Nɔ Ni Nyɔŋmɔ Maŋtsɛyeli lɛ Tsɔɔ Kɛha Mɛi Pii

YESU KRISTO wie Nyɔŋmɔ Maŋtsɛyeli lɛ he shii abɔ. Ni yinɔsaneŋmalɔ H. G. Wells ŋma yɛ enɛ he akɛ: “Bɔ ni Yesu ha tsɔɔmɔ ni kɔɔ nɔ ni etsɛ lɛ Ŋwɛi Maŋtsɛyeli lɛ he lɛ je kpo waa ha, kɛ bɔ ni ejeee nɔ ko kwraa yɛ Kristofoi asɔlemɔi lɛ anifeemɔ kɛ tsɔɔmɔ mli lɛ yɛ naakpɛɛ waa kɛ akɛto he. Nɛkɛ Ŋwɛi Maŋtsɛyeli nɛɛ he tsɔɔmɔ, ni no ji Yesu tsɔɔmɔ titri, ni naa gbɛfaŋnɔ bibioo ko pɛ yɛ Kristofoi ahemɔkɛyeli tsɔɔmɔi amli lɛ ji tsɔɔmɔi ni eka shi faŋŋ akɛ esoro amɛ kwraa yɛ fɛɛ eko he ni kanya ni agbɛnɛ etsake adesa susumɔ lɛ ateŋ ekome.”

Mɛni hewɔ nɔ ko bibioo ko pɛ sɔlemɔi lɛ yɔɔ kɛɛmɔ yɛ Nyɔŋmɔ Maŋtsɛyeli lɛ he lɛ? Yiŋtoo lɛ ekome baanyɛ afee akɛ amɛleee bɔ ni Maŋtsɛyeli lɛ ji. Mɛni ji jwɛŋmɔi ni ana yɛ he?

Bɔ ni Asusu Maŋtsɛyeli lɛ He Aha

Mɛi komɛi kɛɛ Katolek Sɔlemɔ lɛ ji Nyɔŋmɔ Maŋtsɛyeli lɛ. Beni osɔfonukpai lɛ kpɛlɛ Maŋtsɛ Konstantino nɔ akɛ amɛyitso yɛ Nikaea Gwabɔɔ lɛ shishi yɛ afi 325 Ŋ.B. lɛ, kɛkɛ ni sɔlemɔ lɛ kɛ ehe wo maŋkwramɔŋ, ni akɛɛ gbɔmɛi lɛ akɛ Maŋtsɛyeli lɛ eba momo. Encyclopaedia Britannica lɛ tsɔɔ mli akɛ, taakɛ Augustine, (354-430 Ŋ.B.) jamɔ tsɔɔmɔ lɛ ji lɛ, “Nyɔŋmɔ Maŋtsɛyeli lɛ eje shishi momo yɛ je nɛɛ mli yɛ be mli ni ato sɔlemɔ lɛ he gbɛjianɔ lɛ,” ni “akɛmiitsu nii bianɛ yɛ sɔlemɔ lɛ jamɔŋ kusum nifeemɔi amli.”

Mɛi krokomɛi hu susuɔ Nyɔŋmɔ Maŋtsɛyeli lɛ he akɛ adesa mɔdɛŋbɔɔ kɛbaaba. Nakai ensaiklopedia lɛ nɔŋŋ kɛɔ akɛ: “Etsɛɛɛ ni Jamɔ Tsakemɔ sɔlemɔi lɛ . . . batsɔmɔ sɔlemɔi ni ato amɛ gbɛjianɔ yɛ kpokpaa wuji anɔ, ni amɛ hu amɛtsĩ naagbee be ni akpaa gbɛ” yɛ Nyɔŋmɔ Maŋtsɛyeli lɛ baa he “lɛ naa.” H. G. Wells ŋma akɛ: “Gbɔmɛi tsi nɔ ni kɔɔ amɛshihilɛ he titri lɛ kɛjɛ Nyɔŋmɔ Maŋtsɛyeli lɛ kɛ adesai anyɛmifeemɔ lɛ he kɛtee nibii ni eka shi faŋŋ akɛ anaa yɛ shihilɛ mli lɛ he, France kɛ England, Russia Krɔŋkrɔŋ, Spania, Prussia . . . Amɛji Europa nyɔŋmɔi diɛŋtsɛ ni yɔɔ shihilɛ mli lɛ.”

Aha Maŋtsɛyeli lɛ etsɔ je lɛ nɔ̃ yɛ ŋmɛnɛŋmɛnɛ beaŋ hu. Encyclopædia Britannica lɛ tsɔɔ mli akɛ: “Nɔ ni sa kadimɔ jogbaŋŋ ji su ni tsɔɔ akɛ esa akɛ gbɔmɔ diɛŋtsɛ ato wɔsɛɛ be adesa weku ni yeɔ emuu lɛ shishijee he gbɛjianɔ yɛ gbɛjianɔtoo kpakpa naa, ni akɛ, akɛ adesa mɔdɛŋbɔɔ baye ‘hiɛ ni kãa nii anɔ’ kɛ ‘mɛ ni amɛɔ’ lɛ najiaŋ.” Yɛ “sanekpakpa shiɛmɔ kɛtsɔ heloo naa yelikɛbuamɔ” nɔ lɛ he lɛ, wolo lɛ nɔŋŋ tee nɔ akɛ: “Nɛkɛ kuu nɛɛ susu Kristofoi asane ni kɔɔ Nyɔŋmɔ Maŋtsɛyeli lɛ he lɛ he titri akɛ kanyamɔ nɔ kɛha jeŋ shihilɛi ni gbɔmɛi yɔɔ mli lɛ agbɛjianɔtoo ekoŋŋ yɛ Nyɔŋmɔ Maŋtsɛyeli lɛ jeŋba he mla naa.”

Yudafoi pii hu esusu Nyɔŋmɔ Maŋtsɛyeli lɛ he akɛ nii ni adesa mɔdɛŋbɔɔ kɛbaaba. Yɛ 1937 mli lɛ, Yudafoi ni Amɛtsake lɛ rabii akpee ko ni afee yɛ Columbus, Ohio, U.S.A. lɛ kɛɛ: “Wɔsusuɔ akɛ eji wɔ yinɔsane mli nitsumɔ akɛ wɔkɛ gbɔmɛi fɛɛ afee ekome yɛ Nyɔŋmɔ Maŋtsɛyeli lɛ, jeŋ muu fɛɛ nyɛmifeemɔ, jalɛsaneyeli, anɔkwale kɛ toiŋjɔlɛ yɛ shikpɔŋ nɔ ní aaato ama shi lɛ mli. Enɛ ji wɔ mesia lɛ he oti ni ma wɔhiɛ.”

Jwɛŋmɔ kroko hu ni mɛi pii hiɛ ji akɛ, Nyɔŋmɔ Maŋtsɛyeli lɛ ji mɔ ko tsuiŋ shihilɛ ko. Akɛ nɔkwɛmɔ nɔ lɛ, yɛ U.S. Amerika nɛkɛ lɛ, 1925 Southern Baptist Sɔlemɔ lɛ jaje akɛ: “Nyɔŋmɔ Maŋtsɛyeli lɛ ji Nyɔŋmɔ ni miiye lumɔ yɛ mɔ aŋkro lɛ tsuiŋ kɛ eshihilɛ mli nibii fɛɛ mli, kɛ agbɛnɛ yɛ gbɔmɛi ni ato amɛ gbɛjianɔ lɛ asui sɔrɔtoi fɛɛ mli. . . . Nyɔŋmɔ Maŋtsɛyeli lɛ baaye emuu yɛ be mli ni aŋɔ gbɔmɔ fɛɛ gbɔmɔ susumɔ kɛ suɔmɔnaa nii nom awo Kristo suɔmɔnaa nifeemɔ shishi lɛ.”

No hewɔ lɛ, ani sɔlemɔ lɛ ji Nyɔŋmɔ Maŋtsɛyeli lɛ? Ani je lɛ nɔ abaatsɔ akɛ nakai Maŋtsɛyeli lɛ aba? Ani eji tsuiŋ shihilɛ ko? Ni mɛni Nyɔŋmɔ Maŋtsɛyeli lɛ baanyɛ atsɔɔ aha bo?