Sanebimɔi Ni Biblia Lɛ Ehã Hetoo / Abonsam Kɛ Daimonioi Lɛ / Nɛgbɛ Ji Abonsam Shihilɛhe?

Hetoo ni Biblia lɛ kɛhãa

Abonsam lɛ eji mumɔŋ bɔɔ nɔ, no hewɔ lɛ, eyɛ mumɔi ashihilɛhe ni anyɛŋ akɛ hiŋmɛi ana. Kɛ̃lɛ, shihilɛhe nɛɛ jeee hɛl la ni epiŋɔ mɛi yɛ mli, taakɛ mfoniri ni yɔɔ sane nɛɛ mli lɛ tsɔɔ lɛ.

“Ta te shi yɛ ŋwɛi”

Be ko ni eho lɛ, no mli lɛ Satan Abonsam nyɛɔ eyaa he fɛɛ he ni esumɔɔ yɛ mumɔi ashihilɛ he lɛ, ni enyɛɔ efataa ŋwɛibɔfoi anɔkwafoi lɛ ahe kɛyapueɔ yɛ Nyɔŋmɔ hiɛ. (Hiob 1:6) Shi Biblia lɛ gba efɔ̃ shi akɛ ‘ta ko baate shi yɛ ŋwɛi,’ ni nakai ta lɛ nɔ abaatsɔ ashɛ ‘Satan kɛjɛ ŋwɛi afɔ̃ shikpɔŋ nɛɛ nɔ.’ (Kpojiemɔ 12:7-9) Biblia akɔntaabuu kɛ nibii ni yaa nɔ yɛ je lɛ mli lɛ maa nɔ mi akɛ ta ni awie he akɛ ebaate shi yɛ ŋwɛi lɛ eba momo. Amrɔ nɛɛ, atsĩ Abonsam naa yɛ shikpɔŋ nɛɛ nɔ.

Ani enɛ tsɔɔ akɛ Abonsam yɛ shihilɛ he pɔtɛɛ ko yɛ je nɛɛ mli? Akɛ nɔkwɛmɔnɔ lɛ, awie blema maŋ ni ji Pergamo lɛ he akɛ “he ni Satan maŋtsɛ sɛi lɛ yɔɔ lɛ” kɛ “he ni Satan yɔɔ lɛ.” (Kpojiemɔ 2:13) Yɛ anɔkwale mli lɛ, eeenyɛ efee akɛ wiemɔi nɛɛ damɔ shi kɛhã bɔ ni Satan jamɔi lɛ he shi waa yɛ nakai maŋtiase lɛ mli lɛ. Biblia lɛ hãa wɔleɔ akɛ Abonsam ji mɔ ni yeɔ “shikpɔŋ lɛ nɔ maŋtsɛyelii lɛ fɛɛ” anɔ, no hewɔ lɛ ebɛ he ko pɔtɛɛ akɛ eshihilɛ yɛ shikpɔŋ nɛɛ nɔ, shi atsĩ enaa yɛ shikpɔŋ nɛɛ nɔ.​—Luka 4:5, 6.