Ani Obii Asane Haoɔ Bo?

EBAAHAO bo moŋ! Hela, tsofa he nitsumɔ yɛ gbɛ fɔŋ nɔ kɛ gbekɛbii ni toi egbo lɛ ji naagbai ni ole akɛ eyeɔ obii awui lɛ ateŋ etɛ pɛ. Efɔɔ kaa akɛ fɔlɔi jwɛŋɔ amɛbii ahe​—amɛhaoɔ yɛ amɛbii ahe po.

Taakɛ bɔ ni Biblia tsɔɔ lɛ, nakai ji bɔ ni fɔlɔi nu he yɛ yinɔsane mli fɛɛ. Kaimɔ akɛ Yakob tsu Yosef ni eyakwɛ akɛ enyɛmimɛi lɛ yɛ jogbaŋŋ lo, ejaakɛ Yakob miijwɛŋ amɛhe. (1 Mose 37:​13, 14) Hiob hu hao yɛ ebii lɛ ahe, tsɛbelɛ, amɛji onukpai ni hiɛ amɛ diɛŋtsɛ amɛwekui moŋ. Esusu akɛ: “Benɛ mibihii lɛ efee esha ko, ni amɛkwa Nyɔŋmɔ yɛ amɛtsuiiaŋ.”​—Hiob 1:​4, 5.

Hɛɛ, Yosef kɛ Maria po jwɛŋ amɛbi Yesu ni yeɔ emuu lɛ he! Yɛ anɔkwale mli lɛ, be ko beni Yesu eye afii 12 lɛ, amɛhao waa yɛ ehe, ejaakɛ amɛna akɛ elaaje. Shi, amɛbi nɛɛ wo amɛhiɛ nyam, ni yɛ enɛ hewɔ lɛ, esaaa ni amɛshwaa amɛhe tsɔ. Nyɛhaa wɔkwɛa nɔ ni ba diɛŋtsɛ yɛ nakai gbi ni akaiɔ lɛ nɔ, ni wɔsusu nɔ ni ŋmɛnɛŋmɛnɛ bei amli fɔlɔi baanyɛ amɛkase kɛjɛ enɛ mli lɛ he wɔkwɛ.

Bi Ni Elaaje

Kɛ oji fɔlɔ lɛ, ekolɛ obaanu he tamɔ Maria nɔŋŋ beni ekɛɛ Yesu akɛ: “Mibi, mɛɛba ofee wɔ nɛkɛ? Naa, mikɛ otsɛ etao bo kɛ awerɛho.”

Yosef kɛ Maria enaaa Yesu gbii etɛ sɔŋŋ. Obaanyɛ ona nɔ hewɔ ni amɛtsui ye yɛ he ni amɛbi ni eye afii 12 lɛ etsɔ Iɛ he lɛ.​—Luka 2:⁠48.

Mɛni hewɔ Yosef kɛ Maria enaaa Yesu lɛ? Wiemɔ shishitsɔɔlɔ ko ni ehe gbɛi lɛ shwa amɛ yɛ enɛ hewɔ beni eŋma akɛ: “Akɛni amɛle bɔ ni amɛbi nɛɛ jara wa ha lɛ, mɛni hewɔ amɛmɛ be kakadaŋŋ nɛkɛ ni amɛtaooo lɛ? Nɛgbɛ yoofɔyoo musuŋ ni tsɔɔ lɛ kɛ tsui ni eyeɔ yɛ ebi he lɛ yɔɔ?” Shi yɛ anɔkwale mli lɛ, wɔnaa akɛ sane nɛɛ ni wɔɔkwɛ lɛ jogbaŋŋ lɛ haŋ wɔshwa Yosef kɛ Maria tsɔ.

Anɔkwale lɛ ji akɛ, Biblia lɛ tsɔɔ akɛ Maria ji yoo kpakpa kɛ nyɛ kpakpa. Bɔfo Grabriel, ekɛɛ lɛ beni eba koni ebagba Yesu fɔmɔ lɛ, akɛ “ohiɛ eba nyam yɛ Nyɔŋmɔ hiɛ.” (Luka 1:​28, 30) Eje esuɔmɔ mli ekpɛlɛ nitsumɔ ni aha lɛ akɛ ebaafɔ nɛkɛ abifao aloo gbɔmɔ krɛdɛɛ lɛ nɔ, kɛ enɛ he gbɛnaa nii ni ji elɛɛ kɛ atsɔsemɔ lɛ. Eji yoo heshibalɔ, kɛ mɔ ni yɔɔ Nyɔŋmɔ mli hemɔkɛyeli babaoo. Yɛ Yesu fɔmɔ sɛɛ lɛ, etsu nɔ fɛɛ nɔ ni Yehowa Mla biɔ “taakɛ aŋma” lɛ.​—Luka 1:​38, 45-48; 2:​21-28, 39.

Yosef, nuu ni kɛ Maria hi shi ni ebatsɔ Yesu nyɛ wu lɛ ji nuu kpakpa, jalɔ ni kɛ Yehowa bɔfo lɛ ewie shii ejwɛ. (Mateo 1:​19, 20; 2:​13, 19, 22) Kaimɔ akɛ, Yehowa hala Yosef kɛ Maria koni amɛlɛ E-suɔmɔ Bi koome lɛ. Ani wu kɛ ŋa ni Nyɔŋmɔ hala ni baaye abua ebi nɛɛ jogbaŋŋ ni eda yɛ ŋwɛi nilee mli lɛ ehiii?

Nakai nɔŋŋ fɔlɔi ni yɔɔ ŋmɛnɛ lɛ hu haoɔ yɛ amɛbii ahe yɛ osharai kɛ shihilɛi ni nyɛɔ eyeɔ amɛ awui lɛ ahewɔ. Asaŋ, amɛle akɛ amɛbii lɛ jeee mɛi ni yeɔ emuu tamɔ Yesu. Shi,wɔbaanyɛ wɔna Yosef kɛ Maria nɔkwɛmɔ nɔ lɛ he sɛɛ.