2000 Ani Eji Afi Ni Sa Kadimɔ?
ANI nɔ ko srɔto ko yɛ afi 2000 lɛ he? Gbɔmɛi ni yɔɔ Anaigbɛ shikpɔji anɔ lɛ pii susuɔ akɛ eji klɛŋklɛŋ afi ni jeɔ afi akpei etɛ lɛ shishi. Aasaa he babaoo diɛŋtsɛ koni aye he gbi jurɔ. Akɛ ɛlɛtrik watsi wuji emamɔ shi koni akɛkane naagbee hiŋmɛitswai ni baaho dani afi akpe hee lɛ baaje shishi lɛ. Aato Afi Hee He Gbijurɔyeli he joi ahe gbɛjianɔ. Aahɔ̀ɔ atadei ni aŋmala wiemɔi ni kɔɔ afi akpe lɛ naagbee he yɛ maji ashwapoi kɛ maŋtiasei wuji ashwapoi hu amli.
Sɔlemɔi bibii kɛ ewuji fɛɛ baafata gbijurɔyeli ni baahe afi lɛ he. Aakpa gbɛ akɛ afi ni baa nɛɛ shishijee mli lɛ, Paapa John Paul II baafã gbɛ kɛya Israel koni eyanyiɛ Roma Katolikbii lɛ ahiɛ yɛ nɔ ni atsɛɔ lɛ akɛ “Roma Katolik Sɔlemɔ afi akpe gbijurɔyeli” lɛ mli. Ábu akɔntaa akɛ, kɛ hoo lɛ, saralɔi ni naa shɛɔ akpekpei enyɔ kɛ fã kɛmiishɛ akpekpei ekpaa, ni ji sɔlemɔyalɔi kɛ mɛi ni baasumɔ koni amɛna nɔ ni baaya nɔ lɛ miito gbɛjianɔ koni amɛya Israel afi ni baa nɛɛ.
Mɛni hewɔ mɛi pii toɔ gbɛjianɔ koni amɛya Israel? Beni Osɔfonukpa Roger Etchegaray, ni ji Vatican lɛ mli nitsulɔ lɛ wieɔ ehaa paapa lɛ, ekɛɛ akɛ: “Afi 2000 lɛ ji Kristo kɛ eshihilɛ yɛ shikpɔŋ nɛɛ nɔ lɛ he gbijurɔyeli. No hewɔ lɛ, eka shi faŋŋ akɛ Paapa lɛ baaba biɛ.” Mɛɛ gbɛ nɔ afi 2000 lɛ kɔɔ Kristo he yɛ? Nɔ ni asusuɔ titri ji akɛ, afi 2000 lɛ kadiɔ afii 2,000 pɛpɛɛpɛ ni afɔ́ Kristo. Shi ani nakai eji? Wɔbaana naa.
Afi 2000 lɛ he hiaa waa po kɛha jamɔ kui krokomɛi. Amɛheɔ amɛyeɔ akɛ, wɔsɛɛ afi aloo nɔ̃ lɛ, Yesu baaku esɛɛ kɛba Mu Gɔŋ lɛ nɔ, ni abaawuu Harmagedon ta ni awie he yɛ Kpojiemɔ wolo lɛ mli lɛ yɛ Megido jɔɔ lɛ mli. (Kpojiemɔ 16:14-16) Akɛni amɛmiikpa nifeemɔ nɛɛ gbɛ hewɔ lɛ, gbɔmɛi ohai abɔ ni yɔɔ U.S. lɛ miihɔ̀ɔ amɛshiai kɛ amɛ nibii pii, ni amɛmiishi kɛmiiya Israel. Bɔni afee ni mɛi fɛɛ ni nyɛɛɛ ashi amɛshiai lɛ aná he sɛɛ lɛ, abɔ amaniɛ akɛ U.S. osɔfo ko ni ale lɛ waa lɛ ewo shi akɛ, ebaatswa Yesu sɛɛkuu lɛ he adafi yɛ tɛlivishiŋ nɔ—yɛ faŋŋ mli!
Gbɛjianɔ ni atoɔ koni akɛhere afi akpei etɛ lɛ miiya hiɛ yɛ Anaigbɛ shikpɔji lɛ anɔ be fɛɛ be. Shi kɛlɛ, yɛ shikpɔji komɛi anɔ lɛ, gbɔmɛi miiya nɔ amɛmiitsu amɛnii taakɛ amɛfeɔ daa gbi lɛ nɔŋŋ. Nɛkɛ gbɔmɛi nɛɛ—ni ji je lɛŋ bii ayifalɛ kpotoo—heee amɛyeee akɛ Yesu ni jɛ Nazaret lɛ ji Mesia lɛ. Asaŋ amɛkpɛlɛɛɛ B.C.-A.D. ni akɛbuɔ be he akɔntaa lɛ nɔ.a Ákɛ nɔkwɛmɔnɔ lɛ, Muslimbii pii kɛ amɛ diɛŋtsɛ amɛ kalanda tsuɔ nii, ni yɛ no gbɛfaŋ lɛ, wɔsɛɛ afi baafee afi 1420—jeee afi 2000. Muslimbii buɔ afii lɛ ahe akɔntaa kɛjɛɔ be mli ni Muḥammad jo foi kɛjɛ Mecca kɛtee Medina lɛ. Yɛ jeŋ fɛɛ akɔntaabuu naa lɛ, gbɔmɛi kɛ kalandai srɔtoi 40 tsuɔ nii.
Ani esa akɛ afi 2000 lɛ ahiɛ shishinumɔ ko kɛha Kristofoi? Ani January 1, 2000 ji gbi krɛdɛɛ ko lɛɛlɛŋ? Abaaha sanebimɔi nɛɛ ahetoo yɛ sane ni nyiɛ sɛɛ lɛ mli.
[Shishigbɛ niŋmai]
a Yɛ bɔ ni akɛ B.C.-A.D. tsuɔ nii ahaa lɛ naa lɛ, akɛ “B.C.” afii (before Christ “dani Kristo ba”) tsuɔ nii kɛha nibii ni ba dani afɔ́ Yesu; akɛ “A.D.” afii (Anno Domini—“yɛ wɔ Nuntsɔ lɛ afi lɛ mli”) tsuɔ nii kɛha nibii ni ba yɛ no sɛɛ. Shi woloŋlelɔi komɛi sumɔɔ akɛ amɛkɛ “D.Ŋ.B.” (dani Ŋmɛnɛŋmɛnɛ Beaŋ) kɛ “Ŋ.B.” (Ŋmɛnɛŋmɛnɛ Beaŋ) atsu nii.