Gbɛ Ni Atsɔɔ Nɔ Afeɔ Wolo Ni He Hiaa Fe Fɛɛ Lɛ

“Mikɛ afii 19 sɔŋŋ emɛ enɛ!” Mɛni no mli lɛ wɔnyɛmi Kristofonyo lɛ mɛɔ lɛ? Kristofoi A-Hela Ŋmalɛi​—Jeŋ Hee Shishitsɔɔmɔ lɛ yɛ lɛ diɛŋtsɛ emaŋ wiemɔ ni ji Bengali mli. Mɛi babaoo wieɔ nɔ ko tamɔ nakai nɔŋŋ kɛ́ ajie Jeŋ Hee Shishitsɔɔmɔ lɛ kpo yɛ amɛdiɛŋtsɛ amɛmaŋ wiemɔ mli. Shi, ani osusu gbɛ ni atsɔɔ nɔ atsɔɔ Bibliai nɛɛ ashishi ni akalaa lɛ he pɛŋ?

Klɛŋklɛŋ lɛ, yɛ Gbɛtsɔɔmɔ Kuu lɛ Niŋmaa Ajinafoi Akuu lɛ gbɛtsɔɔmɔ naa lɛ, akɛ nitsumɔ lɛ woɔ wiemɔ shishitsɔɔmɔ kuu ko dɛŋ. Be enyiɛ eheɔ kuu ko kɛtsɔɔ Biblia lɛ shishi? Nicholas Ahladis, ni tsuɔ nii yɛ Translation Services ni yɔɔ Warwick yɛ New York lɛ tsɔɔ mli akɛ: “Edamɔ otii babaoo anɔ, ekomɛi ji, wiemɔ shishitsɔɔlɔi abɔ ni yɔɔ kɛhã nitsumɔ lɛ, bɔ ni wiemɔ lɛ yɔɔ hã, bɔ ni mɛi ni kaneɔ lɛ nuɔ bɔ ni shihilɛ lɛ ji yɛ Biblia beiaŋ lɛ shishi amɛhã, kɛ agbɛnɛ hu, kɛji wiemɔ lɛ yɛ srɔto yɛ kpokpaa fɛɛ kpokpaa nɔ. Kɛ́ hooo lɛ, eheɔ wiemɔ shishitsɔɔmɔ kuu fɛɛ kuu afi kɛmiimɔ afii etɛ dani amɛtsɔɔ Kristofoi A-Greek Ŋmalɛ lɛ shishi amɛgbeɔ naa, ni eheɔ amɛ afii ejwɛ loo nɔ ni fe nakai kɛtsɔɔ Biblia muu lɛ fɛɛ shishi. Ni ayeɔ be babaoo fe nakai kɛ́ aatsɔɔ mumui awiemɔi ashishi.”

Kɛ́ aatsɔɔ Biblia lɛ shishi lɛ, ebiɔ ni aná mɛi babaoo fe wiemɔ shishitsɔɔmɔ kuu lɛ pɛ. Ahãa nikanelɔi akuu ko ni emlibii lɛ jɛ shihilɛi srɔtoi amli, ni bei komɛi po lɛ, amɛjɛ maji srɔtoi anɔ lɛ kwɛɔ ŋmalɛi ni atsɔɔ shishi lɛ mli ekoŋŋ, koni kɛ́ tsakemɔi komɛi ahe miihĩa lɛ, amɛtsɔɔ, ni awooo amɛ nyɔmɔ yɛ nitsumɔ nɛɛ he. Enɛ ni amɛfeɔ lɛ yeɔ ebuaa wiemɔ shishitsɔɔlɔi lɛ ni amɛfeɔ Biblia ni ja, ni emli kã shi faŋŋ ni eshishinumɔ waaa. Nyɛminuu ko ni yɔɔ South Africa, ni etsɔseɔ Biblia shishitsɔɔlɔi lɛ wie enɛ he akɛ, “wiemɔ shishitsɔɔlɔi nuɔ he akɛ, eji sɔ̃ ni tsii ni kã amɛnɔ, ni esa akɛ amɛtsũ he nii amɛhã Yehowa kɛ mɛi ni kaneɔ e-Wiemɔ lɛ.”

Kɛ́ atsɔɔ Biblia lɛ shishi agbe naa lɛ, esa akɛ aprinti ni awo sɛɛ. Bɔ ni afee ni aprinti ni awo sɛɛ lɛ, kɛ́ hooo lɛ, woji akalamɔhei lɛ kɛ “nibii” nyɔŋma tsuɔ nii: wolo, iŋk, nɔ ni akɛhaa wolo lɛ sɛɛ, glu, cover liners, silva kɔla, kpãai ni akɛ kadiɔ baafã ni agbele lɛ, nibii ni wajeɔ wolo lɛ sɛɛ teŋgbɛ, kɛ capping material ni yeɔ ebuaa ni atsaraa Biblia lɛ mli woji lɛ. Yɛ afi 2019 lɛ, akɛ shika ni fa fe Amerika dɔlai miliɔn 20 he nibii ni akɛfeɔ Biblia lɛ pɛ. Mɛi ni tsuɔ nii yɛ wɔwoji akalamɔhe lɛ kɛ ŋmɛlɛtswai ni fa fe 300,000 tsu nii kɛkala Bibliai, ni amɛkɛmaje hu.

Mɛni hewɔ wɔkɛ shika kɛ bei babaoo woɔ nitsumɔi nɛɛ amli lɛ? Joel Blue, ni etsuɔ nii yɛ International Printing Department lɛ wie akɛ, “Biblia lɛ ji wolo ni he hiaa fe fɛɛ yɛ woji kɛ nibii ni wɔfeɔ lɛ ateŋ. No hewɔ lɛ, wɔmiisumɔ ni wɔfee wolo lɛ bɔ ni kɛ́ ana lɛ, ebaawo Nyɔŋmɔ ni wɔjáa lɛ kɛ sane ni wɔshiɛɔ lɛ hiɛ nyam.”

Yɛ Jeŋ Hee Shishitsɔɔmɔ lɛ diɛŋtsɛ ni wɔfeɔ lɛ sɛɛ lɛ, wɔfeɔ ehenɔ komɛi wɔhãa mɛi ni yɔɔ hiamɔ nii pɔtɛi komɛi. Akɛ nɔkwɛmɔnɔ lɛ, afee braille Jeŋ Hee Shishitsɔɔmɔ lɛ kɛhã shwilafoi yɛ wiemɔi nyɔŋma mli. Eheɔ ŋmɛlɛtswai kpaanyɔ dani anyɛɔ akalaa braille Biblia kome agbeɔ naa, ni akɛni ekpoi lɛ fa hewɔ lɛ, ebiɔ ni aná he ko ni lɛɛmɔ aafee mitai 2.3 ni akɛshwie. Agbɛnɛ hu, wɔfeɔ Biblia krɛdɛɛ ko wɔhãa mɛi ni awo amɛ tsuŋ yɛ hei ni aŋmɛɛɛ gbɛ ni akɛ woji ni sɛɛ tilɛ aya jɛmɛ lɛ.

Jeŋ Hee Shishitsɔɔmɔ lɛ náa mɛi ni kaneɔ lɛ anɔ hewalɛ. Susumɔ Asafo ko ni yɔɔ Tombe, yɛ Democratic Republic of the Congo lɛ niiashikpamɔ lɛ he okwɛ, amɛwieɔ Kiluba. Kɛ́ okɛ tsɔne miifã gbɛ kɛjɛ maŋtiase lɛ kɛmiiya Tombe lɛ, eheɔ kilomitai 1,700 kɛ sɛɛ. No mli lɛ, Biblia kome pɛ Odasefoi ni yɔɔ jɛmɛ lɛ yɔɔ, ni aŋma yɛ Kiluba wiemɔ ni be eho lɛ mli. Biblia kome too nɛɛ nɔŋŋ mɔ fɛɛ mɔ ni yɔɔ nifeemɔ yɛ asafoŋ kpee shishi lɛ kɛsaa ehe. Shi afee Jeŋ Hee Shishitsɔɔmɔ lɛ yɛ Kiluba wiemɔ ni awieɔ bianɛ lɛ mli, ni kɛjɛ August 2018 kɛbaa nɛɛ, mɔ fɛɛ mɔ ni yɔɔ asafo lɛ mli lɛ nine eshɛ eko nɔ.

Nyɛmiyoo ko ni wieɔ German wiemɔ lɛ wie yɛ Jeŋ Hee Shishitsɔɔmɔ lɛ ni afee yɛ emaŋ wiemɔ mli lɛ he akɛ: “Kulɛ mikɛɔ mihe akɛ esa akɛ makane Biblia Iɛ. Amrɔ nɛɛ, mibiɔ mihe akɛ, ‘Mɛɛ be makane Biblia lɛ ekoŋŋ?’” Nuu ko ni awo lɛ tsuŋ lɛ ŋma akɛ: “Ahã mi Jeŋ Hee Shishitsɔɔmɔ lɛ eko, ni ehã miifee tsakemɔi yɛ mishihilɛ mli. Biblia shishitsɔɔmɔ nɛɛ ni mibɔi kanemɔ lɛ, ehã mibanu Nyɔŋmɔ wiemɔ lɛ shishi jogbaŋŋ fe tsutsu lɛ. Masumɔ ni male Yehowa Odasefoi lɛ ahe saji babaoo, ni matsɔ Odasefonyo.”

Mɛi fɛɛ ni kaneɔ Jeŋ Hee Shishitsɔɔmɔ Biblia lɛ ahiɛ sɔɔ oniai ni atsuɔ kɛfĩɔ Biblia nɛɛ feemɔ kɛ ekalamɔ lɛ sɛɛ lɛ. Kɛ́ ootao ole gbɛi ni atsɔɔ nɔ atsuɔ onia kɛfĩɔ jeŋ muu fɛɛ nitsumɔ lɛ sɛɛ lɛ, yaa donate.jw.org. Oyiwaladɔŋŋ yɛ ejurɔ ni ofeɔ nɛɛ hewɔ.