Gɔŋɔ N Ze’ele Tigere Zuo Bisegadoma La Zɛ’an

To Mabiisi:

Yezu yuun yele mabiisi la n boi Smirna tansugere la poan yeti: “Da tare ya dabeem la namehe seko n wan wa’ana la.” (Lil. 2:10) Yezu n yuun kpemese ba giila ti ba da zɔta dabeem la, me wan soŋɛ tomam n nyaa boi “[Daana] daarɛ la” poan la. (Lil. 1:10) To kɔ’ɔn bɔna la ‘biɣi biɣi’ dabesa poan. Ge to puurɛ pee mɛ la Yehowa nɛreba n boi tingole wa zɛ’an woo n tari sukpe’ene ge kelum ze’a kankaŋi ba birikinte poan la!—2 Tim. 3:​1-5.

To wan eŋɛ la wani kelum ze’a kankaŋi ge kan “vihe lebe poore” dabeem zuo? (Heb. 10:39) La ta’an kan dɛna naana bɔ’ɔra tɔ, se’ere n sɔi la nɛreba ta’an ta giisa tɔ bii ba mɛlesa tɔ. Ge to ta’an kelum kɔ’ɛ to puti’irɛ ti to wan pa Yehowa poore ge ita Eŋa n boti sɛla, hali dabeem bii valum san tara tɔ. Bem n wan ta’an soŋɛ tɔ?

Baabule la wan ta’an soŋɛ hɔ ti ho tara sukpe’ene. Ku pa’alɛ la Yehowa yamesi n yuun boi diimi sa n yuun eŋɛ se’em pa’alɛ ti ba tari sukpe’ene. Gɔŋɔ wa wan soŋɛ tɔ ti to baŋɛ ban yuun eŋɛ sɛla ge ti’isɛ de yele soŋa ta’an tɔɣesɛ ba. Ho san zamesa ba yɛla, ti’isɛ bisɛ ho bɔŋa la n ani se’em, la yeledaaŋɔ se’a n paari hɔ nananawa bii yelese’a n wan ta’an ta paɛ hɔ beere sa’am. Geele bisɛ Yehowa n wan ta’an soŋɛ ho se’em ti ho tara sukpe’ene. Leyɛ’ɛsa, bisɛ Baabule poan nɛreba wa n yuun tari sukpe’ene se’em la n wan ta’an soŋɛ ho se’em ti ho me ita yele ana wa:

Nana sɛla ti Yehowa bɔta. (Yam. 3:17) Ti’isɛ Yonatan yele la bisɛ. A yuun ta’an ti’isa ti eŋa n wan ta soe a sɔ dɛna naba. Ge Yehowa yuun tuɣum loe la David n nan de bia la. Yonatan yuun nam Yehowa n kɔ’ɛ a puti’irɛ se’em la mɛ ge me yuun soŋɛ David. Yonatan yuun sirum tari la yelemɛŋɛrɛ bɔ’ɔra Yehowa ge me tara sukpe’ene.

Dɔla Yehowa n pa’alɛ ho sɛla. (Heb. 11:​32-34) Ti’isɛ Hanania, Misael, la Azaria yele la bisɛ. Ba yuun zaɣesɛ ti ba kan ku’ure bo baɣerɛ. Ba yuun tuɣum lu la ba suure ti la san puɣum dɛna ti ba ki, ba wan kelum tara yelemɛŋɛrɛ bɔ’ɔra Yehowa.

Pa’ala nɛreba Yehowa, la Yezu yɛla. (Mt. 22:16) Ti’isɛ Saul n ze’ele Tarsus yele la bisɛ. Nɛreba basɛba yuun ti’isɛ ti Saul wan kelum soŋera ba ti ba mɛlesa Yezu podɔleba ge Saul yuun tee mɛ. A yuun tuɣum tara la sukpe’ene pa’ala ba Yezu yɛla.

To tari suure lua ti gɔŋɔ wa wan soŋɛ hɔ ti ho sakerɛ kpe’em pa’asɛ ge ti ho me tara sukpe’ene malum pa’asɛ. (Ym. 27:14) To mi ti ho wan kelum soŋera ho deodoma, la ho mabiisi ti ba tara sukpe’ene tɔɣera pɔ’ɔra Naayinɛ Na’am la. Yehowa me wan kã bo ho!