“Nyɛtsia Nyɛbɛŋkɛa Nyɔŋmɔ, ni Eeetsi Eeebɛŋkɛ Nyɛ”

Be ni Tsɔ Hiɛ kɛ No Sɛɛ—Bɔ ni Biblia lɛ Tsake Nuu Nɛɛ

NƆ NI he hiaa fe fɛɛ yɛ Rolf-Michael shihilɛ mli ji lala. Tsofai fɔji kɛ nitsumɔ ji nɔ ni he ni ejwɛŋɔ daa. Ákɛ oblanyo ni yɔɔ Germany lɛ, enuɔ dãa babaoo ni ekɛ LSD, kokein, hashish, kɛ tsofai krokomɛi ni náa mɔ jwɛŋmɔ nɔ hewalɛ lɛ tsuɔ nii ní mɔ ko etsĩii enaa.

Amɔ Rolf-Michael beni ebɔɔ mɔdɛŋ ni ekɛ tsofai fɔji aju shi kɛya Afrika maŋ ko mli lɛ, ni eyaye nyɔji 13 yɛ tsuŋwoo mli. Nakai tsuŋwoo lɛ ha ená be koni ekɛsusu yiŋtoo diɛŋtsɛ ni yɔɔ shihilɛ sɛɛ lɛ he.

Rolf-Michael kɛ eŋa Ursula, kɛ hehiamɔ tao shishinumɔ ni yɔɔ shihilɛ mli, ni amɛtao anɔkwale lɛ. Yɛ niiashikpamɔi ni ehiii ni amɛná yɛ nɔ ni akɛɛ atsɛɔ amɛ Kristofoi asɔlemɔi amli lɛ fɛɛ sɛɛ lɛ, amɛná shwelɛ ni mli wa akɛ amɛaaná amɛle Nyɔŋmɔ. Shi amɛyɛ sanebimɔi ni amɛnáaa hetooi ni haa mɔ tsui nyɔɔ emli kɛjɛɛɛ jamɔ kui srɔtoi lɛ adɛŋ. Kɛfata he lɛ, nɛkɛ jamɔi nɛɛ haaa amɛná kanyamɔ ni mli wa ni baaha amɛtsake amɛshihilɛ.

Yɛ naagbee lɛ, Rolf-Michael kɛ Ursula kɛ Yehowa Odasefoi kpe. Ŋaawoo akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ” lɛ tsirɛ Rolf-Michael waa diɛŋtsɛ be mli ní amɛbɔi Biblia lɛ kasemɔ lɛ sɛɛ. (Yakobo 4:8) Etswa efai shi akɛ ‘ebaashɛ́ esá jeŋba lɛ naa gbɔmɔ momo lɛ efɔ̃ ni ewo gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.’—Efesobii 4:22-24.

Te Rolf-Michael aaafee tɛŋŋ ewo gbɔmɔ hee lɛ? Atsɔɔ lɛ kɛjɛ Biblia lɛ mli akɛ, ‘kɛtsɔ anɔkwa nilee nɔ’ lɛ, mɔ aŋkro ko su kɛ baŋ baanyɛ ‘afee ehee ekoŋŋ yɛ mɔ ni bɔ lɛ’ ni ji Yehowa Nyɔŋmɔ lɛ ‘subaŋ naa.’—Kolosebii 3:9-11.

Be mli ni Rolf-Michael bɔi anɔkwale lɛ kasemɔ lɛ, ebɔ mɔdɛŋ koni eha eshihilɛ kɛ Nyɔŋmɔ Wiemɔ lɛ mli shishitoo mlai lɛ akpã gbee. (Yohane 17:3) Ewa kɛha Rolf-Michael akɛ ebaakpa tsofai fɔji kɛ nitsumɔ, shi ena bɔ ni Yehowa ni aaabɛŋkɛ lɛ yɛ sɔlemɔ mli ní aná edɛŋ yelikɛbuamɔ lɛ jara wa ha lɛ. (1 Yohane 5:14, 15) Yelikɛbuamɔ ni fata he lɛ jɛ naanyobɔɔ ni yɔɔ gbagbalii ni ekɛ mɛi ni ji Yehowa Odasefoi momo, ni miibɔ mɔdɛŋ akɛ amɛaafee Nyɔŋmɔ suɔmɔnaa nii lɛ bɔ lɛ mli kɛba.

Le ni Rolf-Michael ná ele akɛ je lɛ miiho aya ni ákɛ mɛi ni feɔ Nyɔŋmɔ suɔmɔnaa nii lɛ baahi shi kɛya naanɔ lɛ hu ye ebua lɛ. Eha enyɛ ehala naanɔ jɔɔmɔ ni jɛɔ wekukpaa ni yɔɔ gbagbalii ni akɛ suɔmɔ Nyɔŋmɔ Yehowa aaaná lɛ mli lɛ, shi jeee be kukuoo je lɛ suɔmɔ lɛ. (1 Yohane 2:15-17) Wiemɔi ni yɔɔ Abɛi 27:11 lɛ sa Rolf-Michael tsui he waa akɛ: “Mibi, feemɔ ohe nilelɔ, ní oha mitsui anyɔ mimli, ní maná hetoo maha mɔ ni bɔɔ mi ahora lɛ.” Ekɛ hiɛsɔɔ wie akɛ: “Nɛkɛ kuku nɛɛ tsɔɔ bɔ ni Yehowa suɔmɔ lɛ mli kwɔ ha, akɛni ehaa adesai hegbɛ koni amɛha etsui anyɔ emli lɛ hewɔ.”

Taakɛ Rolf-Michael, eŋa, kɛ amɛbii etɛ lɛ ji lɛ, mɛi akpei ohai abɔ ená Biblia mli shishitoo mlai asɛɛ ni amɛnyiɛɔ lɛ he sɛɛ. Abaanyɛ ana nɛkɛ aŋkroaŋkroi nɛɛ yɛ Yehowa Odasefoi asafoi amli yɛ je lɛŋ fɛɛ. Dɔlɛ sane ji akɛ, yɛ maji komɛi amli lɛ afolɔɔ Odasefoi lɛ anaa yɛ gbɛ ni ejaaa nɔ akɛ amɛji kuu ko ni he yɔɔ oshara ni gbálaa wekui amli. Rolf-Michael niiashikpamɔ lɛ tsɔɔ akɛ jeee nakai eji.—Hebribii 4:12.

Rolf-Michael kɛɛ akɛ Mateo 6:33, ni woɔ wɔ ŋaa koni wɔkɛ mumɔŋ nibii asɛɛtiumɔ aye klɛŋklɛŋ gbɛhe lɛ ji eweku lɛ “kɔmpase” ni tsɔɔ amɛ gbɛ ni ja yɛ shihilɛ mli. Lɛ kɛ eweku lɛ daa Yehowa shi waa kɛha weku shihilɛ ni yɔɔ miishɛɛ ni amɛnáa mli ŋɔɔmɔ ákɛ Kristofoi lɛ. Amɛkɛ henumɔi ni lalatsɛ lɛ jie lɛ kpo lɛ kpãa gbee, mɔ ni lá akɛ: “Mɛni maŋɔto Yehowa najiaŋ yɛ ejurɔ fɛɛ ni efee mi lɛ hewɔ?”—Lala 116:12.

[Wiemɔ ni akɔ ni akɛmiitsu nii ni yɔɔ baafa 9]

Nyɔŋmɔ haa adesai hegbɛ koni amɛha etsui anyɔ emli

[Akrabatsa ni yɔɔ baafa 9]

Biblia Mli Shishitoo Mlai Miitsu Nii

Biblia mli shishitoo mlai ni ekanya mɛi pii koni amɛkwa nifeemɔi ni kaa mɔ he ni gbeɔ mɔ lɛ ateŋ ekomɛi ji nɔ ni nyiɛ sɛɛ nɛɛ:

“Nyɛ mɛi ni nyɛsumɔɔ Yehowa lɛ, nyɛnyɛ̃a efɔŋ!” (Lala 97:10) Kɛ́ mɔ ko yiŋ tsɔ yɛ efɔŋ ni nifeemɔi ni gbeɔ mɔ lɛ ji lɛ ahe, ni ená anɔkwa nyɛɛ kɛha amɛ lɛ, enáa lɛ mlɛo akɛ eeefee nɔ ni sa Nyɔŋmɔ hiɛ.

“Mɔ ni kɛ nilelɔi nyiɛɔ lɛ, eeetsɔ nilelɔ; shi mɔ ni kɛ kwashiai bɔɔ lɛ, eeená amane.” (Abɛi 13:20) Bɔni afee ni mɔ ko akpoo tsofai fɔji kɛ nitsumɔ kɛ tsofai krokomɛi ni anyɛɛɛ akpa ekɛ nitsumɔ lɛ, ehe miihia ni ekɛ henɔkwɛmɔ ahala nanemɛi ni ekɛbɔɔ. Kristofoi ni baafĩ eyiŋkpɛɛ lɛ sɛɛ ni ekɛaabɔ naanyo lɛ he yɛ sɛɛnamɔ lɛɛlɛŋ.

“Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!” (Filipibii 4:6, 7) Anyɛŋ aná tsuiŋ kɛ jwɛŋmɔŋ toiŋjɔlɛ ni tamɔ nɛkɛ kɛtsɔ nɔ kroko nɔ. Ni hekɛnɔfɔɔ ni anáa yɛ Nyɔŋmɔ mli kɛtsɔ sɔlemɔ nɔ lɛ yeɔ ebuaa mɔ koni ekpee shihilɛ mli naagbai anaa ní ekɛ ehe wooo tsofai fɔji ni anyɛɛɛ akpa ekɛ nitsumɔ lɛ mli.