Namɔ Kain Kɛbote Gbalashihilɛ Mli Akɛ Eŋa?

Hetoo ni Biblia lɛ kɛhãa

Kain, ni eji klɛŋklɛŋ gbɔmɛi enyɔ lɛ, abi nukpa lɛ kɛ enyɛmi yoo loo ewekunyo yoo ni bɛŋkɛ kpaakpa bote gbalashihilɛ mli. Kɛ́ wɔsusu nɔ ni Biblia wie yɛ Kain kɛ eweku lɛ he lɛ, wɔbaanyɛ wɔmu sane naa nakai.

Anɔkwalei ni kɔɔ Kain kɛ eweku lɛ he

• Gbɔmɛi adesai fɛɛ jɛ Adam kɛ Hawa mli. “Gbɔmɔ kome [Adam] mli [Nyɔŋmɔ jɛ] efee gbɔmɛi ajeŋmaji fɛɛ koni amɛhi shikpɔŋ muu lɛ fɛɛ nɔ.” (Bɔfoi 17:26) Adam ŋa, Hawa, batsɔ “hiɛkãalɔi fɛɛ anyɛ.” (1 Mose 3:20) No hewɔ lɛ, eeenyɛ efee akɛ Kain, ni eji Adam kɛ Hawa bi lɛ kɛ amɛshwie krokomɛi lɛ eko bote gbalashihilɛ mli.

• Kain kɛ Habel ji klɛŋklɛŋbii ni Hawa fɔ, shi efɔ bii krokomɛi hu. (1 Mose 4:1, 2) Be ni Kain gbe enyɛmi Habel ni ashwie lɛ lɛ, Kain wie akɛ: “Mɔ fɛɛ mɔ ni baana mi lɛ, ebaagbe mi.” (1 Mose 4:14) Namɛi ni no mli lɛ Kain sheɔ amɛ gbeyei lɛ? Biblia lɛ kɛɛ, “[Adam fɔ] bihii kɛ biyei.” (1 Mose 5:4) Ekã shi faŋŋ akɛ, Adam kɛ Hawa shwiei krokomɛi nɛɛ ji mɛi ni no mli lɛ Kain sheɔ gbeyei akɛ amɛbaagbe lɛ lɛ.

• Mra mli yɛ adesai ashihilɛ mli lɛ, efɔɔ kaa akɛ, mɛi kɛ amɛwekumɛi boteɔ gbalashihilɛ mli. Akɛ nɔkwɛmɔnɔ lɛ, nuu anɔkwafo Abraham kɛ yoo ko ni ji epapa bi, shi jeee emami bi, bote gbalashihilɛ mli. (1 Mose 20:12) Be klɛŋklɛŋ ni awo mla kɛgu gbalashihilɛ ni tamɔ nakai lɛ je kpo yɛ Mose Mla lɛ mli, ni awo mla nɛɛ yɛ Kain gbele sɛɛ afii ohai abɔ komɛi asɛɛ. (3 Mose 18:9, 12, 13) Etamɔ nɔ ni bii ni wekumɛi kpaakpa ni kɛ amɛhe bote gbalashihilɛ mli lɛ fɔfɔi yɛ nakai beiaŋ lɛ ejeee kpa tamɔ wɔnaa ŋmɛnɛ lɛ.

• Biblia amaniɛbɔɔ ni kɔɔ Adam, Hawa, kɛ eweku lɛ he lɛ ja yɛ yinɔsane naa. Abaanyɛ ana adesai awekutɔkpai amli fitsofitso kɛjɛ Adam nɔ yɛ 1 Mose Klɛŋklɛŋ wolo lɛ, ni Mose ŋma lɛ mli, kɛ woji hu ni yinɔsaneŋmalɔi Ezra kɛ Luka ŋmala lɛ amli. (1 Mose 5:3-5; 1 Kronika 1:1-4; Luka 3:38) Biblia ŋmalɔi tsĩɔ Kain sane lɛ tã akɛ yinɔsane nɔ ko ni ba mli.​—Hebribii 11:4; 1 Yohane 3:12; Yuda 11.