Gɔŋɔ N Ze’ele Tigere Zuo Bisegadoma La Zɛ’an

To Mabiisi:

Ton nɔŋɛ Naayinɛ la nɛreba la n sɔi ti to ‘ɛɛra podɔleba tisi woo poan ge musera ba ko’om.’ (Mt. 28:​19, 20; Mr. 12:​28-31) Nɔŋerɛ tari paŋa mɛ paa. Nɔŋerɛ wan basɛ ti to ta’an soŋɛ nɛresɛba n tari ‘putɛsonɛ ti ba nyɛ daarewoo nyɔvore.’—Tm. 13:48.

To yuun ni kɔ’ɔn bɔta la to tɛ̃ra na’am mɔɔlegɔ sɔsega la n gulesɛ se’em la ge me tara to gɔnɔ la bɔ’ɔra nɛreba. Ge nananawa, la nari ti to tiregɛ ta’an mina ton wan sɔsera se’em bɔ’ɔra nɛreba. Sɛla n wan pa’alɛ ti to nɔŋɛ nɛreba dela to sɔsera yelese’a n pakɛ ba. Bala pa’alɛ ti to ta’an tɛɛra to sɔsega ge me ti’isa nɛra woo n nɔŋɛ yelese’a. Gɔnlɛmlɛm wa wan soŋɛ to la wani ti to ta’an eŋɛ bala?

Gɔnlɛmlɛm wa tari la zaseŋɔ 12 n tɔɣeri halese’a n wan soŋɛ tɔ ti to ta’an tara nɔŋerɛ ge me ɛɛra podɔleba. Zaseŋɔ woo tari la Baabule yele n tɔɣeri halesonɛ ti Yezu bii yuun kɔbesɛka n deŋɛ nɛŋa Kristakɔma la yuun tara tuna tuuma ba na’am mɔɔlegɔ tuuma poan. La daɣɛ to yeen tɛ̃ra na’am mɔɔlegɔ sɔsega la ge to eŋɛ pa’alɛ ti to nɔŋɛ nɛreba la mɛ. Gɔnlɛmlɛm wa n tɔɣeri halese’a woo la yele pakɛ mɛ to na’am mɔɔlegɔ tuuma poan ge to wan sɔsɛ halese’a wana mɔpi n wan ta’an soŋɛ tɔ ti to pɔsɛ sɔsega, halese’a n wan soŋɛ tɔ lebe ta bisɛ poan, la halese’a n wan soŋɛ tɔ ti to ta’an zamesa nɛreba Baabule la.

Ho san zamesa zaseŋɔ woo, ti’isɛ bisɛ ho wan eŋɛ se’em ta’an dekɛ halɛ la tum tuuma, se’em ma’a ti ho sɔsera bɔ’ɔra nɛreba ho gingilega la poan. Basɛ ti hon nɔŋɛ Yehowa la nɛreba se’em la zo’e pa’asɛ. Nɔŋerɛ n wan soŋɛ hɔ ti ho ta’an ɛ podɔleba.

To puurɛ pee mɛ la tomam n nyɛ yɔ’ɔ ti to naɛ la ya tuna la. (Zep. 3:9) Yehowa wan kã bo ya la yamam n kɔ’ɔn nɔŋɛ nɛreba ge me ɛɛra podɔleba la!