FPG/The Image Bank via Getty Images
NYƐYAA NƆ NYƐBUA!
Maŋkwralɔi Ebɔ Kɔkɔ Akɛ Etsɛŋ Harmagedon Baaba—Mɛni Biblia Lɛ Kɛɔ Yɛ He?
Yɛ Ju leebi, October 10, 2022 lɛ, Russia tswara okplɛmii loo bɔmb kɛyakpãtã Ukraine maji komɛi ahiɛ kɛtɔ owele; ejaakɛ gbii enyɔ dani October 10, 2022 lɛ baashɛ lɛ, bɔmb ko fɛ ni efite bridge titri ko ni atsɔɔ nɔ ni kã Crimea kɛ Russia teŋ lɛ, ni Russia susu akɛ Ukrainebii ji mɛi ni fite bridge lɛ. Gbii fioo komɛi ni tsɔ be nɛɛ hiɛ lɛ, maŋkwralɔi bɔ kɔkɔ akɛ ekolɛ, etsɛŋ ni Harmagedon baaba.
“Kɛjɛ be ni tsutsu U.S. Maŋ Hiɛnyiɛlɔ John F. Kennedy kɛ Cuba okplɛmii ahe saji lɛ ba nɛɛ, wɔbɛŋkɛko Harmagedon kpaakpa nɛkɛ pɛŋ. . . . Miheee miyeee akɛ, abaanyɛ atswa nuklea okplɛm ko ni no kɛ wɔ eyagbeŋ naa yɛ Harmagedon.”—U.S. Maŋ Hiɛnyiɛlɔ Joe Biden, October 6, 2022.
Be ni abi Ukraine Maŋ Hiɛnyiɛlɔ Volodymyr Zelensky susumɔ yɛ nɔ ni nuklea okplɛmii ni abaatswara lɛ baanyɛ ekɛba lɛ he lɛ, ekɛɛ akɛ: “Miheɔ miyeɔ akɛ no baanyɛ ekɛ Harmagedon aba, ni ebaafee oshãra wulu kɛhã jeŋ muu lɛ fɛɛ.”—BBC News, October 8, 2022.
Ani kɛ́ akɛ nuklea okplɛmii tsu nii yɛ ta nɛɛ mli lɛ, ekɛ Harmagedon baaba? Mɛni Biblia lɛ kɛɔ yɛ he?
Ani nuklea okplɛmii baahã Harmagedon aba?
Dabi. Wiemɔ “Harmagedon” lɛ je kpo shi kome pɛ yɛ Biblia lɛ mli yɛ Kpojiemɔ 16:16. Ekɔɔɔ ta ni baaya nɔ yɛ majimaji ateŋ lɛ he, shi moŋ ekɔɔ ta ni baaya nɔ yɛ Nyɔŋmɔ kɛ “shikpɔŋ muu lɛ fɛɛ nɔ maŋtsɛmɛi lɛ” ateŋ lɛ he. (Kpojiemɔ 16:14) Nyɔŋmɔ baatsɔ Harmagedon ta lɛ nɔ ekpãtã adesai anɔyelii ahiɛ.—Daniel 2:44.
Kɛ́ ootao ole saji krokomɛi ni kɔɔ nɔ ni Harmagedon baafee ehã shikpɔŋ lɛ he lɛ, kanemɔ sane ni ji Mɛni Ji Harmagedon Ta Lɛ?
Ani nuklea ta nɔ abaatsɔ afite shikpɔŋ lɛ kɛ enɔ nibii lɛ?
Dabi. Eyɛ mli akɛ adesai anɔyelii kɛ nuklea okplɛmii baawu ta wɔsɛɛ moŋ, shi Nyɔŋmɔ kwɛŋ ni afite shikpɔŋ lɛ. Biblia lɛ kɛɛ:
“Shikpɔŋ lɛ yɛ kɛmiiya naanɔ.”—Jajelɔ 1:4.
“Jalɔi lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ.”—Lala 37:29.
Kɛ̃lɛ, Biblia mli gbalɛi kɛ nibii ni miiya nɔ bianɛ lɛ miihã wɔmiina akɛ, etsɛŋ tsakemɔ kpele baaba shikpɔŋ lɛ nɔ. (Mateo 24:3-7; 2 Timoteo 3:1-5) Kɛ́ ootao ole nɔ ni Biblia lɛ kɛɔ yɛ wɔsɛɛ he lɛ, kaa wɔ-Biblia kasemɔ ni afeɔ lɛ tamɔ sanegbaa lɛ okwɛ, aheee shika.