Mɛni Hewɔ Yehowa Odasefoi Kuɔ Amɛsɛɛ Amɛyaa Mɛi Ni Ekɛɛ Amɛ Pɛŋ Akɛ Amɛbɛ Amɛwiemɔ Lɛ He Miishɛɛ Lɛ Aŋɔɔ Ekoŋŋ Lɛ?

Suɔmɔ ni Yehowa Odasefoi yɔɔ kɛhã Nyɔŋmɔ kɛ amɛnyɛmi gbɔmɔ lɛ hãa amɛshiɛɔ Biblia mli sane lɛ amɛhãa mɛi fɛɛ, kɛ mɛi po ni ekɛɛ amɛ pɛŋ akɛ amɛbɛ amɛwiemɔ lɛ he miishɛɛ lɛ. (Mateo 22:37-​39) Suɔmɔ ni wɔyɔɔ kɛhã Nyɔŋmɔ lɛ tsirɛɔ wɔ ni wɔboɔ e-Bi lɛ famɔ akɛ “wɔye odase fitsofitso” lɛ toi. (Bɔfoi 10:42; 1 Yohane 5:3) Enɛ biɔ ni wɔya mɛi ni wɔshiɛɔ wɔhãa lɛ aŋɔɔ shii abɔ tamɔ bɔ ni Nyɔŋmɔ gbalɔi ni hi shi yɛ blema lɛ fee lɛ. (Yeremia 25:4) Akɛni wɔsumɔɔ wɔnyɛmi gbɔmɔ hewɔ lɛ, wɔshiɛɔ “Maŋtsɛyeli lɛ he sane kpakpa” lɛ ni hereɔ mɔ yiwala lɛ wɔhãa mɛi fɛɛ, kɛ mɛi ni be ko ni eho lɛ, amɛbɛ wɔwiemɔ lɛ he miishɛɛ lɛ po.​—Mateo 24:14.

Kɛ́ wɔku wɔsɛɛ kɛtee shĩai ni be ko ni eho lɛ mɛi ni yɔɔ jɛmɛ lɛ booo wɔ toi lɛ amli lɛ, bei pii lɛ, ewoɔ yibii kpakpai. Naa yiŋtoi etɛ ahewɔ ni wɔkɛɔ nakai:

• Mɛi tsakeɔ amɛshihilɛhei.

• Mɛi krokomɛi ni yɔɔ shĩa lɛ boɔ sane lɛ toi.

• Mɛi tsakeɔ. Je lɛŋ shihilɛ loo mɛi ashihilɛ ni tsakeɔ nyɛɔ ehãa mɛi nuɔ he akɛ “Nyɔŋmɔ he miihia amɛ” ni no hãa amɛnáa Biblia lɛ he miishɛɛ. (Mateo 5:3) Mɛi ni be ko ni eho lɛ amɛteɔ shi amɛwoɔ wɔ lɛ po baanyɛ atsake amɛtsui tamɔ eba lɛ yɛ bɔfo Paulo gbɛfaŋ lɛ.​—1 Timoteo 1:​13.

Kɛ̃lɛ, wɔkɛ sane ni wɔshiɛɔ lɛ fĩii mɛi anɔ. (1 Petro 3:​15) Wɔheɔ wɔyeɔ akɛ, esa akɛ mɔ fɛɛ mɔ akpɛ eyiŋ yɛ jamɔ mli ni ebaasumɔ ni ehi lɛ he.​—5 Mose 30:19, 20.