Mɛni Haa Omii Shɛɔ Ohe?
1. Mɛni haa wɔmii shɛɔ wɔhe kɛ́ nyɔɔŋ gbo lɛ?
1 Daa kɛ́ nyɔɔŋ gbo ni abi ni mɔ fɛɛ mɔ kɛ eshiɛmɔyaa he akɔntaabuu aha lɛ, mɛni haa omii shɛɔ ohe? (Gal. 6:4) Kɛ́ wɔji gbɛgbalɔi krɛdɛɛ ni kɛ ŋmɛlɛtswai 130 haa loo wɔji shiɛlɔi ni akpɛlɛ amɛnɔ akɛ amɛbaanyɛ amɛkɛ minitii 15, 30 kɛ 45 aha jio lɛ, esa akɛ wɔ fɛɛ wɔmii ashɛ wɔhe akɛ wɔnyɛ wɔkɛ wɔsusuma muu fɛɛ esɔmɔ Yehowa.—Lala 100:2.
2. Mɛni hewɔ esa akɛ wɔjɛ wɔtsuiŋ fɛɛ wɔkɛ wɔhe awo Yehowa sɔɔmɔ mli lɛ?
2 Yehowa, ni ji jeŋ muu fɛɛ Nuŋtsɔ Maŋtsɛ lɛ ji mɔ ni esa akɛ wɔkɛ wɔnibii ni hi fe fɛɛ lɛ asɔmɔ. (Mal. 1:6) Suɔmɔ ni wɔyɔɔ kɛha lɛ lɛ hewɔ lɛ, wɔjɔɔ wɔwala nɔ wɔha lɛ. No hewɔ lɛ, kɛ́ yɛ gbi lɛ naagbee loo nyɔɔŋ lɛ naagbee lɛ, wɔná nɔmimaa akɛ wɔjɛ wɔtsuiŋ fɛɛ wɔkɛ wɔbe, wɔhesai, kɛ wɔnyɛmɔ etsu nii yɛ Yehowa sɔɔmɔ mli lɛ, wɔyɛ nɔ ni wɔɔdamɔ nɔ wɔmii ashɛ wɔhe. (Abɛi 3:9) Kɛlɛ, kɛ́ wɔhenilee kɛɛ wɔ akɛ kulɛ wɔbaanyɛ wɔfee fe bɔ ni wɔfee lɛ, no lɛ, esa akɛ wɔkwɛ nɔ ni ehe baahia ni wɔfee koni wɔya wɔhiɛ.—Rom. 2:15.
3. Mɛni hewɔ nilee bɛ mli akɛ wɔkɛ wɔhe aaato mɛi krokomɛi ahe lɛ?
3 ‘Okɛ Ohe Akato Mɔ Kroko He’: Nilee bɛ mli akɛ wɔkɛ wɔhe aaato mɛi krokomɛi ahe, loo wɔkɛ bɔ ni wɔji be ko ni eho beni wɔyɔɔ gbɔmɔtsoŋ hewalɛ lɛ aaato bɔ ni wɔyɔɔ amrɔ nɛɛ he. Shihilɛ lɛ tsakeɔ. Soro mɔ fɛɛ mɔ kɛ enyɛmɔ. Bei pii lɛ, kɛ́ akɛ mɔ ko to mɔ kroko he lɛ, akaŋshii teɔ shi loo ehaa mɔ nuɔ he akɛ ehe be sɛɛnamɔ ko. (Gal. 5:26; 6:4) Yesu kɛ mɔ ko etooo mɔ kroko he. No najiaŋ lɛ, ejie mɛi ayi yɛ nibii ni amɛnyɛ amɛtsu lɛ naa.—Mar. 14:6-9.
4. Mɛɛ nikasemɔi ni he hiaa waa wɔbaanyɛ wɔkase yɛ Yesu abɛbua ni kɔɔ talentai lɛ ahe lɛ mli?
4 Yɛ Yesu abɛbua ni kɔɔ talentai lɛ ahe lɛ mli lɛ, nitsulɔ fɛɛ nitsulɔ nine shɛ talentai “ni eeenyɛ he nii etsu” lɛ nɔ. (Mat. 25:15, Ga Biblia hee) Beni amɛnuŋtsɔ lɛ ku esɛɛ eba ebabi ni amɛbu amɛnitsumɔ lɛ he akɔntaa lɛ, ejie mɛi ni bɔ mɔdɛŋ amɛtsu bɔ ni amɛnyɛmɔ kɛ amɛshihilɛ ŋmɛ amɛ gbɛ lɛ ayi, ni aha amɛbote amɛnuŋtsɔ lɛ miishɛɛ lɛŋ. (Mat. 25:21, 23) Nakai nɔŋŋ beni wɔ hu wɔkɛ hiɛdɔɔ shiɛɔ Maŋtsɛyeli lɛ he sane lɛ, wɔbaanyɛ wɔná hekɛnɔfɔ̃ɔ akɛ Nyɔŋmɔ baaná wɔhe miishɛɛ, ni no baaha wɔmii ashɛ wɔhe!