Paterakis yuun yeti to gulesɛ gɔŋɔ ta kpemese satiŋa na’am yetɔɣum yalegerɛdoma la giila. Sankaŋa la, la yuun daɣɛ naana ti ho ta’an gulesɛ gɔŋɔ ge eŋɛ photocopies. Bala la, tomesi n yuun kɔ’ɔn dekɛ typewriter gulesɛ gɔnɔ la woo. La yuun dela tunkãtɛ paa se’ere n sɔi la, la yuun nari ti to ma’ɛ tomea gulesɛ soŋa la wan eŋɛ se’em ti to kan gulesɛ sɛla tue!

Mam n yuun tum ba’asɛ yea kula yu’uŋo kuŋɔ la, Mabia Paterakis yuun bo mam la gɔŋɔ. A yuun yeti, “David, tigere la gulesɛ la gɔŋɔ bo ho.” Pooren, mam n yuun yu’ɛ la, mam nyɛ la gɔnseto ti mam mea yuun laɣum gulesɛ la ayima! Yele wa yuun basɛ ti mam baŋɛ ti la nari ti n tara gilema zo’e zo’e bɔ’ɔra Yehowa tigere la, la ka pakɛ la tigere yile la n pɔ’ɛ bii karegɛ zuna se’em.

Mam yuun nyɔɣɛ la mabisii zo’e zo’e zɔtɔ tansugere la poan. Saŋa zo’e zo’e, mam yuun ni keŋɛ la ba zɛ’an Asibidaarɛ zaanɔɔrɛ ta naɛ la ba ti to sɔsɛ. La yuun ni dɛna la pupeelum ma’a! Mam la mabiisi wa kelum sɔsera mɛ. Senegal tiŋa nɛreba n tɔɣeri French la basɛ ti mam yuun zamesɛ la French yetɔɣum. Wana wa soŋeri mam mɛ se’em ma’a ti mam ni kaara bisera tigere yila la.

Yuun 1968 poan ti mam la Linda yuun kɔ’ɛ puti’irɛ ti to eŋɛ to pɔɣedire. Mam yuun dekɛ la ŋmaresi zo’e zo’e ɛ tuuma Senegal tiŋa poan, lan wan eŋɛ se’em ti n san ta di en, to wan nyaŋɛ tuna sore ŋmɛ’a tuuma la. Ge to yuun ka nyɛ tuunɛ se’ere n sɔi la, ba yuun ka dekeri saama ba tuuma zɛ’ɛsi. Pooren, mam yuun lebe la Canada tiŋa ta di Linda. Tigere la yuun yeti to keŋɛ Edmundston, New Brunswick, n de tinpika n boi Quebec ta tuna sore ŋmɛ’a tuuma n boi de to’ore.

MAM YUUN TUM LA SORE ŊMƐ’A TUUMA NEW BRUNSWICK LA QUEBEC TISI POAN

Na’am mɔɔlegɔdoma yuun ka boi tiŋa la poan ge ti Baabule zamesegɔdoma la me ka zo’e. Katolik pu’usegɔ yuun kɔ’ɔn bɔna la zɛ’an woo. Ba yuun gulesɛ labelɛ nɛra woo yire ti to ka boti Yehowa Sɛɛradoma kala. Sankaŋa la, ba san gulesɛ bala labelɛ nɛra yire, la ni ka ba’ɛ dɛna ninmu’urɛ wuu zina beere wa. Bala la, to yuun kɛ̃ yire woo poan mɛ. Bakwai woo, Katolikdoma basɛba yuun ni gulesɛ lasebaarɛ gɔŋɔ poan yeti: “To ɛ ya Yehowa Sɛɛradoma la ge sa’ɛ ba.” To yuun dela to naasi ma’a n boi Edmundston tiŋa poan. La yuun dela mam la n pɔɣa Linda la Victor Norberg la a pɔɣa Velda. Bala la, to yuun mi ti ba tɔɣeri la tomam yele!

Mam kan makɛ tamɛ sansɛka n deŋɛ nɛŋa ti kaarɛ bisegadaana yuun wa’ana kaɛ to bisɛ la. Bakwai la n yuun ba’asɛ la, a yuun yeti, “Ya nan kelum bɔna kala wa la, sɛla ti ya wan ta’an eŋɛ dela ya soŋɛ nɛreba la ti ba tee ban ti’iseri Yehowa Sɛɛradoma yele se’em la.” Yele wa yuun kɔ’ɔn bɔna la to puti’irɛ poan. La me yuun soŋɛ to mɛ paa! Fii fii, nɛreba la yuun baŋɛ ti Yehowa Sɛɛradoma siregeri la bamea ge me bɔna ba to’ore la Katolikdoma la n zɛ̃keri bamesi la. Nananawa ba nyaa tari la tansugere pika tiŋa la poan.

Ton yuun boi tiŋa la poan paɛ wuu yuunɛ la, ba yuun yele to ti to keŋɛ ta soŋɛ tansugere ayima n boi Quebec tiŋa. Mabiisi la yuun nɔŋɛ nɛreba mɛ. To yuun kɛ̃ bim la ŋmaresi siyoobe ge nyaa keŋɛ ta tum kaarɛ tuuma la.

To yuun tum kaarɛ tuuma la yuuma 14, Quebec tiŋa. To puurɛ yuun pee mɛ! Na’am mɔɔlegɔ tuuma la yuun nyɛti la nɛŋa tɔlega. To yuun ni nyɛta nɛreba la ba deodoma za’a n laɣum zamesa Baabule la ge me bɔta ti ba muse ko’om!

TO TƐ̃RI TO MABIISI N TARI YELEMƐŊƐRƐ LA MƐ

Mabisɛba n kɛ̃’ɛri Canada tiŋa ge tɔɣera French yetɔɣum la mɔɔri mɛ. Ba nɔŋɛ la tuuma, tara pupeelum ge me tɔɣera yelemɛŋɛrɛ. Ge, la yuun ni daɣɛ naana ti ba sakɛ bo yelemɛŋɛrɛ la, se’ere n sɔi la basɛba deodoma yuun giiseri ba mɛ. Bunbilipaalesi basɛba dɔɣereba yuun ni yele ba ti, ba loe nyaa ba wan kelum zamesa la Yehowa Sɛɛradoma bii ba yese ba yire poan! Basɛba yuun kelum pu’usa la Yehowa, la ka pakɛ la ban giiseri ba la. Bisɛ Yehowa puurɛ n pee se’em la ba!

Mam boti n pɛ̃ɣɛ la sore ŋmɛ’adoma, la sore ŋmɛ’adoma n boi ba to’ore n yuun tuni Quebec tiŋa la, se’ere n sɔi la ba yuun mɔɔri mɛ paa. Ba yuun ze’ele la zɛ’ɛsi to’ore to’ore Canada tiŋa poan. Ba yuun zamesɛ la French yetɔɣum la Quebec nɛreba buuri yɛla, sɛla n sɔi la Quebec nɛreba zo’e zo’e yuun kɔ’ɔn dɔla la Katolik malema.

Tigere la yuun ni basɛ ti sore ŋmɛ’adoma n boi ba to’ore keŋɛ la zɛse’esi n zaaɛ ti na’am mɔɔlegɔdoma ka bɔna bim ta mɔɔla. Nɛreba la n yuun ka nɔŋɛ Yehowa Sɛɛradoma la zuo, la yuun ni kpe’em mɛ ti mabiisi la nyɛ bɔ’ɔ kan benti ba nyɛ tuuma. Ba san puɣum nyɛ bɔ’ɔ, ligeri la ni ba’ɛ zo’e mɛ ti nɛreyiŋa kan ta’an haɛ. Bala la, ba ni koŋe ge laɣum haɛ la zɛ’an ayina ti mabiisi la ba pɔɣeba laɣum kɛ̃’ɛra, lan wan eŋɛ se’em ti ba ta’an yɔɔra. Ba ta’an ni paɛ wuu mabiisi banii zɛ’an ayina poan. Mabiisi wa yuun ka de’eni la na’am mɔɔlegɔ tuuma la. Ba san nyɛ nɛra n boti yelemɛŋɛrɛ la, ba ni kɔ’ɔn tiregɛ mɛ soŋɛ en. Nananawa, Quebec tiŋa tari la na’am mɔɔlegɔdoma zo’e zo’e. Bala la, sore ŋmɛ’adoma wa zo’e zo’e nyaa keŋɛ la zɛse’esi n eeri na’am mɔɔlegɔdoma.

Ton yuun kaari tansuga la, saŋa zo’e zo’e to ni naɛ la bunbilipaalesi keŋɛ na’am mɔɔlegɔ Asibidaarɛ bulika. Bala yuun soŋɛ to mɛ ti to ta’an bɔkɛ yelese’a n daani ba. Bunbilipaalesi wa basɛba nyaa dela satiŋa na’am yetɔɣum yalegerɛdoma, ti basɛba me tuna tigere la tuuma ase’a.

Sankaŋa la, tansuga ase’a yuun ka tari ligeri n wan ta’an soŋɛ tɔ ti to da dia la petrol. Bala la, ŋmarega ta kiira la, ti to ligeri za’a ba’asɛ ya. To ni kɔ’ɔn dekɛ tomea delum la Yehowa se’ere n sɔi la eŋa ma’a n yuun mi lan ani to se’em. Yehowa me yuun ka malum basɛ tɔ. A yuun ni soŋɛ to mɛ ti to ta’an kaɛ tansuga la za’a.

MAM N YUUN ZAMESƐ SƐLA MABIISI BASƐBA ZƐ’AN

Mam n yuun boi Quebec la, to yuun tari la yɔ’ɔ ti to mɔɔla walesi poan, TV zuo, la lasebaarɛ gɔnɔ poan. Bala la, mam puurɛ yuun pee mɛ la mam n yuun zamesɛ yele ana Gilead sukuu poan la. Saŋa zo’e zo’e la, ba yuun ni basɛ ti mam naɛ la Léonce Crépeault tuna. A me yuun dela kaarɛ bisegadaana ge me mina eŋa n wan ta’an sɔsera se’em la lasebaarɛdoma. A san ni seke nɛrezure n tuni lasebaarɛ tuuma, a ni sirege la amea yeti: “Sunkpe’ene, mam la n zɔ wa yeen mɔɔla la Naayinɛ yɛla. Ba tum to me na ti to wa’ana mɔɔlɛ bo nɛreba ti, Yehowa Sɛɛradoma yeti ba eŋɛ la laɣesegɔ ge tomam ka ba’ɛ mina walesi la TV yɛla. Bala la, ho san wan nyaŋɛ soŋɛ tɔ, to puurɛ wan pee.” Léonce n yuun siregeri amea se’em la zuo, la yuun dela naana ti lasebaarɛdoma la soŋɛ tɔ.

Tigere yile la yuun tum la mam la Mabia Glen How, ti to keŋɛ ta maalɛ kootin yɛla n kpe’em ti lasebaarɛdoma wan ta tɔɣɛ de yele. Mabia Glen How yuun dela to tigere la lɔyadoma la ayima. Mam n yuun zamesɛ yelese’a Gilead sukuu, la mam n yuun naɛ la Mabia Léonce tum la yuun soŋɛ mam mɛ paa. La yuun dela yɔ’ɔ kãtɛ bo mam, la mam yuun naɛ la Mabia How tum la. A yuun san ni tɔɣera pɔ’ɔra Yehowa tigere la kootin, a ni ka zɔta dabeem. Ge sɛla n gaŋɛ za’a dela, a yuun nɔŋɛ la Yehowa.

Yuun 1985 poan, ba yuun yeti to keŋɛ ta kaɛ tansuga se’a n lɛm mam sɔ n kɛ̃’ɛri zɛ’an la, lan wan eŋɛ se’em ti to ta’an bisera en. La boi la Canada zaɣenɔya bɔba. Ŋmaresi sitã pooren ti a yuun ki. To yuun kelum kaara la tansuga n boi Canada zaɣenɔya bɔba ta paɛ yuun 1989. La yuun eŋɛ to la pakerɛ la ban yuun bo to gɔŋɔ ti to keŋɛ ta tuna United States Betel la. Bala la, to yuun basɛ kaarɛ tuuma la mɛ ge keŋɛ Betel. To yuun dekɛ la yuuma 19 tum kaarɛ bisega tuuma la. Yuun aŋa za’a poan, to yuun kɛ̃ la mabiisi zo’e zo’e yɛa poan ti ba ni saam tɔ ti to puurɛ pee!

TO NYAA BOI LA UNITED STATES BETEL

Ton yuun paɛ Brooklyn la, ba yuun basɛ ti mam tuna la Na’am Tuuma Wele la poan. Mam kan malum tamɛ ban yuun kumesɛ mam se’em bilam la. Yele deyima ti mam zamesɛ bilam dela, n ni viisɛ baŋɛ yɛla soŋa. Yuun 1998 poan, ba yuun basɛ ti mam tuna la Gulesegɔ Wele la poan. Mam kelum tuna la bilam ge me zamesa yɛla zo’e zo’e. Mam yuun nyɛ la yɔ’ɔ soŋera Mabia John Barr yuuma zo’e zo’e. Sankaŋa la, eŋa n yuun biseri Gulesegɔ Bisegadoma la tuuma. Mam kan malum tamɛ mam la eŋa n yuun tuni ti a yuun kumesa mam se’em la. A yuun kɔ’ɔn tɔɣesa la Yezu Krista.

La dela pupeelum la mam n naɛ la mabiisi n siregeri bamea tuna Gulesegɔ Wele wa poan la. Daarewoo ba ni zusɛ la Yehowa ti a soŋɛ ba ti ba ta’an tum ba tuuma la. Ba me mi ti ba san nyaŋɛ tum tuunɛ, la dela Yehowa vo’osum la n soŋɛ ba ge daɣɛ bamea paŋa.

Mam la Linda me nyɛ la yɔ’ɔ keŋɛ ta kaɛ mabiisi n boi tisi 110 poan. To san ni keŋɛ bala, to ni nyɛ satiŋa na’am yetɔɣum yalegeredoma, Tigere Yile Bisegadoma, la tɛm woo na’am tuumadoma n tari nɔŋerɛ se’em. To me ni nyɛ na’am mɔɔlegɔdoma n tuulegeri ge tara yelemɛŋɛrɛ pu’usa Yehowa se’em, hali la yaarɛ, zaberɛ la nɔŋɔ poan. Bisɛ Yehowa n nɔŋɛ ba se’em!

Linda kɔ’ɔn soŋera mam mɛ ti la dɛna naana ti n tuna n tuuma. A nɔŋɛ la nɛreba ge ni kɔ’ɔn tiregera ti a bisɛ eŋa n wan eŋɛ se’em ta’an soŋɛ ba. La me ni dɛna la naana bɔ’ɔra en ti a pɔsɛ sɔsega hali a san ka bɔna na’am mɔɔlegɔ poan. A nyaŋɛ soŋɛ nɛreba zo’e zo’e mɛ ti ba zamesɛ baŋɛ Yehowa ge me soŋɛ sɛba n ma’ɛ ti ba le pu’usa Yehowa. Linda kɔ’ɔn dɛna la bo’olum ti Yehowa dekɛ bo mam! Ton nyaa kuregɛ la zuo, mam la Linda puurɛ ni pee mɛ, bunbilipaalesi san ni soŋera tɔ.—Mr. 10:​29, 30.

Mam san ni ti’isɛ yelese’a n eŋɛ yuun 80 n tole la, mam puurɛ n ni pee. La kɔ’ɔn ana mam wuu yuumadaana la n yuun yele se’em la. A yuun yeti: “Yenɛ, mam bonbilomen ha te ho pa’alɛ mam, tara tara la zina, mam kelom mɔɔla la ho nyalematooma la.” (Ym. 71:17) Mam lu n suure ti n kɔ’ɔn ita la bala n vom dabesa za’a.