Vidéo yo pwodui pou lasanblé réjyonal 2020 la « Toujou mèt jwa an tchè a zòt ! »

Vidéo a lasanblé réjyonal an nou ka touché-nou toubònman é yo ka édé-nou konprann plibyen sa Labib ka anségné. Ni 114 vidéo adan lasanblé réjyonal 2020 la « Toujou mèt jwa an tchè a zòt ! », é adan sé vidéo-lasa ni 43 diskou kè sé frè a Komité santral la é asistan a yo pwononsé. Ès zò ja mandé-zòt ki kantité travay é konmen sa ka kouté pou pwodui sé vidéo-lasa ?

Près 900 frè é sè toupatou asi latè ofè tan a yo é èkspéryans a yo pou édé a réyalizé pwogram-lasa. O total, yo pasé prèskè 100 000 èdtan ka travay asi on péryòd ki diré 2 lanné. É asi tout tan-lasa yo pasé 70 000 èdtan enki asi fim-la Néémi : « Jwa-la Jéova ka bay la sé fòs a zòt » ki ka diré 76 minit.

Men kon zò dwèt ka imajiné, tousa mandé lajan : fò yo té ba sé volontè-la manjé é on koté pou dòmi, é èvè sa dé koté pou travay, matéryèl é tousa yo té bizwen pou fin travay-la.

Frè Jared Gossman, ki ka travay èvè sèwvis odyo-vidéo la, ka èspliké : « Komité pou ansègnman-la, yonn adan sé komité a Komité santral la, vréman vlè kè vidéo an nou montré tout kalité kilti é péyi diféran. Sé pou byen montré kè fanmi a frè é sè an nou sé on fanmi entèwnasyonal. Sé pou rézon-lasa kè 24 ékip ki ka touvé-yo adan 11 péyi diféran travay ansanm asi pwojé-lasa. Pou yo té rivé fè tout sé ékip-lasa toupatou asi latè travay ansanm, sa mandé onlo lajan é fò tout biten té byen jéré é byen òwganizé. »

Pou onlo adan vidéo an nou, nou té bizwen diféran sèn é ékipman vréman èspésyal. Pa ègzanp, pou fim-la asi Néémi, nou konstwi plizyè sèn adan èstidyo a Mount Ebo, ki owa a Patterson (Nouyòk). Sé frè-la té vlé kè fim-la ka sanm laréyalité kon a épòk a Néémi, men anmenmtan yo té vlé sèvi èvè lajan a sé ofrann-la lè myé posib. Alò yo fabriké mòso a sèn-la adan dé matéryo ki léjè pou rèprézanté miray a Jérizalèm antan lontan. Chak mòso a sèn-la té fèt èvè on pano an bwa ki ka fè 6 mèt hotè, ké yo rèkouvè èvè mous é kè yo penn pou i ka sanm wòch. Konsa yo té pé boujé « sé mòso a miray-la » fasilman é sèvi èvè yo pou touné plizyè mòso a fim-la. Sa pèwmèt diminyé kantité biten ki té nésésè pou sé sèn-la. Magré tousa, enki pou fim-la, sa kouté près 100 000 dola amériken pou yo té konstwi sé sèn-la.a

Tout sé enfòwmasyon-lasa ka fè rèkonésans an nou grandi pou pwogram a lasanblé réjyonal a lanné-lasa. Nou sèten kè apré tout travay-la yo fè la pou té pwodui pwogram-lasa, moun toupatou si latè ké di Jéova mèsi é yo ké louwé-y ansanm-ansanm. Nou vlé di-zòt mèsi pou sé ofrann-la zò ka fè la dè-tou-kè asi donate.jw.org é pa dòt mwayen ankò.