Ani Okɛ Fɛɛ Miitsu Nii Jogbaŋŋ?
1 “Mihe miitswa shi kɛkɛ ni mikɛyatsu nii yɛ shiɛmɔ nitsumɔ lɛ mli!” Nakai ji bɔ ni nyɛmi yoo ko ŋma beni ekane January 1, 2008 Buu-Mɔɔ lɛ. Ani okwɛ saneyitsei ni jeɔ kpo daa yɛ maŋbii anɔ lɛ mli lɛ ekomɛi amli, ni otao gbɛ̀i anɔ ni obaatsɔ okɛha yɛ shiɛmɔ nitsumɔ lɛ mli?
2 “Nɔ ni Wɔkaseɔ Kɛjɛɔ Yesu Ŋɔɔ”: Ekolɛ oyɔse akɛ nɛkɛ fã nɛɛ yeɔ ebuaa kɛha Biblia mli nikasemɔ shishijee. Kɛ́ ofeko nakai dã lɛ, bɔɔ mɔdɛŋ ni okane saneyitso lɛ oha shĩatsɛ lɛ koni no sɛɛ lɛ otsɔɔ lɛ nɔ ni Yesu wie yɛ sane lɛ he, taakɛ atsɔɔ yɛ klɛŋklɛŋ kuku lɛ mli lɛ. Kɛ́ mɔ ko jie miishɛɛ kpo klɛŋklɛŋ kwraa lɛ, bɔɔ mɔdɛŋ ni okɛ saneyitsei bibii ni afee lɛ sanebimɔi ni haa mɔ susuɔ nii ahe lɛ atsu nii kɛtsa sanegbaa lɛ nɔ. Ha mɔ lɛ awie sanebimɔ lɛ he. Kɛ́ mfoniri ko yɛ mli ni kɔɔ sane lɛ he lɛ, okɛ be fioo ko awie he, ni okɛ kuku ni nyiɛ sɛɛ lɛ atsa nɔ. Ekolɛ gbi klɛŋklɛŋ kwraa ni obaaya jɛmɛ lɛ, obaanyɛ owie sane lɛ klɛŋklɛŋ fã lɛ he, ni okɛ lɛ awie fã ni eshwɛ lɛ he kɛ́ oku osɛɛ otee eŋɔɔ ekoŋŋ. Saamɔ ohe ni okɛ Biblia lɛ Tsɔɔ wolo lɛ atsa nikasemɔ lɛ nɔ.
3 “Nibii ni Haa Miishɛɛ Hiɔ Weku Mli”: Ato saneyitso ni jeɔ kpo daa nyɔji etɛ nɛɛ he gbɛjianɔ koni akɛye abua wumɛi, ŋamɛi, kɛ fɔlɔi koni amɛna bɔni amɛbaafee amɛkɛ Biblia mli shishitoo mlai atsu nii kɛ́ amɛkɛ naagbai ni haaa toiŋjɔlɛ ahi weku lɛ mli lɛ kpe. Obaanyɛ okɛ saji nɛɛ atsu nii hu ni okɛye obua mɛi ni jeee Odasefoi lɛ koni amɛna nilee ni yɔɔ Biblia lɛ mli.—2 Tim. 3:16, 17.
4 Saji Kɛha Oblahii kɛ Oblayei: Ato saneyitso ni ji “Kɛha Oblahii kɛ Oblayei” lɛ he gbɛjianɔ koni eye ebua kanelɔ lɛ ni esusu Biblia mli sane pɔtɛɛ ko he ni ejwɛŋ nɔ. Obaanyɛ okɛ saji nɛɛ atsu nii ni okɛye obua oblahii kɛ oblayei ni okɛkpeɔ yɛ oshikpɔŋkuku lɛ mli lɛ, koni amɛna sɛɛnamɔi ni yɔɔ Nyɔŋmɔ Wiemɔ lɛ kasemɔ he. (Lala 119:9, 105) Kɛ́ okɛ fɔlɔ ko miiwie lɛ, obaanyɛ owie saneyitso ni ji “Tsɔɔmɔ Obii lɛ Anii” ni jeɔ kpo daa nyɔji enyɔ lɛ he. Saji nɛɛ baanyɛ aye abua gbekɛbii ni darako tsɔ lɛ koni amɛkase nibii ni he hiaa kɛjɛ mɛi ni awie amɛhe yɛ Biblia lɛ mli lɛ ahe. Ani okɛ obii lɛ miikane saji nɛɛ?
5 Nibii Krokomɛi ni Fata He: Daa nyɔɔŋ nɔ lɛ, saneyitso ni ji “Saji ni Mɛi ni Kaneɔ lɛ Biɔ” lɛ gbálaa sanebimɔi ni mɛi ni jeee Odasefoi lɛ baanyɛ abi lɛ mli. Obaanyɛ owie sane nɛɛ he beni okɛ woji tɛtrɛbii lɛ haa yɛ shĩa kɛ shĩa lɛ. Sane ni ji “Amaniɛbɔɔ ni Jɛ . . .” lɛ ji amaniɛbɔi ni maŋsɛɛ sanekpakpa shiɛlɔi kɛ mɛi krokomɛi ni yɔɔ je lɛŋ hei srɔtoi fɛɛ lɛ kɛhaa ni tsɔɔ naagbai ni amɛkɛkpeɔ yɛ amɛshiɛmɔ nitsumɔ lɛ mli. Saji nɛɛ baanyɛ aye abua mɛi ni yɔɔ wiemɔ lɛ he miishɛɛ lɛ ni amɛna akɛ aashiɛ sanekpakpa lɛ yɛ je lɛŋ fɛɛ, ni akɛye okadi ni tsɔɔ akɛ Kristo eje enɔyeli lɛ shishi lɛ he odase.—Mat. 24:3, 14.
6 Sane ni baa daa nyɔɔŋ ni yitso ji “Tsi Obɛŋkɛ Nyɔŋmɔ,” ni damɔ Teokrase Sɔɔmɔ Skul lɛ mli Biblia kanemɔ lɛ nɔ lɛ baanyɛ atsirɛ mɛi ni yɔɔ wiemɔ lɛ he miishɛɛ lɛ ni amɛkase Yehowa he nii babaoo. Ato saneyitso ni ji “Kasemɔ Amɛhemɔkɛyeli Lɛ” ni jeɔ kpo shii ejwɛ yɛ afi mli lɛ he gbɛjianɔ ni akɛye abua mɛi koni amɛnyɛ amɛfee Biblia mli amaniɛbɔi ahe mfoniri yɛ amɛjwɛŋmɔŋ, ni eha mɛi ni kaneɔ Biblia lɛ ŋmɛnɛ lɛ anu nibii ni mɛi ni awie amɛhe yɛ Biblia lɛ mli lɛ hala, naagbai ni amɛkɛkpe, kɛ hemɔkɛyeli ni amɛjie lɛ kpo lɛ shishi jogbaŋŋ.
7 Kwɛ bɔ ni wɔmii shɛɔ wɔhe waa akɛ daa nyɔɔŋ nɔ lɛ wɔnine shɛɔ Buu-Mɔɔ muu lɛ fɛɛ ni ato he gbɛjianɔ koni wɔkɛtsu nii yɛ shiɛmɔ nitsumɔ lɛ mli lɛ nɔ! Belɛ, nyɛhaa wɔbɔa mɔdɛŋ ni wɔle emli nibii lɛ fɛɛ fitsofitso, koni wɔkɛ efãi srɔtoi lɛ fɛɛ atsu nii jogbaŋŋ yɛ wɔshiɛmɔ nitsumɔ lɛ mli.