Maŋtsɛyeli Jajelɔi Bɔ Amaniɛ

Nyɔŋmɔ Wiemɔ lɛ Hewalɛ ni Ekɛtsakeɔ Mɔ

LƐ DIƐŊTSƐ edaaŋ wiemɔ tsɔɔ akɛ, tsutsu ko lɛ eji “musubɔlɔ kɛ yiwalɔ kɛ mɛi aniseniianifeelɔ.” (1 Timoteo 1:13) Shi etsake! Bɔfo Paulo tsakemɔ lɛ da waa aahu akɛ sɛɛ mli lɛ enyɛ ejaje faŋŋ akɛ: “Nyɛkasea mi, taakɛ bɔ ni mi hu mikaseɔ Kristo lɛ.”—1 Korintobii 11:1.

Ŋmɛnɛ, anɔkwa jálɔi akpei ohai abɔ ni yɔɔ je lɛŋ fɛɛ miifee tsakemɔi ni tamɔ nɛkɛ. Mɛni yeɔ ebuaa amɛ ni amɛfeɔ nakai? Amɛmiiná Nyɔŋmɔ Wiemɔ lɛ he nilee ni amɛkɛmiitsu nii yɛ amɛshihilɛi amli. Niiashikpamɔ ni nyiɛ sɛɛ lɛ maa Nyɔŋmɔ Wiemɔ lɛ hewalɛ ni ekɛtsakeɔ mɔ lɛ nɔ mi.

Gbalashihilɛ mli hefatalɔi komɛi ni edara saŋŋ kome pɛ hi shi yɛ akrowa ko klotia, yɛ Slovenia. Wu lɛ, Jože, eye aaafee afii 60 ni eyɛ naagba ko ni mli wa waa, ni ji daanumɔ. Shi kɛlɛ, ekwɛɔ eŋa, Ljudmila ni bɛ hewalɛ lɛ jogbaŋŋ. Gbi ko lɛ Maŋtsɛyeli jajelɔi enyɔ komɛi banina Jože. Efɔ̃ Odasefoi nɛɛ anine kɛtee eshia lɛ mli ni amɛyana eŋa hu. Beni enu Maŋtsɛyeli shɛɛ sane lɛ, miishɛɛ yaafonui ho yoo kɛjɛ Ljudmila hiŋmɛiaŋ. Jože hu na nɔ ni enu lɛ he miishɛɛ waa, ni ebibii saji pii. Beni amɛshi Biblia kasemɔ woji amɛha hefatalɔi nɛɛ, Odasefoi lɛ shi amɛ ni amɛtee.

Nyɔŋ kome sɛɛ lɛ, Odasefoi lɛ nyɛ amɛku amɛsɛɛ, ni amɛna Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ eko kã okpɔlɔ ko nɔ. Ni amɛbi Jože he ni ena wolo lɛ kɛjɛ lɛ, eha hetoo akɛ: “Mina akɛ atswa he adafi yɛ woji tɛtrɛbii ni nyɛshi nyɛha mi lɛ ekome sɛɛ. No hewɔ lɛ miŋma nyɛ nitsumɔ he ni yɔɔ Zagreb lɛ wolo ni mibi ni amɛha mi wolo lɛ.” Yɛ wiemɔ lɛ he miishɛɛ ni eyɔɔ nɛɛ hewɔ lɛ, amɛfɔ̃ lɛ nine akɛ eba Kristo gbele lɛ Kaimɔ ni abaafee yɛ Maŋtsɛyeli Asa lɛ nɔ lɛ. Nɔ ni fee Odasefoi lɛ miishɛɛ waa ji akɛ, nuu nɛɛ ba!

Etsɛɛɛ ni akɛ lɛ je Biblia mli nikasemɔ shishi, ni etee hiɛ waa. Akɛ nɔkwɛmɔ nɔ lɛ, beni ajɛ Biblia lɛ mli atsɔɔ Jože akɛ “kaafee amaga ko . . . oha ohe. Kaaja amɛ, ni kaasɔmɔ amɛ hu” lɛ, ekɛ oyaiyeli bua jamɔ mli amagai bibii ni yɔɔ eshia lɛ mli, kɛ mfonirii lɛ fɛɛ naa, ni eshɛrɛ fɛɛ eshwie.—2 Mose 20:4, 5.

Aatsu mumɔŋ anɔkwale lɛ he kumai ni yeɔ Jože lɛ he nii. Shi, dɔlɛ sane waa ji akɛ, nɔ kroko hu he kumai miiye lɛ waa. Afii 18 ni eho lɛ mli fɛɛ lɛ, enuɔ wein aaashɛ litai 10 daa gbi. Yɛ edaanumɔ naagba nɛɛ hewɔ lɛ, esusuuu bɔ ni anaa lɛ loo epueɔ yɛ mɛi ahiɛ lɛ he. Shi beni ebana ele bɔ ni Nyɔŋmɔ susuɔ yɛ dãa kɛ nitsumɔ yɛ gbɛ fɔŋ nɔ lɛ he lɛ, etswa efai shi akɛ ebaatsake.

Emia ehiɛ waa akɛ ebaaye edaanumɔ naagba lɛ nɔ fiofio, no hewɔ lɛ eŋmaa dãa falɛ ni enuɔ daa gbi lɛ efɔ̃ɔ shi. Etsɛɛɛ kɛkɛ ni ebaye ehe kɛjɛ daanumɔ nyɔŋyeli lɛ shishi. Beni eyaa nɔ yɛ e-Biblia mli nikasemɔ lɛ mli lɛ, ebana ele hu akɛ aabi ni anɔkwa Kristofoi ahiɛ gbɔmɔtsoŋ hetsemɔ kpakpa mli. No hewɔ lɛ, ejie shika eha Odasefoi lɛ ni ekɛɛ amɛ akɛ: “Ojogbaŋŋ, nyɛyahea atadei ni he baahia mi ni mihe atse jogbaŋŋ yɛ Kristofoi akpeei ashishi kɛ shiɛmɔ mli hu lɛ nyɛbahaa mi!” Odasefoi lɛ ku amɛsɛɛ kɛ kãmiisai, kaosui, aspaaterei, shɛɛtii, tai ni afĩɔ, kɛ baagi ni akɛ woji woɔ mli.

Beni amɛkɛ afi ekase Biblia lɛ sɛɛ lɛ, Jože kɛ Ljudmila basa akɛ amɛaafata Odasefoi lɛ ahe yɛ shia-kɛ-shia shiɛmɔ nitsumɔ lɛ mli. Nyɔji etɛ sɛɛ lɛ, amɛkɛ nu mli baptisimɔ fee amɛ henɔjɔɔmɔ kɛha Nyɔŋmɔ lɛ he okadi yɛ Yehowa Odasefoi akpokpaa wulu nɔ kpee ko shishi. Yɛ gbɔlɛ kɛ gbɔmɔtsoŋ helai lɛ fɛɛ sɛɛ lɛ, Jože kɛ ehe wo sanekpakpa lɛ shiɛmɔ mli be fɛɛ be, ni sɛɛ mli lɛ, ekɛ anɔkwayeli sɔmɔ akɛ asafoŋ sɔɔlɔ yɛ asafo lɛ mli, aahu kɛyashi egbo yɛ May, 1995 mli. Yibii kpakpai ni jɛ nuu heshibalɔ nɛɛ kɛ eŋa shihilɛ mli ba lɛ yeɔ Nyɔŋmɔ Wiemɔ lɛ hewalɛ ni ekɛtsakeɔ mɔ lɛ he odase!