‘Saamɔ Ohe Oha Nitsumɔ Kpakpa Fɛɛ Nitsumɔ Kpakpa’
1 Beni Yesu je shiɛmɔ nitsumɔ he tafãa ko shishi lɛ, ehé be ni ekɛtsɔɔ ekaselɔi lɛ nii. (Mat. 10:5-14) Eyɛ mli akɛ wɔ fɛɛ wɔbɛ dekã moŋ, shi minitii fioo ni wɔkɛaasaa wɔhe dani wɔkɛ wɔhe awo shĩa kɛ shĩa nitsumɔ lɛ mli lɛ baawo yibii kpakpai.—2 Kor. 9:6.
2 Gbɛ Nɔ ni Wɔbaatsɔ Wɔsaa Wɔhe: Wɔbaanyɛ wɔsaa wɔhe jogbaŋŋ kɛtsɔ wolo ni wɔto ni wɔkɛbaaha lɛ mli nibii ní wɔɔle kɛtsɔ hiɛ lɛ nɔ. Esa akɛ wɔsusu mɛi ni yɔɔ wɔshikpɔŋ kuku lɛ mli lɛ hu ahe. Mɛɛ saji gbáa amɛnaa? Mɛɛ jamɔ mli hemɔkɛyelii amɛbaanyɛ amɛjie lɛ kpo? Wɔbaanyɛ wɔná gbɛtsɔɔmɔi komɛi kɛjɛ Wɔ Maŋtsɛyeli Sɔɔmɔ lɛ kɛ Reasoning From the Sciptures wolo lɛ mli.
3 Kɛ́ wɔbo nɔkwɛmɔnii ni jeɔ kpo yɛ Sɔɔmɔ Kpee lɛ mli lɛ atoi jogbaŋŋ lɛ, no hu baaye abua wɔ. Beni wɔhe saa yɛ shiɛmɔ wiemɔi lɛ kɛ nitsumɔ mli lɛ, ebaaha wɔkɛ be fioo pɛ asaa wɔhe. Shi kɛji akɛ be fɛɛ be ni wɔbaaya shiɛmɔ lɛ, wɔtsɔɔ hiɛ wɔsusuɔ nɔ ni wɔbaawie lɛ he, ni wɔtee nɔ wɔha shiɛmɔ wiemɔ ni wɔkɛtsuɔ nii lɛ fee nɔ ni mɔɔ shi lɛ, ebaaha wɔhe asa jogbaŋŋ. Esa akɛ wɔkɛ be fioo akwɛ akɛ woji fɛɛ ni he baahia wɔ lɛ yɛ baagi ni wɔkɛyaa shiɛmɔ lɛ mli lo.
4 Mɛni baaye abua wɔ koni wɔkai shiɛmɔ wiemɔ ni wɔkɛbaatsu nii lɛ? Gbɛ kome ni wɔbaanyɛ wɔtsɔ nɔ wɔha shiɛmɔ wiemɔ lɛ aka wɔjwɛŋmɔŋ ji, ni wɔɔwie lɛ waa be ni wɔkaseɔ lɛ. Mɛi komɛi feɔ enɛ he nɔkwɛmɔnɔ kɛ́ amɛmiifee amɛweku nikasemɔ. Mɛi komɛi hu ena akɛ kɛ́ amɛŋma amɛshiɛmɔ wiemɔ lɛ yɛ wolo bibioo ko nɔ, ni amɛkwɛ mli dani amɛbote shĩa ko mli lɛ, eyeɔ ebuaa.
5 Nɔ Hewɔ ní Sɛɛnamɔ Yɔɔ He: Kɛ́ wɔsaa wɔhe jogbaŋŋ lɛ, ehaa wɔshiɛmɔ nitsumɔ lɛ mɔɔ shi, ni wɔnáa miishɛɛ babaoo. Ehaa wɔnáa ekãa, ni kɛ́ wɔdamɔ shinaa ko naa lɛ wɔsheee gbeyei. Ehaa wɔboɔ shiatsɛ lɛ toi jogbaŋŋ, ni wɔɔfeee yeyeeye yɛ nɔ ni wɔbaawie lɛ he. Kɛfata he lɛ, kɛ́ wɔle saji ni yɔɔ wolo ni wɔkɛbaaha lɛ mli lɛ, ebaaye ebua wɔ koni wɔkɛ wolo lɛ aha kɛ miishɛɛ.
6 Ŋmalɛi lɛ woɔ wɔ hewalɛ ni ‘wɔsaa wɔhe wɔha nitsumɔ kpakpa fɛɛ nitsumɔ kpakpa.’ (Tito 3:1) Nitsumɔ kpakpa ko kwraa bɛ ní abaanyɛ akɛto sanekpakpa ni wɔshiɛɔ lɛ he. Kɛ́ wɔsaa wɔhe jogbaŋŋ lɛ, ehaa wɔjieɔ bulɛ kpo wɔtsɔɔ shiatsɛ ni efee klalo akɛ ebaabo wɔ toi lɛ, kɛ Yehowa Nyɔŋmɔ, mɔ najiaŋ ni wɔdamɔ lɛ.—Yes. 43:10.