Sokere Daka
◼ La nari ti na’am mɔɔlegɔdoma tara Intanɛt dita sɛɛra bii ita Baabule zamesegɔ la nɛreba n boi teŋa ayima sa?
Na’am mɔɔlegɔdoma basɛba doose la Intanɛt poan nyɛ Baabule zamesegɔdoma zo’e zo’e teŋse’a ti mabiisi ka zo’e bii zɛ’an ti ba gu to na’am tuuma la. Basɛba nyaŋɛ eŋɛ bala mɛ ti la ze’ele. Ge la dela dɛŋa, na’am mɔɔlegɔdoma san dekɛ ba e-mail bo saama bii sɔsera la ba Intanɛt poan. (Bisɛ July 2007 To Na’am Tuuma solemiine poan, gɔn. 3.) To nɔɔ boti la to basɛ ti Na’am yelesum la paɛ putɛsonɛdoma ge bala me ta’an basɛ ti mabia ta naɛ la nɛreyooro n de wuu sɛba n yelege bamea la sɔsa. (1 Kor. 1:19-25; Kol. 2:8) Leyɛ’ɛsa, zɛse’esi ti ba gu Na’am tuuma la, to san sina ge dɔla Intanɛt poan tɔɣera bɔ’ɔra teŋa la nɛreba ba kpɛ’ɛndoma la ta’an baŋɛ. Sarɔkuna ta’an basɛ ti mabiisi la bɔna dɛŋa poan. Bala la, na’am mɔɔlegɔdoma ka tari sore ti ba doose Intanɛt poan mɔɔla yelesoma la bɔ’ɔra teŋa kayima nɛreba.
San daɣena tigere yile la n bo sore, saana san ze’ele teŋa kayima wa’ana ti to di sɛɛra bo en ti a bɔta a baŋɛ yelemɛŋɛrɛ la, to da kelum zamesa en a san lebe a teŋa. Sɛla n nari ti to eŋɛ dela to pa’alɛ eŋa n wan eŋɛ se’em nyɛ tigere yile la n boi a teŋa la bii a dekɛ jw.org tum tuuma. To me ta’an le yele en ti a keŋɛ to Na’am Pu’usegɔ Deo sɛka n lɛm en. To ka tari Na’am Pu’usegɔ Deto tisi a se’a poan. Nɛra la san bɔta ti Yehowa Sɛɛradoma wa’an a zɛ’an, to ta’an gulesɛ Please Follow Up (S-43) la bo tansugere gɔngulesa la ti eŋa me doose jw.org poan dekɛ tisɛ. Tigere yile sɛka n biseri na’am tuuma teŋsɛka ti nɛra la kɛ̃’ɛra la, n mi teŋa la bɔŋa n ani se’em ge me wan ta’an soŋɛ nɛra la vo’osum poan.—Bisɛ June 2014 To Na’am Tuuma solemiine poan, gɔn. 7, la November 2011 To Na’am Tuuma solemiine poan, gɔn. 2.
To san zamesa nɛra nananawa ti a keŋɛ teŋa kayima bii to san dɔla la Intanɛt poan zamesa nɛra n boi teŋa kayima sa nananawa, la nari ti to doose ba pa’alɛ to sɛla saazuo wa. La nɔɔ ani soŋa ti to basɛ ti a puti’irɛ bɔna zamesegɔ la poan gura se’em ma’a ti mabiisi n boi teŋa la poan wan ta nyɛ en. La se’em mɛ, a san kɛ̃’ɛra teŋsɛka ti ba gu to tuuma la, la nari ti to nyɔkera tomea to san gulesa gɔnɔ bii dɔla telefon la Intanɛt poan tɔɣera bɔ’ɔra en.—Matu 10:16.