Ehe Miihia ni Osaa Ohe Koni Onyɛ Otsɔɔ Nii Jogbaŋŋ

Abi Yesu sane ni kɔɔ naanɔ wala he kɛ́ hooo kwraa yɛ bei srɔtoi enyɔ mli, shi yɛ eko fɛɛ eko mli lɛ, ehã hetoo lɛ kɔ mɔ ni bi sane lɛ shihilɛ he. (Luka 10:25-28; 18:18-20) No hewɔ lɛ, eyɛ mli akɛ ekolɛ wɔle Biblia mli sane ni wɔkɛ mɔ ko kaseɔ lɛ jogbaŋŋ moŋ, shi esa akɛ wɔhã mɔ ni wɔkɛkaseɔ nii lɛ ahi wɔjwɛŋmɔ mli be ni wɔsaa wɔhe kɛhã nikasemɔ lɛ. Mɛɛ otii ebaawa kɛhã lɛ akɛ ebaanu shishi loo ebaakpɛlɛ nɔ? Te ŋmalɛi ni atsɛ yisɛɛ shi aŋmalako amɛmli wiemɔi lɛ ateŋ nɔ ni esa akɛ wɔkɛ lɛ akane? Kukuji enyiɛ esa akɛ wɔkase? Ekolɛ ehe baahia ni wɔkɛ nɔkwɛmɔnii, sanenaatsɔɔmɔi, loo sanebimɔi komɛi asaa wɔhe koni wɔkɛye wɔbua mɔ ni wɔkɛkaseɔ nii bɔ ni afee ni enu nɔ ni wɔkaseɔ lɛ shishi. Kɛfata he lɛ, akɛni Yehowa ji mɔ ni hãa anɔkwale dumɔwu lɛ daa yɛ mɛi lɛ atsui mli hewɔ lɛ, esa akɛ wɔbi lɛ ni ejɔɔ nibii ni wɔkɛsaa wɔhe lɛ, mɔ ni wɔkɛ kaseɔ nii lɛ, kɛ mɔdɛŋ ni wɔbɔɔ koni wɔye wɔbua lɛ ni ele Nyɔŋmɔ he nii babaoo lɛ nɔ.​—1 Kor. 3:6; Yak. 1:5.