Mɛni Ji Watch Tower Bible and Tract Society Lɛ?
Watch Tower Bible and Tract Society of Pennsylvania lɛ ji nitsumɔ loo kuu ko ni ato shishi yɛ afi 1884 yɛ Commonwealth of Pennsylvania, U.S.A mla lɛ shishi, ni nitsumɔ ni etsuɔ lɛ, jeee sɛɛnamɔ ko ni etaoɔ hewɔ. Yehowa Odasefoi lɛ kɛtsuɔ nii kɛfiɔ amɛjeŋ muu fɛɛ nitsumɔ lɛ sɛɛ; nitsumɔ nɛɛ ekomɛi ji Biblia lɛ kɛ woji ni akɛkaseɔ Biblia lɛ afeemɔ.
Ato Watch Tower Bible and Tract Society of Pennsylvania lɛ shishi koni akɛtsu “jamɔ kɛ nitsɔɔmɔ he nii, ni agbɛnɛ hu akɛye abua mɛi kɛfee amɛ ejurɔ,” titri lɛ koni “akɛshiɛ Nyɔŋmɔ Maŋtsɛyeli lɛ he sane kpakpa lɛ atsɔɔ mɛi, ni ahã amɛle maŋtsɛyeli nɛɛ he nii; Kristo Yesu ji maŋtsɛyeli nɛɛ nɔyelɔ.” Dani mɔ ko baafata kuu nɛɛ he lɛ, ja afɔ̃ lɛ nine dã, shi jeee shika loo nibii abɔ ni mɔ ko kɛfĩ nitsumɔ loo kuu nɛɛ sɛɛ lɛ nɔ adamɔɔ afɔ̃ɔ lɛ nine ni ebafata he. Kuu nɛɛ mli bii lɛ kɛ amɛhiɛnyiɛlɔi lɛ yeɔ amɛbuaa Yehowa Odasefoi A-Gbɛtsɔɔmɔ Kuu Lɛ.
Gbɛjianɔtoo ni akɛwo mla shishi koni akɛtsu yiŋtoo komɛi ahe nii
Yɛ Watch Tower Bible and Tract Society of Pennsylvania lɛ sɛɛ lɛ, Yehowa Odasefoi yɛ gbɛjianɔtoi babaoo ni akɛwo mla shishi yɛ maji srɔtoi anɔ. Gbɛjianɔtoi nɛɛ ekomɛi kɛ gbɛi tamɔ “Watch Tower,” loo “Watchtower,” loo wiemɔi nɛɛ ateŋ eko shishitsɔɔmɔ fataa amɛgbɛ́i he.
Kɛjɛ be ni akɛ gbɛjianɔtoi nɛɛ wo mla shishi nɛɛ, amɛhã wɔnyɛ wɔtsu yiŋtoi babaoo komɛi ahe nii, ni ekomɛi ji:
Woji aŋmalamɔ kɛ kalamɔ. Wɔfee Bibliai aaafee miliɔn 220 kɛ Biblia kasemɔ woji aaafee biliɔn 40. Wɔyɛ woji yɛ wiemɔi ni fa fe 900 kɛ sɛɛ amli. Jw.org wɛbsait lɛ hãa mɛi nyɛɔ amɛkaneɔ Biblia lɛ yɛ wiemɔi ni fa fe 160 amli, ni agbɛnɛ hu amɛbaanyɛ amɛná Biblia sanebimɔi tamɔ “Mɛni Ji Nyɔŋmɔ Maŋtsɛyeli Lɛ?” ahetoo; ni amɛwooo nyɔmɔ ko.
Skul srɔtoi. Wɔfeɔ skul srɔtoi ni atsɔɔ nɔ akɛ Biblia lɛ tsɔseɔ mɛi. Akɛ nɔkwɛmɔnɔ lɛ, kɛjɛ 1943 kɛbaa nɛɛ lɛ, Yehowa Odasefoi aaafee 9,000 ená tsɔsemɔ ni nɔ bɛ he sɛɛ. No ji, akɛ nyɔji fioo komɛi tsɔɔ amɛ nibii pii yɛ Watchtower Bible School of Gilead lɛ, ni ehã amɛná hegbɛ kɛyasɔmɔ akɛ maŋsɛɛ sɔɔlɔi loo amɛye abua wɔjeŋ muu fɛɛ nitsumɔ lɛ. Ni daa otsi lɛ, mɛi akpekpei abɔ, ni mɛi ni jeee Yehowa Odasefoi fata he lɛ, náa tsɔsemɔ ni akɛhãa yɛ wɔsafoŋ kpeei lɛ ashishi lɛ he sɛɛ. Kɛfata he lɛ, wɔtsɔɔ mɛi nikanemɔ kɛ niŋmaa, ni wɔfee wolo ni mɛi kɛkaseɔ nikanemɔ kɛ niŋmaa yɛ wiemɔi 120 amli.
Yelikɛbuamɔ nitsumɔ. Wɔye wɔbua mɛi ni oshãrai enina amɛ lɛ, ni amɛná nibii ni he hiaa amɛ lɛ—kɛ́ eji oshãrai ni adesai kɛbaa, tamɔ Tutsibii lɛ ashishibulemɔ ni ba yɛ Rwanda yɛ 1994 lɛ jio, loo eji adebɔɔ naa oshãra, tamɔ shikpɔŋhosomɔ ni ba yɛ Haiti yɛ afi 2010 lɛ nɛkɛ lɛ jio.
Eyɛ mli akɛ wɔnyɛ wɔtsɔ gbɛjianɔtoi ni akɛwo mla shishi nɛɛ anɔ wɔtsu nibii pii moŋ, shi jeee nomɛi titri hãa wɔnyɛɔ wɔyeɔ omanye. Ejaakɛ sɔ̃ kã Kristofonyo fɛɛ Kristofonyo nɔ akɛ etsu fãmɔ ni Nyɔŋmɔ kɛhã lɛ akɛ eshiɛ ni etsɔɔ mɛi sane kpakpa lɛ he nii. (Mateo 24:14; 28:19, 20) Wɔheɔ wɔyeɔ akɛ Nyɔŋmɔ miifĩ wɔnistumɔ lɛ sɛɛ, ni ebaaya nɔ efee “mɔ ni hãa edaa.”—1 Korintobii 3:6, 7.