‘મારે છૂટું થઈ જવું છે’
એક સરસ નવું ઘર હતું. પણ વરસાદ, પવન અને વાવાઝોડાને લીધે ઘરમાં તીરાડો પડવા લાગી. બસ હવે એ ઘર પડવાની તૈયારીમાં જ છે.
આજે ઘણા લોકોના લગ્નજીવનની હાલત એ ઘર જેવી જ છે. શું તમને લાગે છે કે તમારું લગ્નજીવન એ ઘર જેવું જ છે? હકીકત એ છે કે સર્વના લગ્નજીવનમાં કોઈને કોઈ સમયે તો તકલીફ ઊભી થાય છે જ. બાઇબલ પણ જણાવે છે કે જેઓ લગ્ન કરે છે તેઓને કોઈ વાર તો “દુઃખ” ભોગવવું પડે છે.—૧ કોરીંથી ૭:૨૮.
લગ્નજીવન પર સંશોધન કરનાર એક ગ્રૂપ પણ બાઇબલ સાથે સહમત થાય છે. તેઓ કહે છે: ‘દરરોજ હજારો લોકોને લગ્ન કરવાની ઘેલછા હોય છે. શરૂશરૂમાં તો લગ્નજીવન ગુલાબી-ગુલાબી લાગતું હોય છે. પણ થોડા સમયમાં જ એ ગુલાબી જીવન ગુલામીમાં ફેરવાઈ જાય છે.’
તમારા વિષે શું? શું તમારા લગ્નજીવનમાં નીચેની બાબતો થાય છે?
● ઝઘડા
● ગાળાગાળી
● બેવફાઈ
● મન-દુઃખ
જો તમારું લગ્નજીવન તૂટવાની તૈયારીમાં હોય તો શું કરશો? શું છૂટાછેડાનો જ રસ્તો દેખાય છે? (g10-E 02)
[પાન ૩ પર ચિત્રનું મથાળું]
છૂટાછેડા એકદમ સામાન્ય
અમુક દેશોમાં છૂટાછેડાનો દર બહુ જ વધી ગયો છે. વિચાર કરો કે અમેરિકામાં શું થઈ રહ્યું છે! બાર્બરા ડેફો વાઇટહેડ નામની લેખિકા પોતાના પુસ્તકમાં કહે છે: ‘અમેરિકામાં, ૧૯૬૦ પછી ડિવૉર્સ લેવાનો દર આસમાને પહોંચ્યો છે. દસ વર્ષની અંદર તો એ દર બમણો થઈ ગયો છે. ધીમે ધીમે એ ટકાવારી વધતી ગઈ છે. લગભગ ૧૯૮૩માં સર્વ વિકસિત દેશોની સરખામણીમાં અમેરિકામાં એ દર સૌથી ઊંચો હતો. આજે પણ એ જ દર જળવાઈ રહ્યો છે. છેલ્લા ૩૦ વર્ષની અંદર છૂટાછેડા લેવું એ એકદમ સામાન્ય બની ગયું છે.’—છૂટાછેડાનો સામાન્ય રિવાજ (અંગ્રેજી).