Ahum Babaoo ko ni Aha Eŋmɛ Dɛmm
YESU etsu nii babaoo nakai gbi lɛ, etsɔɔ asafo babaoo lɛ anii yɛ ŋshɔ lɛ naa ni yɛ sɛɛ mli lɛ etsɔɔ ebɛbuai lɛ amli etsɔɔ ekaselɔi lɛ yɛ teemɔŋ. Beni shɛ gbɛkɛ lɛ, ekɛɛ: “Nyɛhaa wɔfoa ŋshɔ lɛ kɛyaa esɛɛgbɛ.”
Amɛyashɛ Galilea Ŋshɔ lɛ bokagbɛ he ni atsɛɔ jɛi akɛ Dekapolis lɛ, ni enɛ jɛ Hela wiemɔ deka ni eshishi ji “nyɔŋma,” kɛ polis ni eshishi ji “maŋ” lɛ mli. Hela kusum nifeemɔi ehe shi waa yɛ nakai maji lɛ amli. Shi Yesu efɔɔɔ nitsumɔ yɛ maji nɛɛ amli pii tsɔ ko. Ahaaa etsɛ po yɛ jɛmɛ be ko beni eyasara jɛmɛ lɛ.
Beni Yesu bi ni amɛfoŋ kɛya ŋshɔ lɛ sɛɛgbɛ lɛ, kaselɔi lɛ kɛ lɛta lɛlɛ mli. Shi mɛi na beni amɛyaa lɛ. Kɛkɛ ni mɛi krokomɛi bote lɛlɛ mli koni amɛnyiɛ esɛɛ. Ŋshɔ lɛ foo jɛkɛɛɛ. Galilea Ŋshɔ lɛ ji kpaakpo agbo ko kɛkɛ, ekɛlɛ aaafee shitooi 13 ni elɛɛmɔ hu aaafee shitooi 71⁄2 .
Shi no mli etɔ Yesu waa. No hewɔ lɛ etsɛɛɛ ni eyaka lɛlɛ lɛ sɛɛ ni ekɛ eyitso fɔ sune nɔ ni ewɔ wɔ ni tsii. Bɔfoi lɛ ateŋ mɛi pii ji wolɛi ni amɛtee wuo shii abɔ yɛ Galilea Ŋshɔ lɛ nɔ. No hewɔ lɛ amɛbɔi lɛlɛ lɛ kudɔmɔ.
Shi enɛ eyafeee gbɛfaa ni yɔɔ mlɛo. Akɛni ŋshɔ lɛ hiɛ edɔ ni gɔji lɛ anɔ hu efee ŋanii hewɔ lɛ kɔɔyɔɔ bɔi tswaa ni enɛ tee ahum kpeteŋkpele ko shi ni eha ŋshɔkei wuji bɔi lɛlɛ lɛ tswiamɔ ni nu bɔi mli baa. Shi fɛɛ lɛ Yesu ewɔ vii diɛŋtsɛ.
Wolɛi ni he esa lɛ bɔi nitsumɔ waa ejaakɛ amɛtsɔ ahum mli pɛŋ shi agbɛnɛ amɛmiishe amɛwala he gbeyei no hewɔ lɛ amɛtsiɛ Yesu akɛ, ‘Nuŋtsɔ, ani onaaa nɔ ni yaa nɔ lɛ, wɔmiishiu, heremɔ wɔyiwala!’ Ete shi yɛ ewɔɔ lɛŋ ni efa ni ŋshɔ lɛ ‘afee dioo!‘ Kɛkɛ ni ahum lɛ kpa tswaa ni ŋshɔ lɛ ŋmɛ dɛmm. Kɛkɛ ni etsɔ ehiɛ eha ekaselɔi lɛ ni ekɛɛ amɛ akɛ: ‘Mɛni hewɔ nyɛsheɔ gbeyei nɛkɛ? Ani nyɛbɛ hemɔkɛyeli?‘
Kɛkɛ ni amɛbɔi amɛhe sanebimɔ akɛ, ‘Namɔ po nɛ ni ŋshɔ kɛ kɔɔyɔɔ po boɔ lɛ toi nɛɛ? Mɛɛ hewalɛ kpele Yesu yɔɔ nɛkɛ? Kwɛ miishɛɛ ni wɔyɔɔ akɛ wɔ-Maŋtsɛ lɛ yɛ hewalɛ yɛ adebɔɔ nibii anɔ, ni ebaatsɔ e-Maŋtsɛyeli Iɛ nɔ esaa shikpɔŋ lɛ ni wɔhi shi shweshweeshwe yɛ nɔ.
Marko 4:35–5:2; Mateo 8:18, 23-28; Luka 8:22-27.
[Baafa 31]September Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)