Ani Yehowa Odasefoi yɛ Amɛ Diɛŋtsɛ Amɛ-Biblia?

Yehowa Odasefoi kɛ Biblia shishitsɔɔmɔi srɔtoi etsu nii kɛkase Biblia lɛ. Kɛ̃lɛ, yɛ wiemɔi ni yɔɔ New World Translation of the Holy Scriptures amli lɛ, wɔsumɔɔ waa akɛ wɔkɛ no atsu nii ejaakɛ ekɛ Nyɔŋmɔ gbɛ́i lɛ tsuɔ nii, shishitsɔɔmɔ lɛ ja jogbaŋŋ, ni emli kã shi faŋŋ.

• Nyɔŋmɔ gbɛ́i lɛ Kɛnitsumɔ. Biblia kalalɔi komɛi kɛ anunyam hãaa eŋmalɔ lɛ yɛ hei ni esa akɛ amɛŋɔ anunyam amɛhã lɛ yɛ lɛ. Akɛ nɔkwɛmɔnɔ lɛ, Biblia shishitsɔɔmɔ ko eŋmala mɛi ni fe 70 ni ye amɛbua kɛkala Biblia lɛ agbɛ́i yɛ mli. Kɛ̃lɛ, nɛkɛ Biblia nɛɛ ejie Nyɔŋmɔ gbɛ́i ni ji Yehowa lɛ moŋ kɛje mli kwraa!

  Nɔ ni tamɔɔɔ nakai lɛ, Jeŋ Hee Shishitsɔɔmɔ lɛ kɛ gbɛ́i krɔŋkrɔŋ nɛɛ esaa ewo hei fɛɛ ni ejeɔ kpo yɛ, yɛ Hebri Ŋmalɛi lɛ amli lɛ pɛpɛɛpɛ, shi, etsɔɔɔ mɛi ni ye amɛbua kɛkala lɛ agbɛ́i.

• Eja Jogbaŋŋ. Jeee Biblia shishitsɔɔmɔi lɛ fɛɛ tsɔɔ Biblia lɛ shishi yɛ gbɛ ni ja nɔ taakɛ eji yɛ Hebri Ŋmalɛ lɛ mli lɛ. Akɛ nɔkwɛmɔnɔ lɛ, Biblia shishitsɔɔmɔ ko tsɔɔ Mateo 7:​13 lɛ shishi yɛ nɛkɛ gbɛ nɔ: “Nyɛbotea agbo fiŋtɔɔ lɛ mli, ejaakɛ agbo ni lɛɛ kɛ gbɛ tɛtɛrɛɛ ji nɔ ni kɛmɔ yaa hɛl, ni emli yaa jaraaa.” Nɔ ni tamɔɔɔ nakai lɛ, Hebri Ŋmalɛ lɛ kɛ wiemɔ ni ji “hiɛkpatamɔ,” tsu nii, shi jeee “hɛl.” Ekolɛ, Biblia shishitsɔɔlɔi lɛ kɛ wiemɔ “hɛl” lɛ tsu nii akɛni amɛheɔ amɛyeɔ akɛ abaapiŋ efɔŋfeelɔi lɛ yɛ hɛl la mli kɛya naanɔ lɛ hewɔ. Shi, Biblia lɛ fiii nakai tsɔɔmɔ lɛ sɛɛ.[Link “not supported by the Bible” to w12 10/1 12 Does God Punish People in Hellfire?] Moŋ lɛ, Jeŋ Hee Shishitsɔɔmɔ lɛ tsɔɔ shishi yɛ gbɛ ni ja nɔ akɛ: “Nyɛtsɔa agbó fintɔŋŋ lɛ mli, ejaakɛ agbó ni lɛɛ kɛ gbɛ ni da lɛ ji nɔ ni kɛ mɔ yaa hiɛkpatamɔ mli.”

• Emli Kã Shi Faŋŋ. Esa akɛ shishitsɔɔmɔ ni ja lɛ, afee nɔ ni mli kã shi faŋŋ ni eshishinumɔ hu waaa. Susumɔ nɔkwɛmɔnɔ nɛɛ he okwɛ. Wiemɔ ni Kristofonyo bɔfo Paulo kɛtsu nii yɛ Romabii 12:11 lɛ, shishinumɔ ŋmiiŋmi ji “mumɔ lɛ atswa.” Akɛni ŋmɛnɛ lɛ, wiemɔ nɛɛ shishinumɔ bɛ faŋŋ hewɔ lɛ, Jeŋ Hee Shishitsɔɔmɔ lɛ kɛ wiemɔ ni shishinumɔ yɔɔ faŋŋ ni ewaaa hu tsu nii. Etsɔɔ shishi akɛ esa akɛ Kristofoi ‘ahe adɔ la yɛ mumɔ lɛ naa.’

Kɛfata Nyɔŋmɔ gbɛ́i lɛ kɛnitsumɔ, ja ni eja, kɛ eshishinumɔ ni waaa lɛ he lɛ, nɔ kroko hu ni sa kadimɔ waa yɛ Jeŋ Hee Shishitsɔɔmɔ lɛ he ji: Akɛhãa mɔ fɛɛ mɔ, ni jara ko bɛ he. No hewɔ lɛ, mɛi babaoo nyɛɔ amɛkaneɔ Biblia lɛ yɛ amɛ diɛŋtsɛ amɛwiemɔ mli​—mɛi ni kulɛ, amɛnyɛŋ amɛhé Biblia lɛ po yɛ eko.