“Wɔnyɛɛɛ wɔgba sane “folo po kɛkɛ!”
ESA akɛ Michael, ni eji mlalelɔ lɛ afee mɔ ni nyɛɔ egbaa sane waa. Enitsumɔ biɔ ni efee nakai. Shi beni ekɛ afii 16 ehi gbalashihilɛ mli sɛɛ lɛ, Michael bayoo akɛ kɛ ejɛ nitsumɔ ni eba eŋa, Adrian ŋɔɔ yɛ shia lɛ, efeɔ tamɔ nɔ ni esanegbaa gbɛi fɛɛ laajeɔ. Michael kaiɔ akɛ “mɔ kroko tɔmɔ taomɔ, nii ahe wiemɔ nyanyaanya, kɛ jɛmɔi bibii ni wɔjɛɔ wɔhe lɛ hewɔ lɛ, be fɛɛ be nɛɛ mikɛ Adrian miibe yɛ gbeekpamɔ ni bɛ wɔteŋ hewɔ, ni misusu akɛ kɛ nɛkɛ eeebalɛ lɛ, no lɛ ebaaha etɔ wɔ. Misusu akɛ ani nɛkɛ gbalashihilɛ ji, miishɛɛ ni bɛ kɛ jaramɔ shihilɛ miiya nɔ daa gbi. Kɛji nɛkɛ nibii baafee aha wɔ yɛ wɔwala gbii ni eshwɛ lɛ amli lɛ, no lɛ miitao magbala mihe shi—jeee ni miishwɛ. Minyɛŋ madamɔ nɛkɛ jaramɔ shihilɛ ni miiya hiɛ daa kɛ béi ni baahi shi afii 20, 30, 40 ni etsakeee nɛɛ naa.”
Eka shi faŋŋ akɛ jeee Michael kɛ Adrian pɛ yɔɔ henumɔi ni tamɔ nɛkɛ. Eji shihilɛ diɛŋtsɛ ni yɔɔ gbalashihilɛ mli hefatalɔi pii ni amɛshihilɛ tsakeɔ daa kɛjɛɔ nɔmɔ kɛyaa toiŋjɔlɛ mli, kɛkɛ lɛ etsake ekoŋŋ lɛ ateŋ. Sanegbaa fioo po nyɛɔ efɛɔ ni etsɔɔ wiemɔ mli tawuu. “Amɛnuɔ” nibii ni awieko po. Ni amɛwieɔ wiemɔi ni kulɛ amɛsumɔŋ ni amɛwie. Amɛtutuaa amɛhe ni amɛfolɔɔ amɛhe naa, kɛkɛ lɛ amɛgbala amɛhe shi kɛtee wiemɔ ni akɛ he ewieee dɔŋŋ mli, yɛ béi hewɔ. Amɛgbalaaa amɛmli, shi amɛjeee “heloo kome” hu dɔŋŋ. (1 Mose 2:24) Wekukpaa lɛ ebatsɔ nɔ ni efite kwraa. Sɛɛgbɛyaa baatsɔɔ amɛmligbalamɔ; hiɛhiɛyaa baatsɔɔ naagba lɛ naadaamɔ kɛ ehe nitsumɔ. Bɔni afee ni atsi he kɛjɛ enyɔ nɛɛ mli eko fɛɛ eko mli dɔlɛ lɛ he lɛ, nɛkɛ gbalashihilɛ mli hefatalɔi nɛɛ ateŋ mɔ fɛɛ mɔ tsiɔ ehe kɛjɛɔ mɔ kroko lɛ he yɛ henumɔŋ, ni amɛhiɔ shi nakai kɛkɛ.
Ehe miihia ni nɛkɛ gbalashihilɛ mli hefatalɔi nɛɛ ‘ana ŋaawoo kpakpa’ yɛ amɛgbalashihilɛ lɛ mli. (Abɛi 1:5) Nɛkɛ gbɛtsɔɔmɔ nɛɛ yɛ Nyɔŋmɔ Wiemɔ, ni ji Biblia lɛ mli. Paulo wolo ni ji enyɔ ni eŋma’ Timoteo lɛ maa nɔ mi akɛ Biblia lɛ “hi ha nitsɔɔmɔ kɛ hiɛkamɔ kɛ mɔ saamɔ.” (2 Timoteo 3:16) Enɛ bafeɔ anɔkwale yɛ gbalashihilɛ mli sanegbaa ni fiteɔ kwraa lɛ saamɔ mli, taakɛ wɔbaana lɛ.