Ani Nyɛheɔ Nyɛyeɔ akɛ Gbii Ekpaa Pɛ Akɛbɔ Ade?

Dabi. Yehowa Odasefoi heɔ amɛyeɔ akɛ Nyɔŋmɔ bɔ nɔ fɛɛ nɔ. Shi wɔheee wɔyeee akɛ gbii ekpaa kɛkɛ akɛbɔ ade. Mɛni hewɔ? Ejaakɛ susumɔi komɛi ni mɛi hiɛ ákɛ akɛ gbii ekpaa pɛ bɔ ade lɛ kɛ Biblia lɛ kpãaa gbee. Susumɔ nɔkwɛmɔ nii enyɔ ni nyiɛ sɛɛ nɛɛ ahe okwɛ:

1. Adebɔɔ gbii ekpaa lɛ sɛɛkɛlɛ. Mɛi ni susuɔ akɛ gbii ekpaa diɛŋtsɛ akɛbɔ ade lɛ ekomɛi kɛɛ akɛ, gbii ni akɛbɔ ade lɛ eko fɛɛ eko hiɛ ŋmɛlɛtswai 24 diɛŋtsɛ. Shi Biblia lɛ kɛ wiemɔ “gbi” damɔɔ shi kɛhaa be sɛɛkɛlɛ srɔtoi.​—1 Mose 2:4; Lala 90:4.

2. Afii abɔ ni shikpɔŋ lɛ eye. Mɛi ni susuɔ akɛ gbii ekpaa pɛ akɛbɔ ade lɛ ekomɛi tsɔɔ akɛ, shikpɔŋ lɛ eye afii akpei fioo ko pɛ kɛkɛ. Kɛlɛ, Biblia lɛ tsɔɔ akɛ shikpɔŋ lɛ, kɛ je lɛ yɛ dani adebɔɔ gbii ekpaa lɛ je shishi. (1 Mose 1:1) Enɛ hewɔ lɛ, Yehowa Odasefoi eteee shi amɛwooo jeŋ shikpalɔi aniiamlipɛimɔi ni ja ni tsɔɔ akɛ, shikpɔŋ lɛ eye aaafee afii akpekpe toi akpei komɛi lɛ.

Eyɛ mli akɛ Yehowa Odasefoi heɔ adebɔɔ amɛyeɔ moŋ, kɛlɛ wɔkpooo jeŋ shikpámɔ. Wɔheɔ wɔyeɔ akɛ jeŋ shikpámɔ ni ja lɛ kɛ Biblia lɛ kpãa gbee.