“Nɔ Ni Nyɔŋmɔ Kɛtsa Lɛ . . .”

Yɛ Mose Mla lɛ mli lɛ, kɛ́ nuu ko miitao eshwie eŋa lɛ, esa akɛ efee shwiemɔ lɛ he wolo. Yiŋtoo ni yɔɔ mla nɛɛ sɛɛ ji, koni hii akaye amɛhe oyai kɛtse gbãla. Shi yɛ Yesu beiaŋ lɛ, jamɔŋ hiɛnyiɛlɔi lɛ hã efee mlɛo kɛhã mɛi akɛ amɛbaatse gbãla. No mli lɛ, hii shwieɔ amɛŋamɛi yɛ nɔ fɛɛ nɔ kwraa he. (nwtsty lɛ mli sane ni kɔɔ Mar 10:4 lɛ he: “shwiemɔ wolo,” nwtsty lɛ mli sane ni kɔɔ Mar 10:11 lɛ he: “shwieɔ eŋa,” “efite gbãla, etɔ̃ yoo lɛ nɔ”) Yesu hã efee faŋŋ akɛ, Yehowa ji mɔ ni to gbalashihilɛ shishi. (Mar 10:2-12) Eto akɛ, kɛ́ nuu kɛ yoo bote gbalashihilɛ mli lɛ, amɛtsɔ “heloo kome,” ni amɛhi shi nakai daa. Sane nɛɛ nɔŋŋ he amaniɛ ni Mateo bɔ lɛ hãa wɔnaa akɛ, nɔ pɛ ni abaanyɛ adamɔ nɔ atse gbãla yɛ Ŋmalɛ naa ji “ajwamaŋbɔɔ.”​—Mat 19:9.

Ŋmɛnɛ lɛ, mɛi pii naa gbalashihilɛ tamɔ bɔ ni Farisifoi lɛ na lɛ lɛ, shi jeee tamɔ bɔ ni Yesu na lɛ lɛ. Kɛ́ naagbai ba mɛi ni yɔɔ je lɛ mli lɛ agbalashihilɛ mli lɛ, amɛhe feɔ oya kɛtseɔ gbãla lɛ. Shi Kristofoi buɔ amɛgbalashihilɛ kitakamɔ lɛ akɛ nɔ ko ni yɔɔ hiɛdɔɔ, ni kɛ́ amɛkɛ naagbai kpe lɛ, amɛbɔɔ mɔdɛŋ akɛ amɛkɛ Biblia mli shishitoo mlai baatsu he nii. Kwɛmɔ vidio ni ji, Kɛ́ Ajie Suɔmɔ Kɛ Bulɛ Kpo Yɛ Weku Lɛ Mli Lɛ, Efeɔ Weku Lɛ Ekome lɛ, koni no sɛɛ lɛ, ohã sanebimɔi ni nyiɛ sɛɛ nɛɛ ahetoo:

• 

  Mɛɛ gbɛ nɔ obaanyɛ okɛ Abɛi 15:1 lɛ atsu nii yɛ ogbalashihilɛ mli, ni mɛni hewɔ enɛ he hiaa waa lɛ?

• Mɛɛ gbɛ nɔ Abɛi 19:11 lɛ baanyɛ aye abua bo ni otsi ohe kɛje naagbai ahe?

• Kɛ́ ogbãla lɛ miihe afite lɛ, yɛ nɔ najiaŋ ni obaasusu gbalatsemɔ he lɛ, mɛɛ saji moŋ esa akɛ obi ohe?

• Kɛ́ okɛ Mateo 7:12 lɛ tsu nii lɛ, mɛɛ gbɛ nɔ ebaanyɛ eye ebua bo ni otsɔ wu kpakpa loo ŋa kpakpa?