Beni Oshara Ko Eba Lɛ
EKA shi faŋŋ akɛ weku lɛ bɛ heloo gbɛfaŋ nibii babaoo tsɔ. Shi amɛyɛ nibii babaoo ni amɛbaanyɛ amɛda shi yɛ he. Amɛshikpɔŋ lɛ baa nii babaoo, kɔɔyɔɔ lɛ mli tse ni jeŋ dɔlɛ ni sa yɛ afi muu lɛ fɛɛ mli ni amɛyɛ he ni hi hu.
Amɛ maŋ wulu ni ji Nain lɛ shikamɔ yɛ fɛo yɛ Esdraelon ŋa kpataa ni baa nii babaoo lɛ nɔ, yɛ More Gɔŋ lɛ kooyi-anaigbɛ. Weku lɛ baanyɛ ajɛ amɛshia lɛ amɛkwɛ kɛteke jɔɔ ni kwɛɛnii eyi mli obɔ lɛ kɛyashɛ Galilea gɔji ni koo eyi mli obɔ ni yɔɔ fɛo ni kɛ amɛteŋ jɛkɛɛɛ tsɔ lɛ. Ni no ni amɛnaa yɛ shɔŋŋ ni kwɔ gojoo lɛ ji Hermon Gɔŋ ni snoo yɔɔ eyiteŋ futaa lɛ kɛ Lebanon gɔji ni amɛnaa lɛ hu. Kwɛ miishɛɛ ni eji akɛ yɛ gbi lɛ naagbee lɛ amɛaatara shi yɛ amɛshia lɛ yiteŋ ni amɛkwɛ nibii fɛfɛji ni ebɔle amɛhe lɛ—amɛyi etɛ Iɛ pɛ—nuu lɛ, eŋa lɛ kɛ amɛbinuu lɛ!
Kɛkɛ ni gbi ko lɛ oshara ba—nuu lɛ gbo. Mɛɛ niiashikpamɔ ni yɔɔ mɔbɔ nɛ! Agbɛnɛ gbɛkɛgbɛkɛ ni amɛtaraa shi yɛ toiŋjɔlɛ mli lɛ bɛ dɔŋŋ. Shi kɛlɛ, yoo lɛ shɛje emii yɛ anɔkwale ni eji akɛ ebinuu lɛ yɛ wala mli lolo lɛ hewɔ. No hewɔ lɛ ehiɛnɔkamɔi, nɔ ni eshweɔ kɛ eyiŋtooi bafee nɔ ni kɔɔ ebinuu nɛɛ wɔsɛɛ be he. Kɛkɛ ni ebana miishɛɛ yɛ shihilɛ mli ekoŋŋ yɛ nɛkɛ gbɛ nɔ.
Shi oshara ku sɛɛ eba ekoŋŋ. Binuu lɛ gbo. Agbɛnɛ mɔ ko bɛ dɔŋŋ ni baashɛje emii. Okulafo nɛɛ awerɛho lɛ da, kɛ okwɛ be mli ni asaa ebinuu lɛ gbonyo lɛ kɛhaa fuu Iɛ.
Ekolɛ ole bɔ ni mɔ he feɔ shoo kɛ mɔ ko elaaje esuɔlɔ lɛ. Kwɛ bɔ ni ofeɔ mɔ ni yeɔ awerɛho kwraa ni obɛ hiɛnɔkamɔ ko kwraa ha! Gbele ji henyɛlɔ kpele lɛlɛŋ. Yɛ be ni tamɔ nɛkɛ mli lɛ nɔ ni mɛi susuɔ he ji wɔsɛɛ be ni yɔɔ kɛha gbohii. Ani hiɛnɔkamɔ ko yɛ diɛŋtsɛ kɛha amɛ?
Bo lɛ susumɔ enɛ he; kɛji akɛ mɔ ko baanyɛ aba ni ebamɔ osuɔlɔ ni egbo lɛ mli ni etee lɛ shi kɛba wala kɛ gbɔmɔtso hewalɛnamɔ mli eha bo ekoŋŋ lɛ he. Mɛɛ miishɛɛ enɛ aaaji aha bo nɛkɛ! Mɛɛ naakpɛɛ nii enɛ aaaji nɛkɛ!
Shi obaakɛɛ akɛ, ‘Enɛ nyɛŋ aba mli nakai.’ Lɛlɛŋ ebako mli nakai yɛ owala be mli da, shi eba pɛŋ da. Yei anine shɛ amɛgbohii anɔ kɛtsɔ gbohiiashitee nɔ.
Mɛɛ be mli enɛ ba? Mɛni hewɔ wɔbaanyɛ wɔhe wɔye? Mɛni ji nɔ ni etsɔɔ kɛha wɔ ŋmɛnɛ?