Sanebimɔi Ni Biblia Lɛ Ehã Hetoo / Je Lɛŋ Naagbai / Mibɛ Mishihilɛ He Miishɛɛ​—Ani Jamɔ, Nyɔŋmɔ, Loo Biblia Lɛ Baanyɛ Aye Abua Mi?

Hetoo ni Biblia lɛ kɛhãa

Hɛɛ. Biblia lɛ, ni eji wolo ni etsɛ waa ni nilee yɔɔ mli lɛ, hãa shihilɛ mli sanebimɔi ni he hiaa waa lɛ ahetoo, ni ebaanyɛ eye ebua bo koni otsui anyɔ omli, ni omii ashɛ ohe. Naa sanebimɔi komɛi ni Biblia lɛ ehã hetoo.

1. Ani Bɔlɔ ko yɛ? Biblia lɛ kɛɔ akɛ Nyɔŋmɔ ‘bɔ nibii fɛɛ.’ (Kpojiemɔ 4:11) Akɛ wɔ-Bɔlɔ lɛ, Nyɔŋmɔ le nibii ni kɛ́ wɔná lɛ, wɔmii baashɛ wɔhe, ni wɔtsui hu anyɔ wɔmli.

2. Ani Nyɔŋmɔ susuɔ mihe? Nɔ najiaŋ ni Biblia lɛ baahã ana Nyɔŋmɔ akɛ mɔ ko ni anyɛŋ abɛŋkɛ lɛ lɛ, Biblia lɛ kɛɛ: “Ekɛ wɔteŋ mɔ fɛɛ mɔ teŋ jekɛɛɛ.” (Bɔfoi 17:27) Osane kã etsui nɔ waa diɛŋtsɛ, ni eesumɔ ni eye ebua bo ni otsui anyɔ omli.​—Yesaia 48:17, 18; 1 Petro 5:7.

3. Kɛ́ mibale Nyɔŋmɔ lɛ, mɛɛ gbɛ nɔ no baaye ebua mi ni mitsui anyɔ mimli? Nyɔŋmɔ bɔ wɔ bɔ ni baahã wɔnu he akɛ “Nyɔŋmɔ he miihia wɔ,” ni enɛ ji shwelɛ ko ni wɔnáa akɛ esa akɛ wɔle nɔ ni wala ji, kɛ nɔ hewɔ ni abɔ wɔ. (Mateo 5:3) Nɔ ni fata enɛ he hu ji shwelɛ ni wɔnaa akɛ esa akɛ wɔle wɔ-Bɔlɔ lɛ ni wɔ kɛ lɛ abɔ naanyo lɛ. Kɛ́ oosumɔ ni ole Nyɔŋmɔ lɛ, ebaanya mɔdɛŋ ni obɔɔ yɛ enɛ feemɔ he lɛ he waa, ejaakɛ Biblia lɛ kɛɛ: “Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.”​—Yakobo 4:8.

Mɛi akpekpei abɔ eyɔse akɛ naanyo ni amɛkɛ Nyɔŋmɔ bɔɔ lɛ ehã amɛshihilɛ ehi kwraa fe tsutsu lɛ, ni amɛle nibii ni amɛbaanyɛ amɛfee koni amɛtsui anyɔ amɛmli yɛ shihilɛ mli. Eyɛ mli akɛ le ni obaale Nyɔŋmɔ lɛ etsɔɔɔ akɛ okɛ naagba ko kwraa ekpeee yɛ shihilɛ mli moŋ, shi ehiɛshikamɔ ni yɔɔ Biblia lɛ mli lɛ baanyɛ aye abua bo koni

• Miishɛɛ ahi oweku lɛ mli.

• Toiŋjɔlɛ ahi bo kɛ mɛi krokomɛi ateŋ.

• Onyɛ otsu naagbai srɔtoi tamɔ jwɛŋmɔŋ naagba, shika he naagba, kɛ hela ni ehiii tsamɔ ahe nii.

Jamɔi babaoo ni hiɛɔ Biblia lɛ kɛ nibii ni Biblia lɛ tsɔɔ lɛ tsuuu nii. Nɔ ni tamɔɔɔ nakai lɛ, anɔkwa jamɔ ni kɛ nɔ ni Biblia lɛ tsɔɔ diɛŋtsɛ tsuɔ nii lɛ baaye abua bo koni ole Nyɔŋmɔ.