Ani Be ko Baaba ni Mɛi Baahi Shi yɛ Toiŋjɔlɛ Mli Daa?
“Anunyam aha Nyɔŋmɔ yɛ ŋwɛi flooflo, ní hejɔlɛ ahi gbɔmɛi ni aná amɛhe tsuijurɔ yɛ shikpɔŋ lɛ nɔ lɛ ateŋ.”—Luka 2:14, NW.
MƐI akpekpei abɔ le Yesu fɔmɔ he adafitswaa nɛɛ ni Nyɔŋmɔ ŋwɛibɔfoi kɛyaha tookwɛlɔi komɛi ni miikwɛ amɛtooi yɛ ŋa nɔ gbɛkɛ lɛ jogbaŋŋ. Kɛ́ eshɛ be ni sɔlemɔi lɛ susuɔ akɛ no mli afɔ́ Yesu lɛ, mɛi ni tsɛ́ɔ amɛhe Kristofoi lɛ ateŋ mɛi babaoo bɔɔ mɔdɛŋ akɛ amɛba amɛjeŋ jogbaŋŋ. Kɛ́ eshɛ Blonya lɛ, mɛi bɔɔ mɔdɛŋ koni amɛmii ashɛ amɛhe, amɛkɛ mɛi ahi shi yɛ toiŋjɔlɛ mli, ní asaŋ amɛná mɛi ahe tsuijurɔ—sui tamɔ enɛɛmɛi je kpo yɛ ŋwɛibɔfoi lɛ adafitswaa lɛ mli.
Mɛi ni amɛbuuu Blonyayeli akɛ eji jamɔ gbijurɔyeli lɛ po náa sui kpakpai ni tamɔ enɛɛmɛi lɛ ahe miishɛɛ. Amɛ hu amɛnyaa suɔmɔ ni gbijurɔyeli nɛɛ haa mɛi jieɔ lɛ kpo lɛ he. Kɛ́ eshɛ Blonya ni skulbii ha gbɛ ni nitsulɔi hu ba hejɔɔmɔ lɛ, no haa mɛi náa hegbɛ amɛjɔɔ amɛhe, ni amɛnáa be amɛhaa amɛwekumɛi kɛ amɛnanemɛi, ni amɛfeɔ ekome kɛnáa amɛhewɔ miishɛɛ. Yɛ anɔkwale mli lɛ, mɛi babaoo ni hiɛ tsuijurɔ lɛ buɔ Blonya akɛ eji be titri ni sa akɛ akɛwo Yesu Kristo hiɛ nyam.
Yɛ bɔ ni mɛi buɔ Blonyayeli amɛhaa lɛ fɛɛ sɛɛ lɛ, mɛi babaoo kpɛlɛɔ nɔ akɛ miishɛɛ kɛ toiŋjɔlɛ ni ekɛbaa lɛ sɛɛ etsɛɛɛ. Kɛ́ aye Blonya lɛ atã lɛ, etsɛɛɛ ni mɛi kuɔ amɛsɛɛ kɛyaa amɛsa jeŋba lɛ mli ekoŋŋ. Wolo ko ni Royal Bank ni yɔɔ Canada lɛ ŋma lɛ tsɔɔ mli akɛ: “Daa afi lɛ, otsii fioo komɛi pɛ mɛi babaoo ni tsɛ́ɔ amɛhe Kristofoi lɛ bɔɔ mɔdɛŋ akɛ amɛhi shi yɛ nakai gbɛi lɛ naa, ni amɛfeɔ enɛ kɛtsɔ mɛi krokomɛi ejurɔ ni amɛfeɔ [yɛ Blonya beaŋ] kɛyashiɔ ayeɔ Afi Hee lɛ nɔ. No sɛɛ lɛ, amɛkuɔ amɛsɛɛ kɛyaa amɛpɛsɛmkunya nifeemɔi lɛ amli, ni amɛkuɔ amɛhiɛ amɛshwieɔ mɛi krokomɛi ahilɛ-kɛhamɔ nɔ.” Wolo lɛ kɛfata he akɛ, “nɔ ni ehiii kwraa” yɛ Blonyayeli he ji akɛ, mɛi eyaaa nɔ amɛjieee sui kpakpai ni amɛjieɔ lɛ kpo yɛ nakai beaŋ lɛ akpo yɛ “afi muu lɛ fɛɛ mli.”
Kɛ́ okpɛlɛɔ nɔ ni wolo lɛ kɛɛ lɛ nɔ jio, okpɛlɛɛɛ nɔ jio lɛ, nɔ ni ekɛɛ lɛ téeɔ sanebimɔi komɛi ni he hiaa ashi. Nomɛi ji, ani be ko baashɛ ni mɛi baajie mlihilɛ kpo amɛtsɔɔ amɛhe ní amɛna mli amɛha amɛhe daa? Ani hiɛnɔkamɔ yɛ diɛŋtsɛ akɛ sane ni ŋwɛibɔfoi lɛ jaje yɛ gbi gbɛkɛ ni afɔ́ Yesu lɛ baaba mli, aloo eji yaka hiɛnɔkamɔ akɛ mɔ aaasusu akɛ toiŋjɔlɛ diɛŋtsɛ baaba?