Nyɔŋmɔ Wiemɔ lɛ Hi Ha Nitsɔɔmɔ

1. Mɛni ji afi 2014 sɔɔmɔ afi lɛ kpokpaa nɔ kpee lɛ saneyitso, ni mɛɛ sanebimɔ abaaha hetoo yɛ kpee lɛ shishi?

¹ Yehowa ni ji wɔ-Tsɔɔlɔ Kpeteŋkpele lɛ ji tsɔɔlɔ ni fe fɛɛ yɛ jeŋ muu lɛ fɛɛ mli. (Yes. 30:20, 21) Shi mɛɛ gbɛi anɔ Yehowa tsɔɔ etsɔɔ wɔ nii? Eha wɔ wolo ko ni fe woji krokomɛi fɛɛ​—Biblia lɛ, ni ji e-Wiemɔ ni ajɛ mumɔŋ aŋma lɛ. Mɛɛ gbɛ nɔ nii ni Yehowa tsɔɔ wɔ lɛ he baanyɛ aba sɛɛnamɔ aha wɔ yɛ heloŋ, jwɛŋmɔŋ, henumɔŋ kɛ mumɔŋ? Abaaha sanebimɔ nɛɛ hetoo yɛ kpokpaa nɔ kpee ni wɔbaafee yɛ afi 2014 sɔɔmɔ afi lɛ mli lɛ shishi. Kpee lɛ saneyitso ji, “Nyɔŋmɔ Wiemɔ lɛ Hi Ha Nitsɔɔmɔ,” ni edamɔ 2 Timoteo 3:16 lɛ nɔ.

2. Mɛɛ sanebimɔi ni abaaha hetoo baaha otii ni yɔɔ kpee lɛ mli lɛ afee faŋŋ?

² Taomɔ Otii Nɛɛ: Sanebimɔi ni nyiɛ sɛɛ nɛɛ ahetoi baaha otii ni yɔɔ kpee lɛ mli lɛ afee faŋŋ:

• Mɛɛ gbɛ nɔ nii ni Nyɔŋmɔ tsɔɔ wɔ lɛ náa wɔshihilɛ nɔ hewalɛ? (Yes. 48:17, 18)

• Kɛ́ wɔfee tsakemɔi yɛ wɔshihilɛ mli koni wɔnyɛ wɔkɛ wɔbe fɛɛ asɔmɔ Yehowa lɛ, mɛɛ jɔɔmɔi wɔbaaná? (Mal. 3:10)

• Te esa akɛ wɔfee wɔnii wɔha tɛŋŋ yɛ “tsɔɔmɔi krokomɛi” ahe? (Heb. 13:9)

• Mɛɛ gbɛ nɔ wɔbaanyɛ wɔkase bɔ ni Yesu ‘tsɔɔ nii’ eha lɛ? (Mat. 7:28, 29)

• Mɛni hewɔ esa akɛ asafoŋ tsɔɔlɔi lɛ atsɔɔ amɛ diɛŋtsɛ amɛhe nii? (Rom. 2:21)

• Nyɔŋmɔ Wiemɔ lɛ hi ha mɛni? (2 Tim. 3:16)

• Te jeŋmaji lɛ ‘ahosomɔ’ lɛ saa mɛi ahe ehaa tɛŋŋ? (Hag. 2:6, 7)

• Mɛɛ hekɛnɔfɔɔ Yehowa yɔɔ yɛ wɔmli? (Efe. 5:1)

• Mɛni hewɔ esa akɛ wɔmia wɔhiɛ waa ni wɔhi shi yɛ Yehowa tsɔɔmɔ lɛ naa lɛ? (Luka 13:24)

3. Mɛni hewɔ esa akɛ wɔya kpee lɛ, ni wɔbo wiemɔi ni yɔɔ ebe naa lɛ atoi jogbaŋŋ lɛ?

³ Yɛ 2 Timoteo yitso 3 lɛ klɛŋklɛŋ kukuji lɛ amli lɛ, Paulo tsɔɔ jaramɔ bei ni baatsɔɔ akɛ wɔyɛ naagbee gbii lɛ amli, no sɛɛ etsɛɛɛ lɛ, eŋma wiemɔi ni kpokpaa nɔ kpee lɛ damɔ nɔ lɛ. Eŋma akɛ: “Gbɔmɛi fɔji kɛ shishiulɔi aaawo wu yɛ efɔŋ mli; amɛlakaa mɛi ni amɛ hu alakaa amɛ.” (2 Tim. 3:13) Kwɛ bɔ ni ehe hiaa akɛ wɔbaabo nii ni Nyɔŋmɔ tsɔɔ wɔ lɛ toi ni wɔkɛtsu nii koni akalaka wɔ! No hewɔ lɛ, nyɛhaa wɔtswaa wɔfai shi akɛ wɔbaaya kpee lɛ, ni wɔbo wiemɔi ni yɔɔ ebe naa ni ato he gbɛjianɔ aha wɔ lɛ atoi jogbaŋŋ.