Wɔji Shiɛlɔi Be Fɛɛ Be
1. Te wɔfeɔ tɛŋŋ wɔleɔ akɛ shiɛlɔi ni hi shi yɛ klɛŋklɛŋ afii 100 lɛ mli lɛ bu amɛhe akɛ amɛji shiɛlɔi be fɛɛ be lɛ?
1 Klɛŋklɛŋ afii 100 lɛ mli shiɛlɔi ni yɔɔ ekãa lɛ shiɛ sanekpakpa lɛ yɛ he fɛɛ he ni amɛbaana mɛi yɛ, ni “amɛfɔ̃ɔɔ.” (Bɔf. 5:42) Ekã shi faŋŋ akɛ, kɛ́ amɛmiiya amɛyashiɛ yɛ shĩa kɛ shĩa ni amɛkɛ mɛi kpe yɛ gbɛ lɛ nɔ lɛ, amɛhooo amɛhe efolo. Asaŋ, kɛ́ amɛkpa shiɛmɔ ni amɛyatsɔ jara nɔ koni amɛhe nii lɛ, amɛhaaa hegbɛ ko ni amɛbaanyɛ amɛkɛye odase lɛ aŋmɛɛ amɛ. Taakɛ Yesu fee lɛ, amɛbu amɛhe akɛ amɛji shiɛlɔi be fɛɛ be.—Mar. 6:31-34.
2. Mɛni wɔgbɛ́i lɛ ní wɔɔhi shi yɛ naa lɛ biɔ ni wɔfee?
2 Esa akɛ Wɔsaa Wɔhe Wɔto Be Fɛɛ Be: Wɔgbɛ́i Yehowa Odasefoi lɛ tsɔɔ mɛi ni wɔji, shi jeee nɔ ni wɔfeɔ pɛ kɛkɛ. (Yes. 43:10-12) No hewɔ lɛ, wɔsaa wɔhe wɔtoɔ be fɛɛ be kɛfãa wɔhemɔkɛyeli lɛ he kɛ́ wɔnyiɛɛɛ shĩa kɛ shĩa shiɛmɔ nɔ po. (1 Pet. 3:15) Ani otsɔɔ hiɛ osusuɔ shihilɛi komɛi ni baanyɛ aha oná hegbɛ kɛye odase beni onyiɛɛɛ shiɛmɔ nɔ lɛ ahe, ni no sɛɛ lɛ, osusuɔ nɔ ni obaanyɛ owie lɛ he? Ani ohiɛɔ woji yɛ ohe koni okɛha mɛi ni baajie miishɛɛ kpo lɛ? (Abɛi 21:5) Ani shĩa kɛ shĩa pɛ oshiɛɔ yɛ, aloo oshiɛɔ sanekpakpa lɛ ohaa mɛi yɛ hei krokomɛi kɛ́ shihilɛ lɛ baaŋmɛ gbɛ?
3. Mɛni ji gbɛ́i ni sa jogbaŋŋ kɛha odase ni wɔyeɔ yɛ gbɛjegbɛi ahe, tsɔji amaamɔhei, shwɛmɔhei, nitsumɔhei, kɛ hei krokomɛi lɛ?
3 “Maŋ” Odaseyeli: Bɔfo Paulo kɛɛ akɛ eshiɛ yɛ “faŋŋ” kɛ shĩa fɛɛ shĩa. (Bɔf. 20:20) No hewɔ lɛ, gbɛ́i ni sa kɛha odasei ni wɔyeɔ yɛ gbɛjegbɛi ahe, tsɔji amaamɔhei, shwɛmɔhei, nitsumɔhei, kɛ hei krokomɛi lɛ ji “maŋ” odaseyeli. Eji anɔkwale akɛ, shĩa kɛ shĩa shiɛmɔ nitsumɔ lɛ kã he eji gbɛ titri kɛ gbɛ ni mɔɔ shi fe fɛɛ ni wɔtsɔɔ nɔ wɔshiɛɔ Maŋtsɛyeli shɛɛ sane lɛ wɔtsɔɔ mɛi. Ni kɛlɛ, klɛŋklɛŋ afii 100 lɛ mli shiɛlɔi lɛ kɛ amɛjwɛŋmɔ ma gbɔmɛi anɔ, shi jeee shĩai anɔ. Amɛkɛ hegbɛ fɛɛ hegbɛ ni amɛná lɛ tsu nii kɛwie anɔkwale lɛ he—yɛ maŋ, beni amɛnyiɛɛɛ shiɛmɔ nɔ, kɛ shĩa kɛ shĩa. Nyɛhaa wɔ hu wɔnáa jwɛŋmɔ ni tamɔ nakai nɔŋŋ koni wɔgbe wɔsɔɔmɔ lɛ naa kwraa.—2 Tim. 4:5.