Namɔ Ji Nyɔŋmɔ Gbɔmɔ? Kɛ́ Mɔ Ko Yɛ Jamɔ Ko Mli Lɛ, Ani No Tsɔɔ Akɛ Nyɔŋmɔ Gbɔmɔ Ji Lɛ?
Hetoo ni Biblia lɛ kɛhãa
Taakɛ akɛ wiemɔ nɛɛ tsu nii yɛ Biblia lɛ mli lɛ, kɛ́ akɛɛ mɔ ko ji mumɔŋ gbɔmɔ loo Nyɔŋmɔ gbɔmɔ lɛ, no tsɔɔ akɛ esumɔɔ ni efee nibii ni baasa Nyɔŋmɔ hiɛ, ni esusu nii ahe tamɔ Nyɔŋmɔ susuɔ nii ahe lɛ. Nyɔŋmɔ gbɔmɔ feɔ nɔ fɛɛ nɔ ni ebaanyɛ koni ehi shi yɛ Nyɔŋmɔ mlai kɛ Nyɔŋmɔ mumɔ krɔŋkrɔŋ lɛa gbɛtsɔɔmɔ naa.—Romabii 8:5; Efesobii 5:1.
Kɛ́ Biblia lɛ miitsɔɔ mɔ ni Nyɔŋmɔ gbɔmɔ ji lɛ, bei pii lɛ, ekɛ nibii ni mɛi ni jeee Nyɔŋmɔ gbɔmɛi lɛ feɔ lɛ toɔ saji ahe kɛtsɔɔ mli. Akɛ nɔkwɛmɔnɔ lɛ, esoro Nyɔŋmɔ gbɔmɔ yɛ heloŋ gbɔmɔ he. “Heloŋ gbɔmɔ lɛ, emɔɔɔ Nyɔŋmɔ mumɔ lɛ nibii lɛ amli,” loo ekpɛlɛɛɛ Nyɔŋmɔ tsɔɔmɔi lɛ anɔ. (1 Korintobii 2:14-16) Heloŋ gbɔmɛi sumɔɔ “awuŋayeli kɛ béi,” shi Nyɔŋmɔ gbɔmɔ efeee nakai. Nyɔŋmɔ gbɔmɔ sumɔɔ ejurɔfeemɔ kɛ toiŋjɔlɛ. (1 Korintobii 3:1-3) Biblia lɛ tsɛɔ mɛi ni wieɔ mɛi ahe efɔŋ, ni amɛtserɛɔ nanemɛi kpaakpa ateŋ lɛ akɛ, “mɛi ni feɔ amɛnii tamɔ kooloi, mɛi ni mumɔ lɛ etsɔɔɔ amɛ gbɛ.”—Yuda 19; Abɛi 16:28.b
Nɔ ni wɔbaasusu he yɛ sane nɛɛ mli
Mɛni tsɔɔ akɛ mɔ ko baanyɛ atsɔ Nyɔŋmɔ gbɔmɔ?
Wɔbaanyɛ wɔtsɔ Nyɔŋmɔ gbɔmɔ ejaakɛ Nyɔŋmɔ bɔ wɔ tamɔ bɔ ni eyɔɔ lɛ. (1 Mose 1:27) No hewɔ lɛ, ebɛ naakpɛɛ akɛ mɛi sumɔɔ ni amɛkase nibii ni amɛnyɛɛɛ amɛna loo amɛta he lɛ ahe nii.
Bɔ ni Yehowac Nyɔŋmɔ bɔ wɔ ehã lɛ hewɔ lɛ, wɔnyɛɔ wɔjieɔ esui lɛ ekomɛi akpo; sui nɛɛ ekomɛi ji toiŋjɔlɛ, mɔbɔnalɛ, kɛ hiɛiaŋ ni akwɛɛɛ. (Yakobo 3:17) Agbɛnɛ hu, Nyɔŋmɔ kɛ emumɔ krɔŋkrɔŋ lɛ hãa mɛi ni bɔɔ mɔdɛŋ akɛ amɛbaaye efamɔi anɔ lɛ.—Bɔfoi 5:32.
Mɛni hewɔ esa akɛ obɔ mɔdɛŋ otsɔ Nyɔŋmɔ gbɔmɔ?
Kɛ́ obɔ mɔdɛŋ otsɔ Nyɔŋmɔ gbɔmɔ lɛ, obaaná “wala kɛ toiŋjɔlɛ.” (Romabii 8:6) Wala kɛ toiŋjɔlɛ ji nikeenii ni Nyɔŋmɔ kɛhãa.
Wala: Nyɔŋmɔ ewo shi akɛ ebaadro mɛi ni feɔ esuɔmɔnaa nii, ni ji Nyɔŋmɔ gbɔmɛi lɛ, naanɔ wala.—Yohane 17:3; Galatiabii 6:8.
Toiŋjɔlɛ: Enɛ eji toiŋjɔlɛ ni bakãa Nyɔŋmɔ gbɔmɔ kɛ Nyɔŋmɔ teŋ. Mɛi ni kɛ amɛjwɛŋmɔ maa amɛheloonaa hiamɔ nii pɛ anɔ lɛ, Nyɔŋmɔ henyɛlɔi ji amɛ. (Romabii 8:7) Agbɛnɛ hu lɛ, ‘Nyɔŋmɔ kɛ etoiŋjɔlɛ ni fe niiashishinumɔi fɛɛ lɛ’ droɔ mɛi ni bɔɔ mɔdɛŋ akɛ amɛbaatsɔmɔ Nyɔŋmɔ gbɔmɛi lɛ. (Filipibii 4:6, 7) Toiŋjɔlɛ nɛɛ hãa amɛmii shɛɔ amɛhe yɛ shihilɛ mli.—Mateo 5:3.
Mɛni esa akɛ mafee koni matsɔ Nyɔŋmɔ gbɔmɔ?
Kasemɔ Nyɔŋmɔ mlai lɛ, ni oye nɔ. Obaanyɛ ofee enɛ kɛtsɔ Biblia lɛ ni obaakane lɛ nɔ, ejaakɛ Nyɔŋmɔ susumɔi ni ekɛ “mumɔ krɔŋkrɔŋ lɛ tsirɛ” gbɔmɛi ni amɛŋmala lɛ ji nɔ ni yɔɔ Biblia lɛ mli. (2 Petro 1:21) Mumɔ krɔŋkrɔŋ lɛ baaye abua bo koni nɔ ni okaseɔ lɛ ahã okɛ “mumɔ kɛ anɔkwale” ajá Nyɔŋmɔ, bɔ ni kɛ esuɔmɔnaa nii kpãa gbee.—Yohane 4:24.
Sɔlemɔ kɛbi Nyɔŋmɔ koni eye ebua bo. (Luka 11:13) Nyɔŋmɔ baaye abua bo ni oná sui ni tsɔɔ akɛ Nyɔŋmɔ gbɔmɔ ji bo, ni ojie sui nɛɛ akpo yɛ onifeemɔi amli. (Galatiabii 5:22, 23) Agbɛnɛ hu, sɔlemɔ baahã oná hiɛshikamɔ ni okɛkpee shihilɛ mli naagbai lɛ anaa.—Yakobo 1:5.
Okɛ Nyɔŋmɔ gbɔmɛi abɔ. Amɛbaaye amɛbua bo ni naanyobɔɔ ni kã okɛ Nyɔŋmɔ teŋ lɛ mli awa. (Romabii 1:11, 12) Shi kɛ́ okɛ mɛi ni amɛsusumɔi kɛ Nyɔŋmɔ nɔ kpãaa gbee lɛ bɔ naanyo lɛ, ebaafite naanyobɔɔ ni yɔɔ okɛ Nyɔŋmɔ teŋ lɛ.—Yakobo 4:4.
Kɛ́ mɔ ko yɛ jamɔ ko mli lɛ, ani no tsɔɔ akɛ Nyɔŋmɔ gbɔmɔ ji lɛ?
Kɛ́ oyɛ jamɔ ko mli lɛ, no etsɔɔɔ doo akɛ oji Nyɔŋmɔ gbɔmɔ. Biblia lɛ kɛɛ: “Kɛ́ gbɔmɔ ko susuɔ akɛ eji Nyɔŋmɔ jálɔ, shi ekudɔɔɔ elilɛi jogbaŋŋ lɛ, eelaka lɛ diɛŋtsɛ etsui, ni ejamɔ lɛ, efolo ni.”—Yakobo 1:26.
Fɛɛ sɛɛ lɛ, Biblia lɛ hãa wɔnaa akɛ, Nyɔŋmɔ gbɔmɔ lɛ, ejáa Nyɔŋmɔ yɛ gbɛ ni Nyɔŋmɔ kpɛlɛɔ nɔ lɛ nɔ. Ekpɛlɛɔ nɔ akɛ “mumɔ kome” pɛ yɔɔ, ni no ji Nyɔŋmɔ mumɔ krɔŋkrɔŋ lɛ. Nakai mumɔ lɛ hãa Nyɔŋmɔ webii feɔ ekome kɛjáa Nyɔŋmɔ akɛ “gbɔmɔtso kome,” ni ji kuu ni ato amɛhe gbɛjianɔ ‘ni hiɛɔ ekomefeemɔ mli. Mumɔ nɛɛ hãa amɛfeɔ ekome yɛ toiŋjɔlɛ mli oookɛɛ akɛ kpãa efĩ amɛ efee amɛ ekome.’—Efesobii 4:1-4.
Susumɔi ni ejaaa ni mɛi hiɛ yɛ mɔ ni Nyɔŋmɔ gbɔmɔ ji he
Susumɔ ni ejaaa: Kɛ́ mɔ ko ji Nyɔŋmɔ gbɔmɔ lɛ, no tsɔɔ akɛ ehiɔ shi bɔ ni esumɔɔ, bɔ ni hãa etsui nyɔɔ emli.
Anɔkwa sane: Biblia lɛ wieɔ mɔ ni ji Nyɔŋmɔ gbɔmɔ lɛ he akɛ, ehãa Nyɔŋmɔ susumɔi kudɔɔ eshihilɛ. Jeee mɔ ko ni bɔɔ mɔdɛŋ ehiɔ shi akɛ gbɔmɔ kpakpa, shi ekɛ Nyɔŋmɔ bɛ nɔ ko feemɔ. Mɔ ni ji Nyɔŋmɔ gbɔmɔ lɛ, etsui nyɔɔ emli yɛ shihilɛ mli akɛni ekpɛlɛɔ Yehowa nɔ akɛ e-Bɔlɔ, ni ehiɔ shi bɔ ni sa Yehowa hiɛ lɛ hewɔ.—Lala 100:3.
Susumɔ ni ejaaa: Dani mɔ ko baatsɔ Nyɔŋmɔ gbɔmɔ lɛ, esa akɛ etsĩ ehe naa kwraa kɛjɛ nibii kpakpai po ni esumɔɔ lɛ ahe, loo epiŋ ehe.
Anɔkwa sane: Kɛ́ mɔ ko waa lɛ diɛŋtsɛ egbɔmɔtso yi lɛ, ‘lɛ diɛŋtsɛ egbɛ ni etsɔɔ nɔ ejáa Nyɔŋmɔ ji no,’ ni susumɔ nɛɛ ejaaa. (Kolosebii 2:18, 23) Biblia lɛ tsɔɔ akɛ, mɔ ni ji Nyɔŋmɔ gbɔmɔ lɛ náa miishɛɛ, jeee piŋmɔ.—Abɛi 10:22.
Susumɔ ni ejaaa: Kɛ́ mɔ ko kɛ mumɔi ashihilɛhe ko shãra loo ekɛ mumɔ shãra, loo ekɛ ehe wo mumɔi atsɛmɔ nifeemɔ ko mli lɛ, belɛ, eji Nyɔŋmɔ gbɔmɔ.
Anɔkwa sane: Gbɛ kome ni mɛi tsɔɔ nɔ amɛkɛ mumɔi shãraa ji, susumɔ ni ahiɛ akɛ, mɛi ni egboi lɛ amumɔ baanyɛ amɛkɛ hiɛkãlɔi awie lɛ. Shi Biblia lɛ tsɔɔ akɛ, mɛi ni egboi lɛ leee nɔ ko nɔ ko kwraa. (Jajelɔ 9:5) Yɛ anɔkwale mli lɛ, kɛ́ akɛɛ mɔ ko kɛ mumɔi miishãra lɛ, no tsɔɔ akɛ mɔ lɛ kɛ mumɔi ni teɔ shi woɔ Nyɔŋmɔ lɛ shãraa. Nifeemɔ nɛɛ woɔ Nyɔŋmɔ mlila waa, ni ehãaa mɔ lɛ atsɔ Nyɔŋmɔ gbɔmɔ.—3 Mose 20:6; 5 Mose 18:11, 12.
Susumɔ ni ejaaa: Adebɔɔ nibii fɛɛ baanyɛ afee nibii ni saa Nyɔŋmɔ hiɛ.
Anɔkwa sane: Nibii fɛɛ ni Nyɔŋmɔ bɔ lɛ woɔ ehiɛ nyam. (Lala 145:10; Romabii 1:20) Kɛ̃lɛ, bɔfoi kɛ adesai pɛ baanyɛ afee nibii ni saa Nyɔŋmɔ hiɛ ni amɛsusu nii ahe tamɔ lɛ. Shi kooloi lɛ, amɛhenumɔi ji nɔ ni kudɔɔ amɛ, ni amɛnyɛɛɛ amɛkɛ Nyɔŋmɔ abɔ naanyo. Amɛhiamɔ nii ji nɔ titri ni kudɔɔ amɛnifeemɔ. (2 Petro 2:12) No hewɔ lɛ, Biblia lɛ hãa anaa srɔto ni yɔɔ Nyɔŋmɔ gbɔmɔ kɛ mɔ ni jeee Nyɔŋmɔ gbɔmɔ lɛ teŋ, mɔ ni jeee Nyɔŋmɔ gbɔmɔ lɛ, esusuɔ nii ahe tamɔ kooloo, ni efeɔ enii hu tamɔ kooloo.—Yakobo 3:15; Yuda 19.
a Wiemɔi ni akɛtsu nii yɛ Biblia lɛ mli ni atsɔɔ shishi akɛ “mumɔ” lɛ, damɔ shi kɛhã “mu ni amuɔ.” Ebaanyɛ etsɔɔ hewalɛ ko hu ni anaaa, shi anaa odaseyeli akɛ eetsu nii. Biblia lɛ wieɔ Nyɔŋmɔ he akɛ Mumɔ Ni Kwɔ Fe Fɛɛ. Nyɔŋmɔ gbɔmɔ lɛ damɔɔ nɔ ni Nyɔŋmɔ sumɔɔ nɔ ekpɛɔ eyiŋ, ni ehãa Nyɔŋmɔ mumɔ krɔŋkrɔŋ lɛ tsɔɔ lɛ gbɛ.
b Yɛ Biblia lɛ mli lɛ, kɛ́ akɛ wiemɔ ni ji “heloo” tsu nii yɛ gbɔmɛi agbɛfaŋ lɛ, bei pii lɛ ekɔɔ mɛi ni hãa amɛheloonaa hiamɔ nii loo amɛgbɔmɔtsoŋ hiamɔ nii kudɔɔ amɛsusumɔi loo amɛnifeemɔi lɛ ahe, ni amɛkɛ Nyɔŋmɔ gbɛtsɔɔmɔi lɛ babaoo loo fɛɛ kwraa tsuuu nii.
c Yehowa ji Nyɔŋmɔ gbɛ́i, taakɛ ejeɔ kpo yɛ Biblia lɛ mli lɛ.—Lala 83:18.