Ho Wan Bɔta Ti Ho Baŋɛ Yelemɛŋɛrɛ La?

BEM yelemɛŋɛrɛ? Yelese’a n de ninmɔ’ɔrɛ ti nɛreba zo’e zo’e tɛ’ɛsa ba zi’irigo ze’an. Daanse’erɛ ho tabelɛ tɛ’ɛsɛ soke ana wa:

• Naayinɛ sirin fabelɛ to yele?

• Zaba la namesegɔ wan malum tole?

• Sɛba n ki la bo la bɛ?

• To wan le nyɛ sɛba n ki la?

• N wan zusɛ la wani ti Naayinɛ kelese ma?

• N wan eŋɛ la wani nyɛ pupeelum n zi’irigo ze’a?

Ho wan soke la ane nyɛ lebesego bo yele ana wa? Ho san soke nɛreba tɔka tɔka, ho wan nyɛ lebesego n daɣi buyina. Hali ho san soke keendoma, bii pu’usegɔ nɛŋadoma ho wan kelum nyɛ la lebesego n de tuntula. Lebesego ana wa ta’an ana soŋa ge dabesa ayi poan ba ne tam ba yele mɛ.

Gɔŋɔ kuyima n boe tara lebesego n ane soŋa. Ku ka parine. Yezu Krista yun zusɛ bo Naayinɛ yeti: “Ho yetɔgɔm dela yelemɛŋɛrɛ.” (Yon 17:17) Zina beere wa to miti Yetɔɣum wa dela Naayinɛ Gɔŋɔ. Gɔŋlaɣese wa poan ho wan nyɛ Baabule lebesego n de yelemɛŋɛrɛ ge niɛ peelime bo soke ana wa.

Naayinɛ Sirin Fabelɛ To Yele?

SƐLA ZUO TI BA NI SOKERA: To bola ŋmɛlema la putotuuma teŋgɔŋɔ poan. Pu’usegɔ zo’e zo’e pa’alɛ ti Naayinɛ n basɛ ti namesegɔ paara to.

BAABULE LA N PA’ALƐ SE’EM: La daɣi Naayinɛ n basɛ ti be’em paara to. Yob 34:10 yeti: “[Naayinɛ] ka tone be’em Gaŋɛ Zan’an [Naayinɛ] wa ka tuure.” Naayinɛ tare la putɛsonɛ bɔ’ɔra asaaleba. Bala n sɔe ti Yezu yun pa’alɛ to, ti to pu’usa yeti: “To sɔ’ n boe saazuo ha, . . . ho sɔ’ɔlom wa’ana, ho sunboolom tom teŋa wa zuo wo lan ane se’em saazuo ha la.” (Matu 6:9, 10) Naayinɛ nɔŋɛ to mɛ zo’e gaŋɛ n sɔe ti a basɛ ti a yetɔɣum la wa’an sira na la.—Yon 3:16.

Le kaalɛ Pin’ileŋɔ 1:26-28; Yames 1:13; la 1 Peter 5:6, 7.

Zaba La Namesegɔ Wan Malum Tole?

SƐLA ZUO TI BA NI SOKERA: Zaba kuure nɛreba mɛ zo’e zo’e. Namesegɔ mi paare to za’a waabi mɛ.

BAABULE LA N PA’ALƐ SE’EM: Naayinɛ tɔɣɛ pa’alɛ saŋsɛka ti suma’asum wan bɔna to teŋa wa za’a poan. A saazuo sɔ’ɔlum Na’am la poan nɛra kanle “tɛn’ pɛɛma la ka tadaana.” Ge ba wan “vaɛ ba zaba so’ahe la kana tee kure kunya la leehe.” (Isaiah 2:4) Naayinɛ wan yese ŋmɛlema tuuma la namesegɔ basɛ. Baabule la tɔɣɛbiŋɛ yeti: “Te n wom te konkore tɔgɔra kekeko na’am gɔŋɔ la poan yeti, [Naayinɛ] nya bo mɛ la nɛreba. A wan bɔna la ba ge te bama me wa dɛna a nɛreba. [Naayinɛ] mɛŋa n wan bɔna la ba ge dɛna ba [Naayinɛ]. A wan duuhe ba nintam ba nini poan bahɛ. Kum, la sunsagaŋɔ la kɛlega bii iŋduŋa ka maan bɔna. Yelekɛgɛhe [la zina wa ŋmɛlema tuuma la namesegɔ] la mɛlom ya.”—Liligere 21:3, 4.

Le kaalɛ Yooma 37:10, 11; 46:9; la Mikah 4:1-4.

Sɛba N Ki La Bo La Bɛ?

SƐLA ZUO TI BA NI SOKERA: Teŋgɔŋɔ wa pu’usegɔ zo’e zo’e pa’alɛ ti nɛra san ki a sea ne yese mɛ ta bɔna ze’a. Nɛreba ba sɛba tɛ’ɛse ti sɛba n ki la wan nyaŋɛ daam sɛba n vɔe la, bii Naayinɛ wan nyɔ tuunbe’erodoma teŋmɔlega.

BAABULE LA N PA’ALƐ SE’EM: Nɛra san ki a ka boe ze’a ze’a. Pa’ala 9:5 yeti: “Kum pon ka mina sɛsɛla.” Sɛba n deŋɛ ki la ka tare nɔŋerɛ, ba ka tare mi’ilum, ba me kan nyaŋɛ daam—bii soŋɛ—sɛba n vɔe la.—Yooma 146:3, 4.

Le kaalɛ Pin’ileŋɔ 3:19 la Pa’ala 9:6, 10.

To Wan Le Nyɛ Sɛba N Ki La?

SƐLA ZUO TI BA NI SOKERA: To boti tomam la sɛba woo ti to nɔŋɛ ba yɛla la, vɔna daarewoo dita nyɛlum la pupeelum. Bisɛ la ane soŋa se’em ti to wan le nyɛ to sɔɔrɔ sɛba n ki la.

BAABULE LA N PA’ALƐ SE’EM: Nɛreba zo’e zo’e n ki la wan le nyɛ kum isigere. Yezu yun tɔɣɛ biŋɛ yeti: “Seba woo ti ba pin’ ba yɔɔrɔ poan la . . . wan ihege.” (Yon 5:28, 29) Wuu Naayinɛ putɛ’ɛrɛ n yun puɣum dɛna se’em la, sɛba woo n nyɛ kum isigere la wan nyɛ yɔ’ɔ zi’irɛ paradiisi poan. (Luke 23:43) Pu’ulumbiŋɛ dena wa dela imma’asum la daarewoo nyɔvɔrɛ bɔ’ɔra sɛba n nane en. Yooma 37:29 yeti: “Tontɔɔdoma la n wan to’e teŋa la bɔna ka poan yɛ’ɛha.”

Le kaalɛ Yob 14:14, 15; Luke 7:11-17; la Tooma 24:15.

N Wan Zusɛ La Wani Ti Naayinɛ Kelese Ma?

SƐLA ZUO TI BA NI SOKERA: Nɛreba n boe pu’usegɔ buri buri woo zuse Naayinɛ mɛ. Ge ba zo’e zo’e tɛ’ɛse ti a ka kelese ba pu’usegɔ.

BAABULE LA N PA’ALƐ SE’EM: Yezu yun pa’alɛ ti to san pu’usa to da tara yele deyina ma’a taɣesa. Yezu yun yeti: “Ya han soha Na’ayenɛ, da tare ya yelese’a n ka tare vɔnrɛ kɛn’ɛra bini.” (Matu 6:7) To san bɔta ti Naayinɛ wom to zusega, la nari ti to doose sarɔɔ seko ti a pa’ala la. To san wan nyaŋɛ eŋɛ bala, see to zamesa Naayinɛ n bote se’em ge pu’usa dɔla bala. Yia Yon 5:14 pa’alɛ ti: “Sɛla te to sohɛ la han dɛna [Naayinɛ] sunboolom, a kelehere to” mɛ.

Le kaalɛ Yooma 65:2; Yon 14:6, 14; la 1 Yon 3:22.

N Wan Eŋɛ La Wani Nyɛ Pupeelum N Zi’irigo Ze’a?

SƐLA ZUO TI BA NI SOKERA: Nɛreba zo’e zo’e tɛ’ɛse ti ho san dɛna bundaana, hon nyɛ yu’urɛ bii hon ane soŋa wan basɛ ti ho puurɛ pee. Bala zuo, ba zɔte ɛɛra la yele ana ge ka nyɛta pupeelum.

BAABULE LA N PA’ALƐ SE’EM: Yezu yun pa’alɛ sɛla wana mɔpi n tari pupeelum kena na. A yun yeti: “Som wan bɔna la sɛbadoma n baŋɛ te ba dagɛ tontɔɔdoma la.” (Matu 5:3) To wan baŋɛ Naayinɛ, la a putɛ’ɛrɛ n de se’em bo asaaleba la ma’a n wan soŋɛ ti to nyɛ yelemɛŋɛrɛ pupeelum. Mi’ilum bumɔ bola Baabule la poan. Yelemɛŋɛrɛ mi’ilum wa wan soŋɛ ti to bɔkɛ yelese’a n de ninmɔ’ɔrɛ to zi’irigo ze’a. To san dekɛ Baabule ka’aŋɔ la tuna tuuma to wan nyɛ vom n tare vɔɔrɛ.—Luke 11:28.

Le kaalɛ Magaha 3:5, 6, 13-18 la 1 Timoti 6:9, 10.

Sokere bayoobe ma’a n bala ti Baabule la bo bɔkɔre wana gi’a gi’a. Ho wan bɔta ti ho baŋɛ gaŋɛ bala? Nɔkpe’ene kae ti ho laɣum pa’asɛ la “sɛbadoma n baŋɛ te ba dagɛ tontɔɔdoma la,” ge bɔta ho baŋɛ Baabule la n pa’alɛ yela a se’a pa’asɛ. Daanse’ere ho tɛ’ɛse soke ana wa: ‘Naayinɛ san tɛra to yele bene n sɔe ti a basɛ ti namesegɔ la mɛlesegɔ bɔna la to bala? N wan eŋɛ la wani ti mam la n deodoma tara pupeelum to zi’irigo ze’a?’ Soke ana la a se’a zo’e zo’e ti Baabule la dekɛ bɔkerɛ n kɛ̃’ɛ̃re suure bɔ’ɔra to.

Ge nɛreba zo’e zo’e zina beere wa tare la putɛ’ɛra ayi ayi la Baabule kaalegɔ. Ba bisɛ ti a dela gɔŋkãte ge mɛ kpe’em ti ba kan ta’an bɔkɛ. Ho wan bɔta ti ho nyɛ bɔkɔrɛ Baabule la poan? Yehowa Sɛɛradoma tari la sarɔtɔ toyi n wan ta’an soŋɛ ho.

Sarɔsɛko n deŋɛ nɛŋa dela Yelesoma N Ze’ele Naayinɛ Ze’an Na! ti ba maalɛ ti ba soŋɛ nɛreba ti ba nyɛ Baabule la n dekɛ lebese’a bo sokese’a yela n pakɛ la. Sarɔsɛka n pa’asɛ buyi la dela zaŋa Baabule zamesegɔ. Yehowa Sɛɛradoma ayima wan ta’an wa’an ho yire na bii zɛsɛka n nari bo ho ti ya dekɛ saŋa wana fii wa zamesɛ Baabule la bakwai woo ge ti ho kan yɔ sɛsɛla. Nɛreba tustusa n boe teŋgɔŋɔ wa poan nyɛ nyɔ̃ɔ̃rɔ mɛ yese Baabule zamesegɔ wa. Ba zo’e zo’e sakɛ sira bo ge nyaa ne kɔ’ɔn yeti: “Mam nyɛ yelemɛŋɛrɛ la!”

Dena wa dela tuulum bɔno. Yelemɛŋɛrɛ Baabule mi’ilum faare to yesɛra la kolkpatuuma, tuunburabura, la dabeem poan. La bɔ’ɔrɛ to la beesa’am putɛ’ɛrɛ, vom n tare vɔɔrɛ la nyɛɛma. Yezu yun yeti: “Ya wan baŋɛ yelemɛŋɛrɛ la, . . . la wan fan’ ya bahɛ.”—Yon 8:32.