Bunbilipaalesi​—Ya Kɔ’ɔn Tuna “Sɛla N Ane Soŋa”

Gɔnseko ti tuntuna Paul yuun gulesɛ bo Titus la, Paul yuun yele bunbilipaalesi la ti, ba nari ti ba tiregɛ la ba tuna “sɛla n ane soŋa” sɛla woo poan. (Tit 2:6, 7) Pooren, a yuun yeti Yezu wan pee Yehowa nɛreba la ti ba ana fa’a ta’an tuna “sɛla n ane soŋa.” (Tit 2:14) Tuunse’ere n ani soŋa wa dela ba mɔɔla ge pa’ala Naayinɛ Na’am la yɛla. Ho san dɛna la bunbilipaalega, ho wan ta’an dekɛ ho paŋa la tum sore ŋmɛ’a soŋera tuuma la bii ho dɛna sore ŋmɛ’adaana?​—Mag 20:29.

Ho san bɔta ti ho dɛna sore ŋmɛ’adaana, malum ŋmɛrisɛ ho yɛla soŋa soŋa ta’an tum dɛ. (Lu 14:28-30) Makerɛ n wana, ho wan ta’an diisa homea se’em ma’a ti ho tuna tɛm woo na’am tuuma la? Ho wan eŋɛ la wani ta’an dekɛ awa zo’e zo’e tum wuu la nari ti ho nyɛ se’em ŋmarega woo poan la? Zusɛ Yehowa ti a soŋɛ hɔ. (Ym 37:5) Hon la ho dɔɣereba sɔsɛ la sɛba n nyaŋɛ tum tɛm woo na’am tuuma la. Tiregɛ la ho ta’an tum hon dekɛ sɛla biŋe ho nɛŋa la. Yehowa wan ba’asum kã bo ho la hon mɔɔri a tuuma poan se’em la!

BISƐ BUNBILIPAALESI N NA’ASERI YEHOWA VIDIYO LA GE NYAA LEBESE SOKERE ANA WA:

• Bem yeledaaŋɔ ti basɛba tiregɛ ze’ele de poan ta’an tum sore ŋmɛ’a tuuma la ge ba eŋɛ de la wani?

• Dɔɣereba wan eŋɛ la wani ta’an soŋɛ ba kɔma ti ba tum sore ŋmɛ’a tuuma la?

• Beni n sɔi ti hon wan maasum tuna na’am tuuma la se’em la yele pakɛ?

• Tansugere la wan eŋɛ la wani ta’an kpemese ge soŋɛ mabia n de sore ŋmɛ’adaana?

• Bem kã’a ti sɛba n de sore ŋmɛ’adoma la nyɛta ba vom poan?