Tara Sukpe’ene La Yelemɛŋɛrɛ Wuu Benaiah

Benaiah yuun dela soogɛa n tari sukpe’ene ge me yuun tum bo Naba David la Naba Solomon. Benaiah yuun dela malemadaana dayua. Malemadoma la Levidoma yuun ka keni zaberɛ ge Benaiah yuun keni zaberɛ mɛ ge me tara sukpe’ene paa. Makerɛ, a yuun sige la lua poan ta ku gbeɣenɛ. A me yuun le ku la soogɛa n de buraa waɣelɛ. David yuun tɔresɛ Benaiah mɛ paa ge basɛ ti a dɛna sɛba n gu’uri en la nɛŋadaana.—2 Sa. 23:​20-23.

Benaiah yuun kelum tara la yelemɛŋɛrɛ bɔ’ɔra David se’em ma’a ti Absalom la Adoniya yuun eŋɛ kpenkpasi la David la. (2 Sa. 8:18; 15:18; 1 Na. 1:8) Hali la David n yuun ta kuregɛ la, Benaiah yuun kelum tara la yelemɛŋɛrɛ bɔ’ɔra en ge me soŋɛ ti ba bobe Solomon na’am. (1 Na. 1:​32-40) La boi bim ti nɛreba basɛba yuun ka tari yelemɛŋɛrɛ bɔ’ɔra Yehowa, la nadoma sɛba ti a loe la ge Benaiah yuun tari yelemɛŋɛrɛ bɔ’ɔra ba mɛ.

Tomam me nari ti to tara sukpe’ene lan wan eŋɛ se’em ti to ta’an zabɛ la Sitaana la a nɛreba la. To me nari ti to lu to suure dɔla Yehowa pa’alegɔ saŋa woo. (Ep. 6:11; 1 Pe. 5:​8, 9) Hali nɛreba basɛba san puɣum basɛ Yehowa pu’usegɔ, to wan kɔ’ɔn ana tapilapi la Yehowa ge tara sakerɛ ti a wan kã bo to.—2 Sa. 22:26.