Kpojiemɔ Okpɔŋɔiatsɛmɛi Ni He Yɔɔ Naakpɛɛ Lɛ

OKWƐƆ ni onaa ekpɛ ohe beni okpɔŋɔ ni ewo foi ni ekuɛ sɛɛ tsɔi kɛ elei fɛɛ miihoso ni egugɔ mli miigbɛɛ ni ema eyi shi kɛyi jɔɔ ni tɛi yɔɔ nɔ lɛ mli kɛmiiya. Mɔ ni ta nɔ ni he esa babaoo lɛ buɔ shi yɛ okpɔŋɔ lɛ sɛɛ ni ekpɛtɛɔ esɛɛloo ni kpokpoɔ la gbagbalii.

Kɛji oyasara Australia tsinai alɛɛhe ni kã ŋmeŋmei anɔ lɛ, aloo Amerika tsinai alɛɛhe, ŋa kplanaa lɛ, obaana akɛ okpɔŋɔ nɔ talɔ ni he esa jogbaŋŋ lɛ he yɛ naakpɛɛ diɛŋtsɛ. Nakai nɔŋŋ okpɔŋɔi kɛ okpɔŋɔiatsɛmɛi ni atsɔse amɛ jogbaŋŋ lɛ ŋsarabɔɔ yɔɔ fɛo naakpa.

Okpɔŋɔiatsɛmɛi kɛ okpɔŋɔi nɛɛ haa wɔnaa kpɛɔ wɔhe. Shi, okpɔŋɔi kɛ mɛi ni tara amɛnɔ lɛ ni Kpojiemɔ wolo lɛ ŋmalɔ lɛ na lɛ taa mɔ tsuiŋ! Amɛhe yɛ naakpɛɛ ni amɛhe yɛ gbeyei hu. Abale okpɔŋɔiatsɛmɛi nɛɛ yɛ he fɛɛ he akɛ Kpojiemɔ Okpɔŋɔiatsɛmɛi lɛ.

Susumɔ enɛ he okwɛ akɛ naa okpɔŋɔiatsɛmɛi ejwɛ ni he esa miiba onɔ ni mɔ kome miifɔ klante kɛmiiba! Kadimɔ amɛ okpɔŋɔi lɛ ahewolo nɔ su lɛ. Eko fɛɛ eko yɛ sɔrɔto. Okpɔŋɔi nɛɛ ekome yɛɔ, ekome tsuɔ, ekome diɔ, ni ekome tamɔ wuɔfɔ kɛ baaŋmɔŋ. Amɛhe yɛ naakpɛɛ naakpa, ni amɛpuemɔ lɛ ji teemɔŋ sane.

Nyiɛmɔ nɔ ni Biblia ŋmalɔ bɔfo Yohane na ni hoɔ oyayaayai ni eŋma kɛfɔ shi nɛɛ sɛɛ. Ekɛɛ: “Ni mikwɛ, ni naa, okpɔŋɔ yɛŋ; ni mɔ ni ta enɔ lɛ hiɛ gai, ni aha lɛ akekre, ni eje kpo tamɔ kunimyelɔ koni eyaye kunim. . . . Ni okpɔŋɔ kroko ni tsuɔ je kpo, ni mɔ ni ta enɔ lɛ, aha lɛ hegbɛ koni ejie toiŋjɔlɛ kɛjɛ shikpɔŋ lɛ nɔ, ni eha gbɔmɛi agbegbee amɛhe; ni aha lɛ klante kpeteŋkpele ko . . . ni mikwɛ, ni naa, okpɔŋɔ diŋ ni mɔ ni eta enɔ lɛ hiɛ nsɛnii yɛ edɛŋ, ni minu gbee ko . . . miikɛɛ, ‘Ŋmaa susumɔ nɔ̃ [gbi kome nyɔmɔwoo] kɛ abele susumɔ nii etɛ [gbi kome nyɔmɔwoo]’ . . . Ni mikwɛ, ni naa, okpɔŋɔ lamlu, ni mɔ ni ta enɔ lɛ gbɛi ji Gbele, ni Gbohiiaje nyiɛ esɛɛ. Ni aha amɛ hegbɛ yɛ shikpɔŋ lɛ mlijaai ejwɛ mli ekome nɔ, akɛ amɛkɛ klante kɛ hɔmɔ kɛ gbele hela kɛ shikpɔŋ lɛ nɔ kooloi lɛ agbe gbɔmɛi lɛ.”​—Kpojiemɔ 6:​2-8, An American Translation.

Kɛjɛ klɛŋklɛŋ be mli ni aŋma nɛkɛ ninaa nɛɛ lɛ, eshishinumɔ ewa eha ekanelɔi pii. Mɛni okpɔŋɔi ni he yɔɔ naakpɛɛ nɛɛ kɛ mɛi ni tara amɛnɔ nɛɛ damɔ shi kɛha? Mɛɛ be amɛbɔi okpɔŋɔi nɛɛ anɔtaramɔ? Ani amɛnɔtaramɔ nɛɛ naa shihilɛ ni yɔɔ ŋmɛnɛ lɛ nɔ hewalɛ ko? Akɛ shishitsɔɔmɔi sɔrɔtoi ni kɔɔ nɔ ni okpɔŋɔi lɛ kɛ amɛnɔtaralɔi nɛɛ damɔ shi kɛha lɛ he eha, kɛ be mli ni amɛnɔtaramɔ diɛŋtsɛ lɛ je shishi.

Anaa gbeekpamɔ ni bɛ kwraa lɛ yɛ bɔ ni atsɔɔ okpɔŋɔ yɛŋ Iɛ kɛ mɔ ni ta enɔ lɛ shishi ahaa lɛ mli. Akɛ nɔ kwɛmɔ nɔ lɛ, New Catholic Encyclopedia lɛ tsɔɔ mli akɛ okpɔŋɔ yɛŋ lɛ damɔ shi kɛha ‘sanekpakpa lɛ kunimyeli aloo maŋtsɛmɛi anɔyeli.’

Yɛ wolo, Daniel and the Revelation lɛ mli lɛ, Uriah Smith kɛ nɛkɛ shishitsɔɔmɔ nɛɛ ha: “Okpɔŋɔ yɛŋ . . . lɛ feɔ sanekpakpa lɛ kunimyeli yɛ klɛŋklɛŋ afii oha lɛ mli lɛ he okadi . . . Bɔ ni okpɔŋɔ nɛɛ yɛɔ futaa ha lɛ tsɔɔ hemɔkɛyeli lɛ krɔŋŋ feemɔ yɛ nakai yinɔ lɛ mli.”

The Expositor’s Bible lɛ kɛɔ akɛ: “Yɛ enɔtalɔ ni ji klɛŋklɛŋ mɔ lɛ shishi lɛ, atsɔɔ wɔ nɔ ni kɛ enɛ ba yɛ ekunimyeli lɛ shweremɔ shishijee mli, kɛ ewɔsɛɛ kunimyeli lɛ he shiwoo shi jeee Kristo gbɔmɔtso lɛ, . . . Wɔkaseɔ akɛ nɔ ni kɛ enɛ ba lɛ yɛ je lɛ mli, akɛ maŋtsɛyeli nɛɛ yɛ wɔteŋ, ni akɛ mɛi ni teɔ shi amɛshiɔ lɛ lɛ baashiu yɛ amɛnɔ kunimyeli mli.” Shi, Woodrow Kroll ni jɛ Kristofoi ni ji Yudafoi Akuu lɛ mli lɛ nuɔ he akɛ mɔ ni ta okpɔŋɔ yɛŋ lɛ nɔ lɛ ji Antikristo lɛ.

Mɛi komɛi etsɔɔ akɛ okpɔŋɔi lɛ kɛ amɛ nɔ taralɔi lɛ enumɔ ni, shi jeee ejwɛ pɛ. No hewɔ lɛ, te wɔɔfee tɛŋŋ wɔle shishitsɔɔmɔi pii nɛɛ ateŋ nɔ ni ja hu? Te wɔɔfee tɛŋŋ wɔna nɔmimaa akɛ shishinumɔ ni ja ko yɛ lɛ? Namɛi kwraa po ji Kpojiemɔ lɛ mli okpɔŋɔiatsɛmɛi ni he yɔɔ naakpɛɛ nɛɛ, ni mɛɛ be mli amɛje okpɔŋɔi anɔtaramɔ nɛɛ shi?