Mɛi Ehao Yɛ Je Lɛŋ Fɛɛ Ejaakɛ Soshia Midia Miiye Oblahii Kɛ Oblayei Awui Waa

Yɛ afi 2025 mli lɛ, nɔyelii ni yɔɔ je lɛŋ hei srɔtoi lɛ hã ana akɛ amɛhao waa yɛ bɔ ni soshia midia yeɔ oblahii kɛ oblayei awui lɛ hewɔ. Yɛ maŋ ko nɔ lɛ, awo mla akɛ kɛ́ mɔ ko yeko afii 16 lɛ, ebɛ hegbɛ ni eyaa soshia midia nɔ, ni maji krokomɛi hu miitao ni amɛwo mlai tamɔ nakai nɔŋŋ.

Naakpɛɛ sane ji akɛ, oblahii kɛ oblayei komɛi po eyɔse akɛ soshia midia lɛ baanyɛ aye amɛ awui. Niiamlitaomɔ ko ni kuu ko ni atsɛɔ amɛ Pew Research Center, ni yɔɔ United States lɛ fee ni amɛjie lɛ kpo yɛ April 2025 lɛ tsɔɔ mli akɛ: “Oblahii kɛ oblayei amlijaa fã kpotoo (48%) kɛɛ soshia midia miiye amɛtipɛŋfoi awui.”

Datrɛfoi ni he esa lɛ ebɔ kɔkɔ akɛ, soshia midia lɛ miiye bɔ ni oblahii kɛ oblayei susuɔ nii ahe kɛ bɔ ni amɛnuɔ nii ahe amɛhãa lɛ awui. Nyɛsɛɛ afi lɛ, Dr. Vivek Murthy, ni no mli lɛ eji U.S. maŋ onukpa ni kwɛɔ helatsamɔ nɔ lɛ wie akɛ: “Oblahii kɛ oblayei ni miiná jwɛŋmɔŋ naagbai lɛ ayi efa waa bɔ ni esa akɛ akɛ oyaiyeli kɛ hiɛdɔɔ amɔ naa, ni wɔyɔse akɛ soshia midia ji nibii titri ni hãa amɛnáa jwɛŋmɔŋ naagbai lɛ ateŋ ekome.”

Mɛni fɔlɔi baanyɛ afee kɛbu amɛbii lɛ ahe yɛ soshia midia nɔ oshãrai ahe? Biblia lɛ kɛ ŋaawoi ni yeɔ ebuaa hãa.

Nɔ ni fɔlɔi baanyɛ afee

Naa Biblia mli shishitoo mlai komɛi.

“Hiɛtɛ̃lɔ kwɛɔ enajifaamɔi jogbaŋŋ.”​—Abɛi 14:15.

Akɛni soshia midia baanyɛ aná obi lɛ nɔ hewalɛ gbonyo loo eye lɛ awui hewɔ lɛ, kaanu he akɛ doo lɛ, esa akɛ oŋmɛ lɛ gbɛ ni eya soshia midia lɛ nɔ. Dani obaaŋmɛ obi gbɛ akɛ eya soshia midia nɔ lɛ, kwɛmɔ akɛ eji mɔ ko ni baanyɛ eye mlai ni owo lɛ yɛ bei abɔ ni esa akɛ eye yɛ nɔ, nanemɛi kpakpai ni esa akɛ ekɛbɔ yɛ nɔ, kɛ nibii gbohii ni esaaa akɛ ekwɛɔ, ekaneɔ, ekɛmajeɔ, loo ekɛwoɔ nɔ lɛ anɔ lo.

• Kɛ́ ootao ole enɛ he saji krokomɛi lɛ, kanemɔ saji ni ji “Ani Esa Akɛ Mibi Lɛ Aya Social Media Lɛ Nɔ?” kɛ “Bɔ Ni Obaafee Oye Obua Obii Lɛ Koni Kɛ́ Amɛtee Social Media Nɔ Lɛ Amɛfee Shweshweeshwe.”

“Nyɛkɛ nyɛbe atsu nii jogbaŋŋ.”​—Efesobii 5:16.

Kɛ́ obaaŋmɛ obi lɛ gbɛ koni eya soshia midia nɔ lɛ, wo lɛ mlai yɛ bɔ ni esa akɛ ekɛtsu nii ehã lɛ he, ni ogbala mli otsɔɔ lɛ bɔ ni kɛ́ eye mlai loo gbɛtsɔɔmɔi ni okɛhã lɛ anɔ lɛ, ebaaye ebua lɛ koni efee shweshweeshwe yɛ nɔ. Okɛ ohiɛ afɔ̃ shi kɛkwɛ akɛ obaana tsakemɔi komɛi yɛ obi lɛ nifeemɔ mli ni tsɔɔ akɛ esa akɛ okudɔ bɔ ni eyaa soshia midia lɛ nɔ ehãa lo.

• Okɛ vidio ni ji Ohiɛ Akã Shi Yɛ Fesbuk Kɛ Ehenɔi Lɛ Kɛnitsumɔ Mli lɛ aye abua obi lɛ koni ele bɔ ni esa akɛ ekɛ soshia midia atsu nii ahã kɛ nɔ hewɔ ni esaaa akɛ efiteɔ be babaoo yɛ nɔ.

Kɛ́ ootao Biblia mli ŋaawoi krokomɛi ni fɔlɔi baanyɛ amɛkɛtsu sane nɛɛ he nii lɛ, kanemɔ sane ni ji, “Maŋ Onukpa Ko Ni Le Helatsamɔ Saji Amli Jogbaŋŋ Lɛ Ebɔ Kɔkɔ Akɛ Social Media Baanyɛ Aye Oblahii Kɛ Oblayei Awui Waa​—Mɛni Biblia Lɛ Kɛɔ Yɛ He? Lɛ.”

Sane kroko hu nɛ

Biblia lɛ kɛɛ, wɔyɛ “bei krɛdɛi ni mli shihilɛ wa” mli. (2 Timoteo 3:1-5) Nakai beiaŋ nɔŋŋ lɛ, Biblia lɛ hãa wɔ ŋaawoi kpakpai ni baaye abua wɔ koni wɔkpee shihilɛi ni mli wawai anaa, ni ŋaawoi nɛɛ abe hooo kɔkɔɔkɔ. Ajɛ Biblia lɛ mli aŋmala saji ni fa fe 20 kɛhã fɔlɔi kɛ amɛbii yɛ sane ni ji, “Oblahii Kɛ Oblayei Ni Náa Jwɛŋmɔŋ Naagba Lɛ Ayi Miifa Waa​—Mɛni Biblia Lɛ Kɛɔ Yɛ He?” lɛ mli.