Yoomo Ni Hiɛ Sɔɔ Nii
Yoomo ko ni jɛ Japan ni eye afii 79 ŋma nɛkɛ wolo nɛɛ yɛ be mli ni ekane sane ni je kpo yɛ September 1, 1987 Buu-Mɔɔ lɛ mli ni kɔɔ “Namɛi Baakwɛ Mɛi ni Amɛdara Yɛ Afii Amli Lɛ?” ahe lɛ. Eŋma akɛ:
Kɛha Nyɛmimɛi Ni Misumɔɔ Amɛ Waa,
Beni mikase September 1, 1987 Buu-Mɔɔ lɛ ni kɔɔ mɛi ni amɛdara yɛ afii amli lɛ ahe lɛ, miyoo akɛ shishinumɔ kɛ mlihilɛ yɛ nɔ ni aŋma lɛ mli waa. Beni mishɛ kuku 11 lɛ, ehe bahia ni mayatao klala duku ejaakɛ mifo ni mifo aahu ni minyɛɛɛ makpa. Enɛmɛɛi ji hiɛsɔɔ yaafonui diɛŋtsɛ. Mɛɛ suɔmɔ nɛ, mɛɛ mlihilɛ nɛ! Nɔ ni manyɛ mafee pɛ ji nɔ ni Lala 150 kɛɔ lɛ—nyɛjiea Yah yi! Mikɛ heshibaa miijie mihiɛsɔɔ ni mlikwɔ kpo kɛmiiha nyɛmimɛi lɛ akɛni nyɛŋmala saji ni jwɛŋmɔ yɔɔ mli ni tamɔ nɔ ni tsɔɔ gbɛ ni aaatsɔ nɔ ajie mlihilɛ kpo atsɔɔ mɛi ni amɛdara yɛ afii amli lɛ, ni miida nyɛ shi yɛ nibii fɛɛ ni ji nibii bibii po he. Shi, miida nyɛ shi yɛ nibii kpakpai ni nyɛŋmala ni nyɛŋmalaa daa nyɔŋ nɔ lɛ hewɔ. Ni wiemɔi kpakpai bɛ ni manyɛ ni mikɛtsɔɔ mihiɛsɔɔ lɛ mli. Miikɛɛ ekoŋŋ akɛ, miida nyɛ shi.
Yɛ miishɛɛ mli lɛ, mɔ fɛɛ mɔ ni yɔɔ wɔ asafo lɛ mli lɛ yɛ suɔmɔ kɛ mlihilɛ. Amɛŋɔɔ mi kɛyaa shikpɔŋkuku lɛ mli wɔyashiɛɔ ni amɛkɛ mi baa yɛ amɛkar sɔrɔtoi amli, ni yɛ amɛmlihilɛ suɔmɔ Iɛ hewɔ lɛ, miisɔmɔ akɛ gbɛgbalɔi awalɔ. Mihiɛ sɔɔ daa gbi nitsumɔ lɛ waa akɛni miyɔɔ gbɛjianɔtoo ni yɔɔ naakpɛɛ ni buɔ mɔ he nɛɛ mli.
Gbɔmɛi ni amɛdara yɛ afii amli yɛ je lɛŋ ŋmɛnɛ ni amɛyi miifa yɛ be fɛɛ mli, shi suɔmɔ ni ayɔɔ kɛha amɛ lɛ nɔ miigbɔ yɛ be fɛɛ hu mli, ni nɔ ko nɔ ko bɛ ni tamɔ jɔɔmɔi ni nɔ bɛ ni wɔnine shɛɔ nɔ kɛjɛɔ wɔ-Nyɔŋmɔ ni yɔɔ suɔmɔ lɛ ŋɔɔ Iɛ dɛŋ lɛ. Misɔlemɔ ji akɛ manyɛ maye mabua gbɔmɛi babaoo bɔ ni manyɛ ni amɛkase anɔkwale lɛ koni amɛ hu amɛkɛwɔ anya.
Yijiemɔ aha Yehowa kɛ shidaa hu kɛha nyɛ, misuɔmɔ nyɛmimɛi. Nyɛfainɛ miwao naa bɛ fɛo, ni mihiɛ miigbo yɛ enɛ hewɔ. Yehowa ajɔɔ nyɛ ni ehanyɛ gbɔmɔtsoŋ hewalɛnamɔ kpakpa.
Yoomo ni esaaa.
Nogami
Wiemɔi kɛ henumɔi ni tamɔ nɛkɛ maa anɔkwale ni eji akɛ anɔkwale Kristofoi asuɔmɔ bɛ husui lɛ nɔ mi. Yehowa Odasefoi, ni gbekɛbii kɛ onukpai fɛɛ fata he jieɔ amɛkaselɔ feemɔ su lɛ kpo kɛtsɔɔ Yesu wiemɔi nɛɛ ni amɛhiɔ shi yɛ naa lɛ nɔ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yohane 13:35.