Sɛla N Wan Soŋɛ Pɔɣese’esi Ti Ba Vɛ̃ɣena Ba

Zaseŋɔ yele la zuo n de “Baabule La Yeti Bem La—Pɔɣesi N Nari Ti Ba Bɔna Fai La” ti la bɔna jw.org la n pɔsɛ tɔɣɛ sɛla n bala. Link n boi zaseŋɔ la ki’ileŋɔ ti ho wan ta’an di’e ve’e ku PDF poan ge nyaa printɛ. Ho me ta’an bɔɣelɛ gɔŋɔ la. Mabipɔka ayima n boi United States ti a yu’urɛ dɛna Stacy yeti, “Zɛ’an kayima n bo to gingilega la poan ti pɔɣese’esi ti ba vɛ̃ɣena ba la ni zɔ keŋɛ bim ta bɔna fai. Mam daa printɛ la gɔnɔ la basɛba ti mam la mabipɔka ayima tari gɔnɔ wa keŋɛ bim.”

Nɛra ayima n tuni zɛ’an la poan daa yele mabiisi la yeti a boti la gɔnɔ la basɛba pa’asɛ ti a dekɛ bo pɔɣesi la n kɛ̃’ɛri bim la. Bala la, mabipɔɣesi siyi n daa tari gɔnɔ wa 40, la jw.org contact kaatɛdoma 30 ta bo ba. Pooren, mina n biseri zɛ’an la daa yeti a wan bɔta ti Yehowa Sɛɛradoma pa’alɛ pɔɣesi la n kɛ̃’ɛri bim la ban wan zamesa Baabule la se’em.

Stacy daa le doose la mabipɔɣesi siyi keŋɛ zɛ’an kayima me n ani bala. Sɛba n tuni zɛ’an la poan la daa to’e gɔnɔ la mɛ ge yeti ba wan le ɛɛra basɛba pa’asɛ. Tuntuneba la ayima daa yeti, “Gɔŋɔ wa wan soŋɛ pɔɣese’esi n boi kalam wa. To kɔ’ɔn ɛɛra la gɔntuna taaba.” Mabipɔɣesi la n daa lebe zɛ’an la poan la, pɔɣesi la basɛba daa yeti bamam boti la ba nyɛ Baabule zamesegɔ la n ani se’em ge ti ba poan bayi yeti ba wan bɔta ti ba keŋɛ bakwai la ba’asegɔ zamesegɔ Na’am Pu’usegɔ Deo poan.

Stacy yeti: “La eŋɛ to la pakerɛ la nɛreba puurɛ n pee la gɔŋɔ wa se’em la. Ho san printɛ ge bɔɣelɛ ku, ho wan ta’an dekɛ ku tɔɣɛ Naayinɛ Na’am la yɛla bo pɔɣesi ti ba vɛ̃ɣena ba. Nɛreba puurɛ n pee la gɔŋɔ wa se’em la kɛ̃ la to suure. To kɔ’ɔn ana la lɛɛ ti to nyɛ Yehowa n wan soŋɛ to se’em ti to mɔɔlɛ yelesoma la bo pɔɣesi wa.