Kpee He Gbɛjianɔtoo Krɛdɛɛ Kɛha 1985

AATO GBƐJIANƆ sɔrɔto ko afata kpokpaa wuji anɔ kpeei ni abaafee yɛ 1985 mli lɛ he yɛ shikpɔŋ nɔ hei sɔrɔtoi. Abaato kpeei krɛdɛɛi komɛi ahe gbɛjianɔ yɛ shikpɔŋ lɛ nɔ hei komɛi ni akɛye odase wulu ko yɛ jɛmɛ.

Abaafɔ nine atsɛ nyɛmimɛi komɛi akɛ najiaŋdamɔlɔi ni amɛya kpeei nɛɛ yɛ Europa, Caribbean Ŋshɔkɔi lɛ anɔ, Mediteranea niiaŋ, Afrika, South Amerika, Bokagbɛ ni yɔɔ shɔŋŋ lɛ kɛ Pasifik Ŋshɔkpɔi lɛ anɔ. Abaafee kpeei enyɔ loo etɛ yɛ nɛkɛ hei ni atsi ta nɛɛ ni abaatsɔɔ he ni esa akɛ nyɛmimɛi nɛɛ aya. Abaahala maji komɛi ni abaanyɛ ana wɔɔhe yɛ jɛmɛ aha nyɛmimɛi ayibɔ ko. Abaabi ni nitsumɔhe niji komɛi ahala nyɛmimɛi ni amɛbaasumɔ ni amɛya kpeei nɛɛ yɛ maji pɔtɛɛ komɛi anɔ, no hewɔ lɛ efeŋ nɔ ni abaanyɛ aŋmɛ mɔ fɛɛ mɔ gbɛ. Shi kɛlɛ sɛɛnamɔ aaaba he akɛ aaana nyɛmimɛi ni jɛ maji sɔrɔtoi anɔ. Aatswa gbɛjianɔtoo nɛɛ he adafi bianɛ koni aha Yehowa webii ale akɛ hegbɛ baaba aha mɛi komɛi ni amɛyasara maji sɔrɔtoi anɔ.

Najiaŋdamɔlɔi ni abaahala amɛ lɛ baafee Odasefoi ni amɛjɔɔ amɛhe nɔ ni abaptisi amɛ ni amɛbaafee nɔkwɛmɔ nɔ kpakpa amɛha nyɛmimɛi lɛ kɛ hewalɛwoo hu kɛtsɔ amɛnifeemɔ yɛ kpeei ni aaafɔ amɛ nine ni amɛya shishi lɛ nɔ. No hewɔ lɛ aakpa gbɛ akɛ mɛi ni tamɔ nɛkɛ lɛ baabu amɛ gbɛfaa lɛ titri akɛ hegbɛ ni amɛna koni amɛha Maŋtsɛyeli lɛ he nibii ashwere shi jeee shishɛramɔ.

Gbɛjianɔtoo nɛɛ he nibii pii yɛ ni esa akɛ atsu he nii. No hewɔ lɛ Asafo lɛ baasumɔ ni akaŋmala woji bianɛ ni akɛmiibi saji yɛ enɛ he. Asafo lɛ baatsɔ nitsumɔhe niji ni abiɔ ni amɛhala mɛi kɛya kpee loo kpeei lɛ anɔ ni aha ale gbɛfaa nɛɛ he gbɛijanɔtoo.

Abaato kpokpaa wuji anɔ kpeei ahe gbɛjianɔ aha 1985 taakɛ afɔɔ feemɔ lɛ. Enɛ baaha mɔ fɛɛ mɔ ana hegbɛ ni eya kpeei nɛɛ kɛha jɔɔmɔi ni jɛɔ kpeei ni tamɔ nɛkɛ mli baa yɛ teokrase gbɛjianɔtoo naa lɛ eko. Kpeei nɛɛ baama gbɛnaa nii ni jwere wɔnɔ yɛ Maŋtsɛyeli sɔɔmɔ lɛ he yɛ naagbee be nɛɛ mli lɛ nɔ mi. No hewɔ lɛ, yɛ be mli ni wɔkpa gbɛ akɛ wɔbaana “Maŋtsɛyeli Nɔyaa” kpeei lɛ amli gbɛfaŋnɔ yɛ afi ni ho lɛ mli lɛ, eba akɛ Yehowa jɔɔmɔ aaahi naabuamɔ nitsumɔ kpeteŋkpele ni yaa nɔ bianɛ lɛ nɔ.