Sanebimɔi Ni Biblia Lɛ Ehã Hetoo / Nyɔŋmɔ / Mɛni Biblia Lɛ Kɛɔ Yɛ Hegbɛ Ni Wɔyɔɔ Akɛ Wɔ Diɛŋtsɛ Wɔkpɛ Wɔyiŋ Yɛ Saji Ahe Lɛ He? Ani Nyɔŋmɔ Etsɔ Hiɛ Etsɔɔ Nɔ Ni Baaba Onɔ Wɔsɛɛ?
Hetoo ni Biblia lɛ kɛhãa
Nyɔŋmɔ ehã wɔ fɛɛ hegbɛ ni wɔ diɛŋtsɛ wɔkpɛ wɔyiŋ yɛ saji ahe, moŋ fe ni lɛ diɛŋtsɛ loo shɛɛ mli sane baakudɔ nibii ni wɔfeɔ. Susumɔ nɔ ni Biblia lɛ tsɔɔ he okwɛ.
Nyɔŋmɔ bɔ adesai tamɔ bɔ ni eyɔɔ lɛ. (1 Mose 1:26) Wɔtamɔɔɔ kooloi ni damɔɔ amɛhenumɔi anɔ amɛfeɔ nii lɛ, moŋ lɛ wɔtamɔ wɔ-Bɔlɔ lɛ yɛ nyɛmɔ ni ekɛdro wɔ ni wɔnyɛɔ wɔjieɔ sui tamɔ suɔmɔ kɛ jalɛsane kpo lɛ hewɔ. Ni tamɔ wɔ-Bɔlɔ lɛ ji lɛ, wɔ hu wɔyɛ hegbɛ ni wɔ diɛŋtsɛ wɔkpɛɔ wɔyiŋ yɛ saji ahe.
Wɔbaanyɛ wɔle nɔ ni baaba wɔnɔ kɛyashi he ko. Biblia lɛ woɔ wɔ hewalɛ koni ‘wɔye Nyɔŋmɔ kitãi lɛ anɔ kɛtsɔɔ akɛ wɔkɔ wala.’ (5 Mose 30:19, 20) Eji wɔbɛ hegbɛ ni wɔ diɛŋtsɛ wɔkɛkpɛɔ wɔyiŋ yɛ saji ahe kulɛ, wɔnáŋ nɛkɛ ŋaawoo nɛɛ he sɛɛ, ni ebaaye wɔ awui. Nɔ najiaŋ ni Nyɔŋmɔ baanyɛ wɔnɔ ni wɔfee nɔ ni ekɛɛ lɛ, ejɛɔ mlihilɛ kɛ suɔmɔ mli ewoɔ wɔ ŋaa akɛ: “Miná kulɛ oboɔ mikitãi lɛ toi jogbaŋŋ! Kulɛ otoiŋjɔlɛ lɛ baafee tamɔ faa.”—Yesaia 48:18.
Atsɔko hiɛ atsɔɔ kɛji wɔbaaye omanye loo wɔyeŋ omanye. Kɛ́ wɔmiitao wɔye omanye yɛ nɔ ko mli lɛ, esa akɛ wɔbɔ wɔhe mɔdɛŋ waa yɛ nɔ ni wɔfeɔ lɛ mli. Biblia lɛ kɛɛ: “Nɔ fɛɛ nɔ ni onine baashɛ nɔ akɛ otsu lɛ, okɛ ohewalɛ fɛɛ atsu.” (Jajelɔ 9:10) Biblia lɛ kɛɛ hu akɛ: “Mɔdɛŋbɔlɔ gbɛjianɔtoi baaye omanye kɛ̃.”—Abɛi 21:5.
Hegbɛ ni wɔná akɛ wɔ diɛŋtsɛ wɔbaanyɛ wɔkpɛ wɔyiŋ yɛ saji ahe lɛ ji nikeenii ni nɔ bɛ ni Nyɔŋmɔ kɛdro wɔ, ejaakɛ no hãa wɔjɛɔ wɔsuɔmɔ mli wɔkɛ ‘wɔtsui muu fɛɛ’ sumɔɔ lɛ.—Mateo 22:37.
Bɛ Nyɔŋmɔ kudɔɔ nɔ fɛɛ nɔ?
Biblia lɛ tsɔɔ akɛ Nyɔŋmɔ ji Ofe lɛ, ni mɔ ko bɛ ni baanyɛ akudɔ ehewalɛ loo nyɛmɔ ni eyɔɔ. (Hiob 37:23; Yesaia 40:26) Kɛ̃lɛ, ekɛ ehewalɛ lɛ kudɔɔɔ nɔ fɛɛ nɔ. Akɛ nɔkwɛmɔnɔ lɛ, Biblia lɛ kɛɛ, be ni blema Babilonbii lɛ, ni amɛji Nyɔŋmɔ webii lɛ ahenyɛlɔi lɛ feɔ Nyɔŋmɔ nihiinii lɛ, ‘Nyɔŋmɔ ye ehe nɔ.’ (Yesaia 42:14) Nakai nɔŋŋ ŋmɛnɛ lɛ, eto etsui shi ehã mɛi ni kɛ hegbɛ ni amɛyɔɔ akɛ amɛ diɛŋtsɛ amɛkpɛ yiŋ yɛ saji ahe lɛ yeɔ mɛi awui lɛ. Shi efeŋ nakai kɛyaŋ naanɔ.—Lala 37:10, 11.