Mɛni Ji Esha Ni Akɛkeee Lɛ?
Hetoo ni Biblia lɛ kɛhãa
Eshai ni akɛkeee lɛ kɔɔ nifeemɔi ni esaaa, ni akɛ kuɛŋtimɔ feɔ lɛ he, ni no hãaa mɔ lɛ aná eshaifaa kɛjɛ Nyɔŋmɔ ŋɔɔ. Te feɔ tɛŋŋ ni mɔ ko náa su nɛɛ?
Kɛ́ eshafeelɔ ko shwa ehe ni etsake etsui, ehi shi yɛ Nyɔŋmɔ mlai lɛ anaa, ni ejie hemɔkɛyeli kpo yɛ Yesu Kristo mli lɛ, Nyɔŋmɔ kɛ ehe faa lɛ. (Bɔfoi 3:19, 20) Kɛ̃lɛ, mɔ ko baanyɛ ekɛ kuɛŋtimɔ akɔ gbɛ fɔŋ ko aahu akɛ, enyɛŋ etsake kɔkɔɔkɔ. Biblia lɛ wieɔ mɔ ni tamɔ nɛkɛ lɛ ahe akɛ ehiɛ “tsui fɔŋ” ni ‘esha lakamɔ lɛ ehã etsui ekpiliŋ.’ (Hebribii 3:12, 13) Bɔ ni kɛ́ ashã sũ ni Blɔfo tsɛɔ lɛ clay yɛ lá ni naa wa mli lɛ, anyɛɛɛ akɛshɔ̃ nɔ kroko dɔŋŋ lɛ, nakai nɔŋŋ mɔ lɛ tsui kpiliŋɔ aahu akɛ eteɔ shi ewoɔ Nyɔŋmɔ. (Yesaia 45:9) Anáŋ nɔ ko ni abaadamɔ nɔ akɛ mɔ ko ni tamɔ nɛkɛ lɛ he eshai afa lɛ kɔkɔɔkɔ, no hewɔ lɛ ebafeɔ mɔ ko ni efee esha ni akɛkeee.—Hebribii 10:26, 27.
Yudafoi ajamɔŋ hiɛnyiɛlɔi komɛi ni hi shi yɛ Yesu beiaŋ lɛ fee esha ni akɛkeee. Amɛle akɛ Nyɔŋmɔ mumɔ krɔŋkrɔŋ lɛ ji hewalɛ ni Yesu kɛtsu naakpɛɛ nii lɛ, kɛ̃lɛ, amɛwie amɛshi lɛ akɛ Satan Abonsam hewalɛ ekɛtsuɔ nii lɛ.—Marko 3:22, 28-30.
Eshai komɛi ni abaanyɛ akɛke
Musubɔɔ; hiɛdɔɔ kɛ jɛmɔ wiemɔ ni awieɔ ashiɔ Nyɔŋmɔ yɛ lé ni aleee hewɔ. Tsutsu lɛ bɔfo Paulo ji musubɔlɔ, shi sɛɛ mli lɛ, ewie akɛ: “Ana mi mɔbɔ ejaakɛ lé ní mileee kɛ hemɔkɛyeli ní mibɛ hewɔ mifee nakai.”—1 Timoteo 1:13.
Gbalafitemɔ. Biblia lɛ wie mɛi komɛi ni kulɛ amɛkɛ amɛhe woɔ bɔlɛnamɔ jeŋba sha mli, shi amɛtsake amɛjeŋba ni Nyɔŋmɔ kɛke amɛ lɛ he.—1 Korintobii 6:9-11.
“Ani mifee esha ko ni akɛkeee?”
Kɛ́ eji anɔkwale akɛ, yɛ otsui mli tɔ̃ɔ lɛ, oshwa ohe yɛ esha ko ni ofee lɛ he, ni ootao ni otsake lɛɛlɛŋ lɛ, no lɛ, ofeko esha ni akɛkeee. Nyɔŋmɔ baanyɛ ekɛ esha ni ofee lɛ fe shi kome po ake bo, shii abɔ ni okpiliŋko otsui.—Abɛi 24:16.
Mɛi komɛi nuɔ he akɛ amɛfee esha ni akɛkeee, akɛni amɛhenilee yaa nɔ ebuɔ amɛfɔ lɛ hewɔ. Shi Biblia lɛ tsɔɔ wɔ akɛ je be fɛɛ be esa akɛ wɔhe nɔ ni wɔtsui kɛɔ wɔ lɛ wɔye. (Yeremia 17:9) Nyɔŋmɔ hãko wɔteŋ mɔ ko hegbɛ akɛ ekojo enyɛmi, ni ehãko wɔ hegbɛ hu akɛ wɔkojo wɔ diɛŋtsɛ wɔhe. (Romabii 14:4, 12) Kɛ́ wɔ wɔtsui buɔ wɔ fɔ po lɛ, Nyɔŋmɔ baanyɛ ekɛ wɔhe eshai ake wɔ.—1 Yohane 3:19, 20.
Ani Yuda Iskariot fee esha ni akɛkeee?
Hɛɛ. Akɛni ehiɛ kɔ̃ɔ nii anɔ hewɔ lɛ, eju shika ni akɛtsuɔ sɔɔmɔ lɛ he nii lɛ. Ekwa po efee tamɔ ohiafoi lɛ asane kã etsui nɔ waa, tsɛbelɛ eyiŋtoo ji ni ená shika babaoo eju. (Yohane 12:4-8) Yuda tsui bakpiliŋ kɛ efɔŋfeemɔ sɔŋŋ, aahu akɛ, ehé jwiɛtɛi kukuji 30 yɛ mɛi adɛŋ ni etsɔɔ Yesu sɛɛgbɛ. Yesu le akɛ Yuda tsakeŋ kɔkɔɔkɔ yɛ gbɛ ni ekɔ lɛ he, no hewɔ lɛ etsɛ lɛ akɛ “hiɛkpatamɔ bi lɛ.” (Yohane 17:12) Enɛ tsɔɔ akɛ, Yuda hiɛ ekpãta kwraa, ateŋ lɛ shi kɔkɔɔkɔ.—Marko 14:21.
Yuda ejieee anɔkwa heshwamɔ kpo. Yɛ nɔ najiaŋ ni ebaajaje ehe eshai lɛ etsɔɔ Nyɔŋmɔ lɛ, eyajaje etsɔɔ jamɔŋ hiɛnyiɛlɔi lɛ ni ekɛ amɛkpaŋ Yesu yinɔ lɛ moŋ.—Mateo 27:3-5; 2 Korintobii 7:10.